އީރާނުގެ އަސްކަރިއްޔާ: އީރާނުގެ އުޅަނދުފަހަރަށް އެމެރިކާއިން ދޭ އިންޒާރުތަކަށް ރައްދު ދޭނެ
28 ޖުލައި 2026 | އަންގާރަ 06:15އީރާނުގެ އުޅަނދުފަހަރަށް އެމެރިކާއިން އިންޒާރުދީ، ކަނޑުގެ މަގުން ހިސާރުކުރަން އުޅޭ ކަމަށް ބުނެ އެ ގައުމުގެ އަސްކަރިއްޔާއިން ވަރުގަދަ ރައްދެއް ދޭނެ ކަމުގެ އިންޒާރު ދީފި. އެމެރިކާގެ އަމަލުތަކަކީ ސަރަހައްދީ ހަމަޖެހުމަށް އޮތް ނުރައްކަލެއް ކަމަށް ބުނެ، އެމެރިކާއިން ކަނޑުގެ ދަތުރުފަތުރަށް ހުރަސްއަޅާތީ އީރާނުން ވަނީ ހުރްމުޒް ކަނޑުއޮޅި ބަންދުކޮށްފައި
އީރާނާ ދެކޮޅަށް އެމެރިކާއިން އަޅާފައިވާ ކަނޑުގެ ބްލޮކޭޑް ނުވަތަ ހުރަސްއެޅުމުގެ ސިޔާސަތު ތަންފީޒު ކުރުމުގެ ގޮތުން، އެމެރިކާގެ މަނަވަރު "ޔޫއެސްއެސް ފްރޭންކް އީ. ޕީޓަސަން ޖޫނިއާ" (DDG 121) އަރަބި ކަނޑުގައި ފޯރިމަރަނީ | ސެންޓްކޮމް
އީރާނުގެ ވިޔަފާރި އުޅަނދުފަހަރާއި ތެޔޮ ޓޭންކަރުތަކަށް ކުރިމަތިކުރާ އެއްވެސް އިންޒާރަކަށް ރައްދު ނުދީ ދޫކޮށްނުލާނެ ކަމަށް އީރާނުގެ އަސްކަރިއްޔާގެ އެންމެ މަތީ އޮޕަރޭޝަނަލް ކޮމާންޑުން އެމެރިކާއަށް އިންޒާރު ދީފި އެވެ. މިއީ ވޮޝިންޓަނުން އީރާނާ ދެކޮޅަށް ކުރަމުންދާ އުދުވާނީ ހަނގުރާމަ ވަރުގަދަކޮށް، އެ ގައުމާ ދެކޮޅަށް ގާނޫނާ ހިލާފަށް ކަނޑުގެ ބްލޮކޭޑެއް ނުވަތަ ދަތުރުފަތުރު ހުއްޓުވުމުގެ ހިސާރު އެޅުމަށް މަސައްކަތް ކުރަމުންދާ ދަނޑިވަޅެއްގައި ދީފައިވާ އިންޒާރެކެވެ.
ހޯމަ ދުވަހު ނެރުނު ބަޔާނެއްގައި، ޚާތަމް އަލް-އަންބިޔާ ސެންޓްރަލް ހެޑްކުއާޓާޒް އިން ވަނީ މުޅި ސަރަހައްދުގައި އެމެރިކާއިން ހިންގަމުންދާ ނުބައި އަމަލުތަކާއި، ސަލާމަތީ ނުރައްކާތައް ކުށްވެރިކޮށްފަ އެވެ.
އެ ބަޔާނުގައި ފާހަގަކޮށްފައިވާ ގޮތުގައި، ވޭތުވެދިޔަ ތިން ދުވަހު އެމެރިކާގެ ސިފައިން ވަނީ އީރާނުގެ އައްސޭރިފަށުގެ ސަރަހައްދުތަކާއި ކަނޑުގެ ސަރަހައްދުގައި ދަތުރުކުރަމުންދިޔަ އީރާނުގެ އުޅަނދުފަހަރަށް އިންޒާރު ދީފަ އެވެ. މިއީ އީރާނާ ދެކޮޅަށް ކަނޑުގެ މަގުން ހިސާރު އެޅުމަށް އެމެރިކާއިން ކުރަމުންދާ ގާނޫނާ ހިލާފު މަސައްކަތްތަކުގެ ތެރެއިން ހިންގި އަމަލެކެވެ.
"އެމެރިކާގެ މި އަމަލަކީ މި ސަރަހައްދުގައި ހަނގުރާމަ ފުޅާކުރުން ކަމުގައި ބެލެވޭ،" އެ ބަޔާނުގައި ބަޔާންކޮށްފައިވެ އެވެ. "އީރާނުގެ ހަތިޔާރު އެޅި ސިފައިން ހަނގުރާމައިގެ މައިދާނުގައި ސާބިތުކޮށްދީފައިވާ ފަދައިން، އެމެރިކާގެ ޓެރަރިސްޓް އަސްކަރިއްޔާއިން ކުރިމަތިކުރާ އެއްވެސް އިންޒާރެއް ނުވަތަ ނުބައި އަމަލެއް ރައްދު ނުދީ ދޫކޮށްނުލާނެ ކަމަށާއި، އެކަންކަމާ ސާބިތުކަމާއެކު ކުރިމަތިލާނެ." ކަމަށްވެސް ބަޔާނުގައިވެ އެވެ.
