އެމެރިކާގެ ޕްރައިމަރީ ސްކޫލެއްގައި ބަޑިން ހަމަލާދީ ދެމީހުންނާއި ކުޑަ ކުއްޖަކު މަރާލައިފި
ހަމަލާ ދިން މީހާ ސްކޫލްގެ ތެރެއަށް ވަދެފައި ވަނީ ޒިޔާރަތްކުރާ މީހެއްގެ ހައިސިއްޔަތުން
ހާދިސާ ހިނގި ސްކޫލް ސަރަހައްދު
އެމެރިކާގެ ކެލިފޯނިއާ ސްޓޭޓްގެ ސެން ބާނާޑީނޯ ސިޓީގެ ޕްރައިމަރީ ސްކޫލެއްގައި ދިން ބަޑީގެ ހަމަލާއެއްގައި އުމުރުން އަށް އަހަރުގެ ކުއްޖަކާއި ދެ މީހަކު މަރާލައިފި އެވެ.
ރިޕޯޓުތައް ބުނާގޮތުން ބަޑީގެ ހަމަލާ ދިން ކަމަށް ތުހުމަތު ކުރެވޭ މީހާ ބަޑި ޖަހާ މަރާލައިފައި ވަނީ އޭނާގެ އަނބިމީހާ އާއި، ޓީޗަރަކެވެ. އަދި ކުޑަ ދެކުދިން ވެސް ޒަޚަމްވެފައިވާއިރު އޭގެ ތެރެއިން އެއްކުއްޖަކަށް ލިބިފައިވާ ޒަޚަމްތަކުގެ ސަބަބުން ވަނީ މަރުވެފަ އެވެ. ބަޑީގެ ހަމަލާ ދިނުމަށް ފަހު އޭނާ ވަނީ އަމިއްލަ ގަޔަށް ބަޑިޖަހައި، އަމިއްލައަށް މަރުވާން ވެސް މަސައްކަތްކޮށްފައެވެ. އެހެން ނަމަވެސް އެކަން ކާމިޔާބު ނުވަނީސް ފުލުހުން ވަނީ އޭނާ ހައްޔަރުކޮށްފައެވެ.
ސެން ބާނާޑީނޯގެ ފުލުހުންގެ ވެރިޔާ އެ ހާދިސާ ސިފަކުރެއްވީ "ގަސްތުގައި މީހަކު މަރާލާ-އަމިއްލައަށް މަރުވުމުގެ" އަމަލެއް ކަަމުގައެވެ.
ސެން ބާނާޑީނޯގެ ނޯތު ޕާކް އެލެމެންޓްރީ ސްކޫލުގައި ހޯމަ ދުވަހު ހިނގި ހާދިސާގައި، ބަޑީގެ ހަމަލާ ދީފައި ވަނީ އުމުރުން 53 އަހަރުގެ ސެޑްރިކް އެންޑާސަން ނަމަކަށް ކިޔާ މީހެކެވެ. ހަމަލާ ދިން މީހާ ސްކޫލްގެ ތެރެއަށް ވަދެފައި ވަނީ ޒިޔާރަތްކުރާ މީހެއްގެ ހައިސިއްޔަތުން ކަމަށާއި ހަމަލާ ދިނުމާ ހިސާބަށް އޭނާ ގެންގުޅުނު ހަތިޔާރު އޮތީ ފޮރުވާފައި ކަމަށް ރިޕޯޓުތައް ބުނެއެވެ. މި ހާދިސާ ހިނގާފައި ވަނީ ހާއްސަ އެހީއަށް ބޭނުންވާ 15 ކުއްޖަކަށް ކިޔަވައިދޭ ކްލާސްރޫމެއްގަ އެވެ.
