ކުރިން ވެފައިވާ ވައުދާ ޚިލާފަށް، އިސްތިއުފާގެ ޝަރަފުގެ ލިސްޓެއް ނެރުއްވާނެ ކަމުގެ އިޝާރާތެއް ސްޓާމާ ދެއްވައިފި

އިނގިރޭސިވިލާތުގެ ބޮޑު ވަޒީރުގެ މަގާމުން ދުރުވެ ވަޑައިގަންނަވާއިރު، ރެޒިގްނޭޝަން އޮނާސް ނުވަތަ އިސްތިއުފާގެ ޝަރަފުގެ ލިސްޓެއް ނެރުއްވާނެ ކަމުގެ އިޝާރާތެއް ބޮޑު ވަޒީރު ކިއާ ސްޓާމާ ދެއްވައިފި އެވެ. 

މިއީ މީގެ ތިން އަހަރު ކުރިން އިދިކޮޅު ލީޑަރުގެ ގޮތުގައި ހުންނަވައި، އެފަދަ ލިސްޓެއް ނުނެރުއްވާނެ ކަމަށް ވިދާޅުވެ ވެވަޑައިގެންފައިވާ ވައުދާ ޚިލާފު ނިންމުމެކެވެ. 

ތުރުކީގައި ބޭއްވި ނޭޓޯ ސަމިޓުގައި ނޫސްވެރިން ކުރި ސުވާލު ތަކަށް ޖަވާބު ދެއްވަމުން ސްޓާމާ ވަނީ، އިސްތިއުފާފެ ޝަރަފުގެ ލިސްޓެއް ނެރުއްވުމާ މެދު ސީދާ ޖަވާބެއް ދެއްވަން ދެ ފަހަރެއްގެ މަތިން އިންކާރު ކުރައްވައިފަ އެވެ. އޭނާ ވިދާޅުވީ އެކަމާ މެދު އާންމު އުސޫލުން ކަންކަން ކުރިއަށްދާ ގޮތް ބައްލަވާނެ ކަމަށެވެ. 

ކުރިއަށް އޮތް ދިހަ ވަރަކަށް ދުވަހުގެ ތެރޭގައި ސްޓާމާ ބޮޑު ވަޒީރުގެ މަގާމުން ދުރަށް ވަޑައިގަންނަވާނެ އެވެ. ސްޓާމާގެ ފަހުން ދެން ބޮޑު ވަޒީރުގެ މަގާމަށް ވަޑައިގަންނަވާނެ ކަމަށް ބެލެވެނީ، އެންޑީ ބާންހަމް އެވެ. 

މީގެ ކުރިން 2023 ވަނަ އަހަރު ސްޓާމާ ވަނީ ކުރީގެ ބޮޑު ވަޒީރު ރިޝީ ސުނާކް، ކުރީގެ ބޮޑު ވަޒީރު ބޮރިސް ޖޯންސަންގެ އިސްތިއުފާގެ ޝަރަފުގެ ލިސްޓަށް ހުއްދަ ދެއްވުމުން އެކަމަށް ވަރަށް ބޮޑަށް ފާޑު ވިދާޅުވެފައި އެވެ. އެފަހަރު ސްޓާމާ ވިދާޅުވެފައި ވަނީ، ޓޯނީ ބްލެއާ ފަދަ ބޭފުޅުން ވެސް އިސްތިއުފާގެ ޝަރަފުގެ ލިސްޓެއް ނެރުއްވާފައި ނުވާ ކަމަށާއި، ސިޔާސީ ގާތް ބޭފުޅުންނަށް "ނައިޓްހުޑް" ފަދަ ޝަރަފުތައް ދިނުމަކީ ބަލައި ގަނެވޭނެ ކަމެއް ނޫން ކަމަށެވެ. 

