ޖޯޑަންގައި ހުންނަ އެމެރިކާގެ ބޭސްތަކަށް މިސައިލް ހަމަލާ ދީފައިވާ ކަމަށް އީރާން އިން ބުނެފި

ޖޯޑަންގައި ހުންނަ އެމެރިކާގެ އަސްކަރީ އަމާޒުތަކަށް ހަމަލާތަކެއް ދީފައިވާ ކަމަށް، އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ. 

އައިއާރުޖީސީއާ ހަވާލާދީ އީރާންގެ މީޑިއާތަކުގައި ބުނެފައި ވަނީ، ބުދަ ދުވަހުގެ ވަގުތެއްގައި ހަމަލާ ދީފައި ވަނީ ޖޯޑަންގައި ހުންނަ އެމެރިކާ ބޭސްގެ އެއަރ ބޭސް އާއި ސެންޓްރަލް ކޮމާންޑް (ސެންޓްކޮމް)ގެ މަރުކަޒަށެވެ. މި ހަމަލާތައް ދީފައި ވަނީ ބެލިސްޓިކް މިސައިލް ބޭނުންކޮށްގެންނެވެ. 

އީރާންގެ މީޑިއާތަކުގައި ބުނެފައި ވަނީ، މިއީ އީރާންއާ ދެކޮޅަށް ކުރިމަތި ކުރުވަމުން އަންނަ ބިރު ދެއްކުންތަކާއި، އެމެރިކާގެ ބާރުތަކުން އެ ޤައުމުގެ މަސްލަހަތުތަކަށް ކުރިމަތި ކުރަމުން އަންނަ ޤާނޫނީ ޚިލާފު އަދި ނުބައި ނުލަފާ އަމަލުތަކާ ދެކޮޅަށް ދިން ހަމަލާތަކެއް ކަމަށެވެ. 

އައިއާރުޖީސީ އިން އިތުރަށް ބުނެފައި ވަނީ، އެމެރިކާގެ އިސްވެރިންގެ ބިރު ދެއްކުންތަކާއި، އީރާންގެ މަސްލަހަތަށް ކުރިމަތި ކުރުވާ ޤާނޫނާ ޚިލާފު ކަންކަން ވަގުތުން ހުއްޓާލަން ޖެހޭ ކަަމަށެވެ. މި ހަމަލާގެ ސަބަބުން އީރާން އާއި އެމެރިކާއާ ދެމެދު އޮތް ނުތަނަވަސްކަން އިތުރަށް ބޮޑު ވެގެން ދާނެ ކަމަށް މަސްރަހު ދިރާސާ ކުރާ ފަރާތްތަކުން ދެކެ އެވެ. 

ޖޯޑަންގައި އެމެރިކާާގެ އަސްކަރީ ބާރުތަކުގެ ހަނގުރާމައިގެ މުހިންމު މަރުކަޒުތަކާއި، ބޭސްތައް ހުންނައިރު، މި ސަރަހައްދުގައި އެމެރިކާގެ އަސްކަރީ އޮޕަރޭޝަންތައް ހިންގުމުގައި އެ މަރުކަޒުތަކުން މުހިންމު ދައުރެއް އަދާ ކުރެ އެވެ. އީރާން އިން މިފަދަ ހަމަލާތަކެއް ދީފައިވާ ކަމަށް ބުނެފައިވާއިރު، މިކަމާ ގުޅޭ ގޮތުން އެމެރިކާ އިން މިހާތަނަށް ވަކި އެއްޗެއް ބުނެފައި ނުވެ އެވެ.