ހަތަރު އަހަރުގެ ތެރޭގައި ފަސް ވަނަ ބޮޑު ވަޒީރު، ބާންހަމް ވައުދުވެ ވަޑައިގެންނެވީ ދިރިއުޅުމުގެ ޚަރަދުތައް ކުޑަކުރުމަށް

އިނގިރޭސިވިލާތުގެ ބޮޑު ވަޒީރުގެ މަޤާމާ އެންޑީ ބާންހަމް ރަސްމީކޮށް ހަވާލުވެ ވަޑައިގެންނެވުމާ އެކު، ފާއިތުވި ހަތަރު އަހަރުގެ ތެރޭގައި އެ ޤައުމަށް ވަޑައިގެންނެވި ފަސް ވަނަ ބޮޑު ވަޒީރަކަށް އޭނާ ވެއްޖެ އެވެ.

އައު ބޮޑު ވަޒީރުގެ ހައިސިއްޔަތުން ދެއްވި ފުރަތަމަ ތަގުރީރުގައި، ބާންހަމް ވަނީ ދިރިއުޅުމުގެ ހަރަދުތައް ކުޑަ ކުރުމަށް އެހީތެރިކަން ފޯރުކޮށްދެއްވާނެ ކަމުގެ ވައުދުވެ ވަޑައިގެންފައި އެވެ. ޤައުމާ މުޚާތަބު ކުރައްވަމުން ބާންހަމް ވިދާޅުވީ، އިނގިރޭސިވިލާތުގެ ހާލަތު މިހާރަށް ވުރެ ރަނގަޅު ކުރަން ޖެހޭ ކަމަށާއި، ކުރިއަށް އޮތް 10 އަހަރު ދުވަހަށް އަމާޒު ކޮށްގެން އެކުލަވާލާފައިވާ ހާއްސަ ޕްލޭނެއް ތަންފީޒު ކުރައްވާނެ ކަމަށެވެ.

ޑައުނިން ސްޓްރީޓްގެ ކުރިމަތީގައި ހުންނަވައި ދެއްވި ތަޤުރީރުގައި ބާންހަމް ވިދާޅުވީ، މިއީ އިނގިރޭސިވިލާތަށް އައި އައު ފެށުމެއް ކަމަށާއި، ދިރިއުޅުމުގެ ހަރަދުތައް ކުޑަ ކުރުމަށް އަޅާނެ ފިޔަވަޅު ތަކުގެ ތަފްސީލު އަންގާރަ ފެށިގެން ހާމަ ކުރައްވަން ފައްޓަވާނެ ކަމަށެވެ. މީގެ އިތުރުން، މަގުމަތީގައި ނިދާ މީހުން ނުވަތަ "ރަފް ސްލީޕިންގް" އެއްކޮށް ނައްތާލުމަށާއި، ކައުންސިލް ހައުސިންގް ނުވަތަ ސޯޝަލް ހައުސިންގެ ގިނަ މަޝްރޫއު ތަކެއް ކުރިއަށް ގެންދަވާނެ ކަމަށް ވެސް އޭނާ ވިދާޅުވި އެވެ.

ބާންހަމްގެ ސަރުކާރުގެ އެންމެ މުހިންމު އެއް ސިޔާސަތަކީ ވެސްޓްމިންސްޓާ އަށް ޖަމާވެފައިވާ ބާރުތައް ދޫކޮށްލައި، ޤައުމުގެ އެކި ސަރަހައްދު ތަކަށް ބާރުތައް ބަހާލުމެވެ. މި ބަދަލާއެކު ވޭލްސް، ސްކޮޓްލޭންޑް އަދި ނޮދަން އަޔަލެންޑް އަށް އިތުރު ބާރުތައް ލިބިގެން ދާނެ ގޮތްތަކާ ގުޅޭ ގޮތުން ކަމާ ބެހޭ މާހިރުން އަންނަނީ ދިރާސާ ކުރަމުންނެވެ. މި މަސައްކަތުގެ ދަށުން، ބޮޑު ވަޒީރުގެ އޮފީހުގެ ގޮތްޕެއް މެންޗެސްޓާގައި ޤާއިމުކުރުމަށް ރާވާފައިވާ "ނަމްބަރު 10 ނޯތު" ގެ މަސައްކަތްތައް މިހާރު ވެސް ފެށިފައިވާ ކަމަށް ބީބީސީ އަށް ވަނީ މައުލޫމާތު ލިބިފައި އެވެ.

ފާއިތުވި ހަތަރު އަހަރު ދުވަހުގެ ތެރޭގައި އިނގިރޭސިވިލާތުގެ ބޮޑު ވަޒީރުކަމާ ހަވާލުވެ ވަޑައިގެންނެވި ފަސް ވަނަ ބޭފުޅާގެ ގޮތުގައި ބާންހަމް މަގާމުގެ މަސްއޫލިއްޔަތުތަކާ ހަވާލުވެ ވަޑައިގެންނެވިއިރު، ހޯމަ ދުވަހުގެ ވަގުތެއްގައި ކެބިނެޓު އެކުލަވާލުމުގެ މަސައްކަތް ފައްޓަވާނެ އެވެ.

މިގޮތުން ވަޒީރުން އައްޔަން ކުރުމާއި، ބައެއް ވަޒީރުން މަގާމުން ވަކި ކުރުމުގެ މަސައްކަތް ކުރިއަށް ދާނެ އެވެ. ބާންހަމްގެ ކެބިނެޓުގައި ހިމެނޭނެ ބޭފުޅުންގެ މައުލޫމާތު އޭނާގެ ޓީމުން މިހާތަނަށް ސިއްރު ކޮށްފައިވާއިރު، މިއީ ވަރަށް ބޮޑަށް ރޭވިގެން ކުރިއަށްދާ މަސައްކަތެއް ކަމަށް ރިޕޯޓުތައް ބުނެ އެވެ.