ހޯމަ ދުވަހު އާންމު ކުރި ރެކޯޑިންތަކުގައި ބައިޑަންގެ ހަނދާނުގެ މައްސަލަ ހުންނާތީ ނަންތައް ނޯޓުކޮށްގެން އުޅުއްވި ކަމާއި، ސިއްރު ލިޔެ ކިޔުންތަކެއް ގޭގައި ބެހެއްޓެވި ކަމުގެ ވާހަކަތައް!

އެމެރިކާގެ ކުރީގެ ރައީސް ޖޯ ބައިޑަންގެ ހަނދާން ބަލިވުމާ ގުޅޭ ކަންބޮޑުވުންތަކާއި، ސިއްރު ލިޔެކިޔުންތަކާ ބެހޭ ގޮތުން އޭނާ ދައްކަވާފައިވާ ވާހަކަަތައް ހިމެނޭ ދެ ގަޑިއިރަށް ވިރެ ދިގު އޯޑިއޯ ރެކޯޑިންތަކެއް ހޯމަ ދުވަހު އާންމު ކޮށްފި އެވެ.

މި ރެކޯޑިންތަކަކީ ބައިޑަންގެ ހަނދާނީ ފޮތް ލިޔުއްވި މާކް ޒްވޮނިޓްޒާ އާއެކު 2016 ވަނަ އަހަރުން، 2017 ވަނަ އަހަރަށް ބޭއްވި އިންޓަވިޔުތަކުގެ ރެކޯޑިންތަކެކެވެ. 

މި އިންޓަވިޔުގައި ބައިޑަން ވަނީ އޭނާގެ ގޭގައި ހުރި ބައެއް ނޯޓުތަކަކީ، ސިއްރު ލިޔެކިޔުން ތަކެއް ކަމަށް އިއުތިރާފުވެ ވަޑައިގެންފައި އެވެ. އެގޮތުން 2017 ވަނަ އަހަރުގެ އޭޕްރޯލް މަހު ބޭއްވި އިންޓަވިޔުއެއްގައި، ބައެއް ލިޔެ ކިޔުންތަކަކީ ކްލެސިފައިޑް ނުވަތަ ސިއްރު އެއްޗެހި ކަމަށް ވެދާނެ ކަމަށާއި، އެހެންވެ އެއަށް ސަމާލުވުމަށް ޒްވޮނިޓްޒާގެ ކިބައިން ބައިޑަން އެދިވަޑައިގެންނެވި އެވެ. 

މީގެ އިތުރުން 2009 ވަނަ އަހަރުގެ ލިޔުމަކަށް އިޝާރާތް ކުރައްވައި، ތިރީ ފަންގިފިލާ އިން ހުރިހާ ސިއްރު ލިޔެ ކިޔުންތަކެއް ފެނިފައިވާ ކަމަށް ވެސް، އެ ރެކޯޑިންގައި ބައިޑަން ވަނީ ވިދާޅުވެފައި އެވެ.

މި ރެކޯޑިންތަކުގައި ބައިޑަންގެ ހަނދާން ބަލިކަން ވަނީ ހާމަވެފައި އެވެ. އެގޮތުން އަފްޣާނިސްތާން އަށް ސިފައިން ފޮނުވުމާ ބެހޭ ގޮތުން ލިޔުއްވި މެމޯއެއްގެ ވާހަކަ ދައްކަވަމުން، އެއީ އިރާގަށް ފޮނުވި ސިފައިންގެ ވާހަކަ ކަމަށް ވިދާޅުވެ ބައިޑަން އަށް އޮޅުން އަރާފައިވެ އެވެ. މީގެ އިތުރުން، ވައިޓް ހައުސްގެ އިޤްތިޞާދީ މުޝީރުގެ ނަންފުޅުން ހަނދާން ނެތިގެން، ނަންތައް ހަނދާން ނެތޭތީ އެ ނަންތައް ލިޔުއްވައިގެން ގެން ގުޅެން ޖެހޭ ކަމަށް ވެސް ބައިޑަން ވިދާޅުވެފައިވެ އެވެ. 

