އިގިރޭސި ޕާލަމަންޓް ބޭރުގައި ބަޔަކު ބަޑި ޖަހައިފި

އިގިރޭސިވިލާތުގެ ޕާލިމަންޓް ސަރަހައްދުގައި ހިނގި ހަމަލާ ތަކެއްގައި އެތަށް ބަޔަކަށް އަނިޔާވެފައިވާ ކަމަށް އިގިރޭސި މީޑިޔާތަކުން ރިޕޯޓްކޮށްފި އެވެ.

ބުދަ ދުވަހު ހިނގައިދިޔަ ހާދިސާގައި ހަމަލާ ދިން މީހާ ގަޔަށް ބަޑިޖަހައި، އިރުކޮޅެއްގެ ތެރޭގައި ހާލަތު އެއްކޮށް ކޮންޓްރޯލް ކުރެވިފައިވާ ކަމަށް ފުލުހުން ބުނެފައިވެ އެވެ.

އިގިރޭސި ޕާލިމަންޓްގެ ތިރިގެ، ނުވަތަ ހައުސް އޮފް ކޮމަންސްގެ ލީޑަރު ޑޭވިޑް ލިޑިންގޓަން ބީބީސީ އަށް މައުލޫމާތު ދެއްވަމުން ވިދާޅުވީ، ހަމަލާދިން މީހާ ގަޔަށް ފުލުހުން ބަޑިޖެހީ، ފުލުހަކަށް ވަޅިން ހަމަލާ ދިނުމާއި ގުޅިގެންނެވެ. އަދި، ޕާލިމަންޓްގެ މުއައްޒަފުން އޮފީސްތަކުން ނުނިކުތުމަށް އަންގާފައިވާ ކަމަށްވެސް އޭނާ ވިދާޅުވި އެވެ.

ބީބީސީގެ ނޫސްވެރިން ބުނާ ގޮތުގައި ހަމަލާ ދިން މީހާ، ތިން ފަހަރު، ނުވަތަ ހަތަރު ފަހަރު ބަޑިޖަހާފައިވާ ކަމަށެވެ. އަދި ބަޑިޖެހުމުގެ ކުރިން ބާރު އަޑެއްވެސް އިވިފައިވާ ކަމަށް ނޫސްވެރިން ބުނެ އެވެ.

ހަމަލާދޭން ފެށުމާއެކު، އެވަގުތު ޕާލިމަންޓްގައި ހުންނެވި ބޮޑުވަޒީރު ތެރޭސާ މޭ ވަނީ ވަގުތުން އެހެން ސަރަހައްދަކަށް ބަދަލުކޮށްފަ އެވެ.

ސްކޮޓްލަންޑް ޔާޑުން މިހާދިސާ މިހާރު ތަހުގީގުކުރަމުންދާ އިރު، މިހާދިސާއާއި ގުޅިގެން ވެސްޓްމިންސްޓަރ އަންޑަގްރައުންޑް ސްޓޭޝަން ވަނީ ބަންދުކޮށްފަ އެވެ.