އެކަމަށް ވަރަށް ބޮޑަށް ފާޑު ވިދާޅުވެ، ސްޓާމާ ވަނީ އޭނާގެ ފަރާތުން އެފަދަ ކަމެއް ނުފެންނާނެ ކަމަށް ވިދާޅުވެފައި އެވެ. އަދި އެކަން ނުކުރައްވާނެ ކަމަށް ސްޓާމާ ވަނީ ވައުދުވެ ވަޑައިގެންފައި އެވެ. 

އިނގިރޭސިވިލާތުގެ ސިޔާސީ އުސޫލުތައް އޮންނަ ގޮތުން، ބޮޑު ވަޒީރު ކަމުން ވަކިވާ ބޭފުޅުންނަށް އެ ބޭފުޅެއްގެ އަރިސް ބޭފުޅުންނަށް ޝަރަފު އެރުވުމަށް ނަން ހުށަހެޅުމުގެ ފުރުސަތު ލިބިގެންވެ އެވެ. ނަމަވެސް، މި ލިސްޓު ފާސް ކުރަން ޖެހެނީ އޭގެ ފަހުން އަންނަ ބޮޑު ވަޒީރަކާއި، ހައުސް އޮފް ލޯޑްސްގެ އެޕޮއިންޓްމަންޓްސް ކޮމިޝަން އިންނެވެ. 

މީގެ ކުރިން އެންމެ 49 ދުވަހު ބޮޑު ވަޒީރުގެ މަގާމުގައި ހުންނެވުމަށް ފަހު ލިޒް ޓްރަސް އިސްތިއުފާ ދެއްވިއިރު ވެސް، ސުނާކް ވަނީ އޭނާގެ އިސްތިއުފާގެ ޝަރަފުގެ ލިސްޓަށް ހުއްދަ ދެއްވައިފަ އެވެ. 

ލޭބާ ޕާޓީގެ ލީޑަރުގެ މަގާމާއި، ބޮޑު ވަޒީރުގެ މަގާމުން އިސްތިއުފާ ދެއްވާނެ ކަމަށް ސްޓާމާ އިއުލާން ކުރައްވާފައިވާއިރު، އައު ލީޑަރަކު ހޮވުމަށް ހުޅުވާލި ފުރުސަތުގައި މިހާތަނަށް ކުރިމަތި ލެއްވީ ބާންހަމް އެކަންޏެވެ. ބާންހަމް ވަނީ ޤާނޫނު ހަދާ މަޖިލީހުގެ ލޭބާ ޕާޓީގެ 322 މެމްބަރުންގެ ތާއީދު ހޯއްދަވައިފަ އެވެ. އެއާ އެކު، ބޮޑު ވަޒީރު ކަަމަށް ބާންހަމް ވަޑައިގަންނަވާނެކަން ވަނީ ގާތް ގަނޑަކަށް ކަށަވަރުވެފައި އެވެ.

ބާންހަމް އަށް ތާއީދު ކުރެއްވި ބޭފުޅުންގެ ތެރޭގައި ސްޓާމާގެ ސަރުކާރުގައި ހިމެނޭ މެމްބަރުން ވެސް ހިމެނެ އެވެ. އެގޮތުން ނައިބު ބޮޑު ވަޒީރު ޑޭވިޑް ލެމީ އާއި، ޗާންސެލަރު ރޭޗަލް ރީވްސް އާއި، އެނާޖީ މިނިސްޓަރު އެޑްވާޑް މިލިބޭޭންޑް އަދި ކުރީގެ ނައިބު ބޮޑު ވަޒީރު އެންޖެލާ ރޭނާ ފަދަ ބޭފުޅުން ހިމެނެ އެވެ. 

މިއީ ލޭބާ ޕާޓީގެ ލީޑަރުގެ މަގާމަށް ބާންހަމް ވާދަ ކުރައްވާ ތިން ވަނަ ފަހަރެވެ. މީގެ ކުރިން 2010 ވަނަ އަހަރާއި، 2015 ވަނަ އަހަރު ވެސް އޭނާ ވަނީ ލޭބާ ޕާޓީގެ ލީޑަރުގެ މަގާމަށް ވާދަ ކުރައްވައިފަ އެވެ.