މުއްސަނދިންގެ އަތުން ނަގާ ޓެކްސް ބޮޑު ކުރުމަށް އެދި، 120 މިލިއަނަރުން ބޮޑުވަޒީރު ބާންހަމް އަށް ގޮވާލައިފި
25 ޖުލައި 2026 | ހޮނިހިރު 06:11ބުރާސްފަތި ދުވަހު "ޕްރައުޑް ޓު ޕޭ" ނުވަތަ ޓެކްސް ދެއްކުމަށް ފަހުރުވެރިވާކަން ހާމަކޮށް ނެރުނު ސިޓީއެއްގައި، މަޝްހޫރު ކުޅިވަރު ބްރޯޑްކާސްޓަރު ގޭރީ ލިނެކާ އަދި ބަތަލާ ޖޫލިއާ ޑޭވިސް ހިމެނޭހެން ގިނަ އަދަދެއްގެ މިލިއަނަރުން ވަނީ ބޮޑު ވަޒީރު ބާންހަމް އަށް ސާފު މެސެޖެއް ދީފައި. އެ ސިޓީގައި ބުނެފައި ވަނީ އެމީހުންނަކީ މިލިއަނަރުން ކަމަށާއި، އެމީހުންގެ އަތުން ޓެކްސް ނެގުމަށް އެދޭ ކަމަށް. އަދި އެއީ ގައުމުގައި ދެމި ތިބެ ޓެކްސް ދެއްކުމަށް ފަހުރުވެރިވާ ބައެއް ކަމަށް ވެސް ބުނެފައިވޭ
އިނގިރޭސިވިލާތުގެ ކެބިނެޓު ބައްދަލުވުމުގައި ބޮޑުވަޒީރު އެންޑީ ބާންހަމް ބައިވެރިވެ ވަޑައިގަންނަވަނީ | ގެޓީ އިމޭޖަސް
އިނގިރޭސިވިލާތުގެ މުއްސަނދިންގެ އަތުން ނަގާ ޓެކްސް ބޮޑު ކުރުމަށް ގޮވާލައި، އެ ޤައުމުގެ 120 މިލިއަނަރުން ހިމެނޭ ގުރޫޕަކުން އެ ޤައުމުގެ ބޮޑުވަޒީރު އެންޑީ ބާންހަމް އަށް ގޮވާލައިފި އެވެ.
މުއްސަނދިންގެ މި ގުރޫޕުން ބުނަމުން ދަނީ އާންމު ރައްޔިތުންނަށްޓަކައި އަލުން އިންވެސްޓް ކުރުމަށްޓަކައި، އިތުރަށް ޓެކްސް ދެއްކުމަށް ތިބީ ތައްޔާރަށް ކަމަށެވެ.
ބުރާސްފަތި ދުވަހު "ޕްރައުޑް ޓު ޕޭ" ނުވަތަ ޓެކްސް ދެއްކުމަށް ފަހުރުވެރިވާކަން ހާމަކޮށް ނެރުނު ސިޓީއެއްގައި، މަޝްހޫރު ކުޅިވަރު ބްރޯޑްކާސްޓަރު ގޭރީ ލިނެކާ އަދި ބަތަލާ ޖޫލިއާ ޑޭވިސް ހިމެނޭހެން ގިނަ އަދަދެއްގެ މިލިއަނަރުން ވަނީ ބޮޑުވަޒީރު ބާންހަމް އަށް ސާފު މެސެޖެއް ދީފައި އެވެ. އެ ސިޓީގައި ބުނެފައި ވަނީ އެމީހުންނަކީ މިލިއަނަރުން ކަމަށާއި، އެމީހުންގެ އަތުން ޓެކްސް ނެގުމަށް އެދޭ ކަމަށެވެ. އަދި އެއީ ގައުމުގައި ދެމި ތިބެ ޓެކްސް ދެއްކުމަށް ފަހުރުވެރިވާ ބައެއް ކަމަށް ވެސް ބުނެފައިވެ އެވެ.
"ޕޭޓްރިއޮޓިކް މިލިއަނާސް" ގެ ނަމުގައި ހަރަކާތްތެރިވާ މި ގްރޫޕުން ބުނި ގޮތުގައި، މުއްސަނދިކަމާއި ބާރުތައް މަދު ބައެއްގެ އަތް މަތީގައި އޮންނަތާ މާ ގިނަ ދުވަސްވެއްޖެ ކަމަށެވެ. މީގެ ސަބަބުން ގައުމަށާއި، ރައްޔިތުންނަށް، ޑިމޮކްރަސީ އަށް އަދި ތިމާވެއްޓަށް ވެސް ގެއްލުން ވަމުންދާ ކަމަށް އެމީހުން ފާހަގަކުރި އެވެ.
މީގެ އިތުރުން އިނގިރޭސިވިލާތް ރަނގަޅު ކުރުމަށްޓަކައި މިކަން ބަދަލުވާން ޖެހޭ ކަމަށާއި، މުއްސަނދިންގެ އަތުން ނަގާ ޓެކްސް ބޮޑު ކޮށްގެން ލިބޭ ފައިސާ، މުޖުތަމައުގެ ތަފާތު ކުރުންތައް ކުޑަ ކުރުމާއި، އާންމު އިންފްރާސްޓްރަކްޗާ ވަރުގަދަ ކުރުމާއި، ކުދި ވިޔަފާރިތަކަށް އެހީވުމަށް ބޭނުން ކުރެވިދާނެ ކަމަށް އެ ގްރޫޕުން ބުނެ އެވެ.