މި ރެކޯޑިންތަކަކީ ބައިޑަންގެ އަމިއްލަ ގެއިން ފެނުނު ލިޔެކިޔުންތަކާ ގުޅިގެން 2023 ވަނަ އަހަރު ހިންގި ތަހުގީގުގައި ހެކީގެ ގޮތުގައި ބޭނުން ކުރި ތަކެއްޗެވެ. އެ ތަހުގީގަށް ފަހު ސްޕެޝަލް ކައުސެލް ރޮބަޓް ހާ ނިންމެވީ، ބައިޑަންގެ މައްޗަށް ދައުވާ ނުކުރުމަށެވެ. އޭނާ ވިދާޅުވީ، ބައިޑަން އަކީ ހަނދާން ބަލި، އޯގާތެރި، ދުވަސްވީ ބޭފުޅެއްގެ ގޮތުގައި ޖޫރީންނަށް ފެންނާނެތީ، ކުށް ސާބިތު ކުރުމަކީ ދަތި ކަމަކަށް ވާނެ ކަމަށެވެ. 

މި ރެކޯޑިންތައް އާންމު ކޮށްފައި ވަނީ ކޮންޒަވޭޓިވް ޖަމިއްޔާއެއް ކަމަށްވާ އޯވަސައިޓް ޕްރޮޖެކްޓުން މައުލޫމާތު ހޯދައި ލިބިގަތުމުގެ ހައްގުގެ ދަށުން ހުށަހެޅި މައްސަލައަކާ ގުޅިގެންނެވެ. މީގެ ކުރިން ބައިޑަންގެ ވަކީލުން ވަނީ މި ރެކޯޑިންތައް އާންމުވިޔަ ނުދިނުމަށް ކޯޓުގައި މަސައްކަތް ކޮށްފައި އެވެ. ނަމަވެސް މިދިޔަ ހަފުތާގައި ވަނީ އެ މައްސަލަ އަނބުރާ ގެންގޮސްފައި އެވެ.

ރެކޯޑިންތަކުގައި ކުރީގެ ރައީސް ބަރަކް އޮބާމާ އާއި ބައިޑަންއާ ދެމެދު އޮތް ނުތަނަވަސް ކަމުގެ ވާހަކަތައް ވެސް ހިމެނެ އެވެ. އިގްތިސާދީ ސިޔާސަތުތަކާ މެދު އޮތް ހިޔާލު ތަފާތުވުންތަކާ ހުރެ، އޮބާމާ ވަރަށް ބޮޑަށް ކޯފާވާ ކަމަށް ބައިޑަން ވިދާޅުވެފައިވެ އެވެ. އަދި އޮބާމާގެ ޓީމުން ސިލިކަން ވެލީގެ ކުންފުނިތަކުގެ ނުފޫޒުގައި ޖެހިފައިވާ ކަމަށް ވެސް ބައިޑަން ތުހުމަތު ކުރައްވާފައިވެ އެވެ.

މިކަމާ ގުޅިގެން ބައިޑަންގެ ތަރުޖަމާނު ޓީޖޭ ޑަކްލޯ ވިދާޅުވީ، މި ރެކޯޑިން ތަކަކީ ސިއްރުގެ ގޮތުގައި ބެހެއްޓުމަށް ޖަސްޓިސް ޑިޕާޓްމަންޓް އަށް ދީފައިވާ ތަކެތި ކަމަށެވެ. އަދި މި ތަކެތި އާންމު ކުރުމަކީ ސިޔާސީ ބޭނުމަކަށްޓަކައި ކުރި ކަމެއް ކަމަށް އޭނާ ތުހުމަތު ކުރެއްވި އެވެ. ނަމަވެސް ކޯޓުގެ ނިންމުމަށް ބައިޑަން އިހުތިރާމް ކުރައްވާ ކަމަށް ވެސް ތަރުޖަމާނު ވިދާޅުވި އެވެ. އާންމުކުރި ރެކޯޑިންތަކުގެ ބައެއް ބައިތައް ގައުމީ ސަލާމަތަށްޓަކައި ވަނީ އުނިކޮށްފައި އެވެ.