ލަސްވޭގަސްގެ މިއުޒިކް ފެސްޓިވަލެއްގެ ތެރެއަށް ބަޑި ޖަހާ އެތައް ބަޔަކު މަރާލައިފި

ލަސްވޭގަސްގައި ކުރިޔަށް ދިޔަ މިއުޒިކް ފެސްޓިވަލެއް ތެރެއަށް ބަޑިޖަހާ 50 އަށް ވުރެ ގިނަ މީހުން މަރާލައިފިއެވެ.

ރިޕޯޓްތައް ބުނާގޮތުން ބަޑިޖަހާފައި ވަނީ ލަސްވޭގަސްގެ ހޮޓަލެއްގެ 32 ވަނަ ފަންގިފިލާއިންނެވެ. އެހެން ނަމަވެސް މާގިނައިރުތަކެއް ނުވަނީސް ހުއްޓުމެއްނެތި ބަޑިޖަހަމުންދިޔަ މީހާ، ފުލުހުން ވަނީ ބަޑިޖަހާ މަރާލާފައެވެ. މިހާތަނަށް މި ހާދިސާގައި 200 އަށް ވުރެ ގިނަ މީހުން ޒަހަމްވެފައިވާ ކަމަށްވެސް ރިޕޯޓްތައް ބުނެއެވެ.

މި ހަމަލާ އަކީ އެމެރިކާގެ ތާރީހުގައި ވެސް ދެވުނު އެންމެ ބޮޑު އެއް ޓެރެރިސް ހަމަލާއެވެ. މިދިޔަ އަހަރު އޮލާންޑޯ ނައިޓް ކްލަބަކަށް ދިން ހަމަލާއެއްގައި 49 މީހުން ވަނީ މަރާލާފައެވެ.

ރިޕޯޓްތައް ބުނާގޮތުން ބަޑިޖެހި މީހާއަކީ ލަސްވޭގަސްގެ ސްޓެފެން ޕެޑޮކް ނަމަކަށް ކިޔާ މީހެކެވެ. މި ހަމަލާ ދީފައިވަނީ އޭނާ އެކަނިކަމަށް ވެސް ރިޕޯޓްތައް ބުނެއެވެ. އެހެން ނަމަވެސް ފުލުހުން ތުހުމަތު ކުރާގޮތުގައި އޭނާ މި ހަމަލާ ދީފައިވަނީ ޖަމާއަތަކާ ގުޅިގެންނެވެ.

ފުލުހުން ވަނީ ހަމަލާދިން މީހާގެ ރޫމް މޭޓް ހޯދާފައެވެ. މަރިލޯ ޑޭންލީ ނަމަކަށް ކިޔާ މި އަންހެން މީހާ ފުލުހުން ހޯދާފައިވާއިރު، އޭނާ އަކީ ހަމަލާދިން މީހާގެ އެސޯސިއޭޓް ކަމަށް ރިޕޯޓްތައް ބުނެއެވެ. މީގެއިތުރުން ފުލުހުން ވަނީ ހަމަލާދިން މީހާ އަދި އެސޯސިއޭޓްކަމަށް ތުހުމަތުކުރެވޭ މީހާގެ ކާރު ވެސް ހޯދާފައެވެ.

ރިޕޯޓްތައް ބުނާގޮތުން ހަމަލާގައި ގިނައިން މަރުވެފައިވަނީ 20 އަހަރާ 30 އަހަރާ ދެމެދުގެ ޒުވާނުންނެވެ.