އިނގިރޭސި ގައުމީ ފުޓުބޯޅަ ޓީމުގެ ކުރީގެ ކެޕްޓަން ގޭރީ ލިނެކާ ބުނި ގޮތުގައި، އާންމު ރައްޔިތުންގެ ދިރިއުޅުމުގެ ޚަރަދުތައް ހަމަޖެއްސުމަށް ދަތިތަކާ ކުރިމަތި ލަމުންދާއިރު، ގައުމުގެ އެންމެ މުއްސަނދި މީހުންނަށް މިއަށް ވުރެ ބޮޑު އެހީތެރި ކަމެއް ފޯރުކޮށްދެވޭނެ ފޯރުންތެރިކަން އެބަހުރި ކަމަށެވެ. އިންސާފުވެރި މިންވަރަކަށް ޓެކްސް ދެއްކުމަކީ އިނގިރޭސިން ގަބޫލުކުރާ އަސާސީ އުސޫލެއް ކަމަށާއި، ނަމަވެސް އާންމު ގިނަ ރައްޔިތުން މިހާރު ވެސް ދައްކަމުން ދަނީ އެމީހުންގެ އަތް ނުފޯރާ ވަރުގެ ބޮޑު ޓެކްސެއް ކަމަށް އޭނާ ބުނެފައިވެ އެވެ.
މި ސިޓީއާ ގުޅޭ ގޮތުން ޓްރެޒަރީގެ ޗީފް ސެކްރެޓަރީ އެމާ ރޭނޮލްޑްސް ބުރާސްފަތި ދުވަހު ވިދާޅުވީ، މުއްސަނދިން އަމިއްލަ އަށް އިތުރަށް ޓެކްސް ދައްކަން ބޭނުންވުމަކީ އުފާކުރާ ކަމެއް ކަމަށެވެ. ނަމަވެސް ސަރުކާރުގެ ސިޔާސަތަށް ބަދަލެއް ގެންނާނެ ކަމުގެ ސީދާ އިޝާރާތެއް އޭނާ ނުދެއްވަ އެވެ. ރޭނޮލްޑްސް ވިދާޅުވީ، މިއީ އައު ސަރުކާރުގެ ހަތަރު ވަނަ ދުވަސް ކަމަށާއި، ޓެކްސް އަށް ގެންނަ ބޮޑެތި ބަދަލުތައް އިއުލާން ކުރާނީ ބަޖެޓު ހުށަހަޅާއިރު ކަމަށެވެ.
ބޮޑުވަޒީރު ބާންހަމް މީގެ ކުރިން ވިދާޅުވެފައި ވަނީ، ދިރިއުޅުމުގެ ޚަރަދުތައް ބޮޑުވަމުންދާ މައްސަލަ އަށް ހައްލެއް ހޯދުމަށްޓަކައި "މުއްސަނދިންގެ އަތުން ކުޑަ މިންވަރެއް އިތުރަށް" ބޭނުން ވެދާނެ ކަމަށެވެ. މީގެ ތެރޭގައި "ވެލްތު ޓެކްސް" ނުވަތަ މުއްސަނދި ކަމުގެ މައްޗަށް ނަގާ ޓެކްސް ހިމެނިދާނެ ކަމަށް އޭނާ ވަނީ އިޝާރާތް ކުރައްވާފައި އެވެ.
އިޤްތިޞާދީ މާހިރުން ކަމަށްވާ ގެބްރިއަލް ޒުކްމަން އަދި ބެން ޓިޕެޓް ނެރުނު ރިޕޯޓެއްގައިވާ ގޮތުން، 100 މިލިއަން ޕައުންޑަށް ވުރެ ގިނައިން މިލްކިއްޔާތައި ހުރި މީހުންގެ އަތުން އަހަރަކު ދެ އިންސައްތައިގެ ޓެކްސެއް ނަގައިފި ނަމަ، އަހަރަކު 10 ބިލިއަން ޕައުންޑު ދައުލަތަށް ލިބޭނެ އެވެ. އަދި "ޕޭޓްރިއޮޓިކް މިލިއަނާސް" ގްރޫޕުން ބުނާ ގޮތުގައި، 10 މިލިއަން ޕައުންޑަށް ވުރެ މަތީގެ މިލްކިއްޔާތުން ދެ އިންސައްތަ ޓެކްސް ނަގައިފި ނަމަ، އަހަރަކު 24 ބިލިއަން ޕައުންޑު ލިބޭނެ އެވެ.
މީގެ އިތުރުން ކެޕިޓަލް ގޭންސް ޓެކްސް އަށް ބަދަލު ގެނެސްގެން އިތުރު 12 ބިލިއަން ޕައުންޑު ހޯދި ދާނެ ކަމަށް ވެސް އެ ގްރޫޕުން ލަފާ ކުރެ އެވެ.
މަސްދަރު: އަލް ޖަޒީރާ