އީރާނުގެ މި މަރުކަޒީ އިދާރާއިން ވަނީ ބޭރުގެ ނުފޫޒުތަކާއި ކުރިމަތިކުރާ ގޮންޖެހުންތަކާ ދެކޮޅަށް، އެ ގައުމުގެ މިނިވަންކަމާއި ކަނޑުގެ ސަރަހައްދުގެ ހައްގުތައް ދިފާއުކުރުމުގައި އީރާނުން ސާބިތުކަންމަތީ ދެމިއޮންނާނެ ކަމުގެ ޔަގީންކަން އަލުން ދީފަ އެވެ.
ގައުމީ މަސްލަހަތު ހިމާޔަތްކުރުމަށާއި، ކުރިމަތިވާ އުދުވާންތަކަށް އެކަށީގެންވާ ރައްދު ދިނުމުގެ ގާބިލުކަމާއި އަޒުމް އީރާނުގެ ކިބައިގައި ހުރިކަން އެ ގައުމުން ވަނީ ތަކުރާރުކޮށް ސާބިތުކޮށްދީފައެވެ. އަދި ބޭރުގެ ބާރުތަކުން ހަމަނުޖެހުން އުފެއްދުމަށް މަސައްކަތް ކުރި ނަމަވެސް، ސަރަހައްދީ ހަމަޖެހުމަށް ބުރޫ އެރުވުމުގެ ފުރުސަތު ނުދޭނެ ކަމަށްވެސް ބުނެފައިވެ އެވެ.
އީރާނުން މި އިންޒާރު ދީފައިވަނީ، ބައިނަލްއަގުވާމީ ގާނޫނުތަކާ ހިލާފަށް އެމެރިކާއިން އީރާނަށް ފިއްތުންތައް ކުރިމަތިކުރަމުންދާ ދަނޑިވަޅެއްގަ އެވެ. އީރާނުން ބުނާ ގޮތުގައި އެމެރިކާގެ މި އަމަލުތަކަކީ ބައިނަލްއަގުވާމީ ގާނޫނުތަކާ ކަނޑައެޅިގެން ހިލާފު، އަދި ހުޅަނގު އޭޝިއާގެ ސުލްހަޔާއި ސަލާމަތަށް އޮތް ސީދާ ނުރައްކަލެކެވެ.
އީރާނުގެ އަސްކަރިއްޔާ އޮތީ އެ ގައުމުގެ ކަނޑުގެ ސަރަހައްދާއި ވިޔަފާރި އުޅަނދުތައް ދަތުރުކުރާ މަގުތައް ދިފާއުކުރުމަށް ފުރިހަމައަށް ތައްޔާރުވެގެންނެވެ.
މިދިޔަ ފެބްރުއަރީ މަހުގެ 28 ވަނަ ދުވަހުން ފެށިގެން އެމެރިކާއާއި އިސްރާއީލުން އީރާނާ ދެކޮޅަށް ހިންގަމުންދާ އުދުވާންތަކާ ގުޅިގެން އުފެދިފައިވާ ނުތަނަވަސްކަން ނިމުމަކަށް ގެނައުމަށްޓަކައި، އީރާނާއި އެމެރިކާއާ ދެމެދު މިދިޔަ މަހު ވަނީ ފަހުމުނާމާއެއްގައި ސޮއިކޮށްފަ އެވެ.
މި ފަހުމުނާމާގެ ދަށުން، 60 ދުވަހުގެ މުއްދަތަށް އެއްވެސް ފީއަކާ ނުލައި ކަނޑުއޮޅި މެދުވެރިކޮށް އުޅަނދުފަހަރަށް ދަތުރުކުރުމުގެ ހުއްދަ ދިނުމަށް އީރާނުން އެއްބަސްވި އެވެ.
މި އެއްބަސްވުމާ އެއްގޮތަށް، އީރާނުން ވަނީ އުޅަނދުފަހަރު ދަތުރުކުރުމަށް ހާއްސަ ކަނޑުގެ މަގެކެއް ކަނޑައަޅައި، ގާނޫނާ ހިލާފު މަގުތަކުން ދަތުރު ނުކުރުމަށް އިންޒާރު ދީފަ އެވެ.
ނަމަވެސް، އެމެރިކާއިން ދަނީ ގާނޫނާ ހިލާފު މަގަކުން އުޅަނދުފަހަރު ދަތުރުކުރުމަށް އެހީތެރިވަމުންނެވެ. މިއާއެކު، ސަރަހައްދީ ކަނޑުގެ ދަތުރުފަތުރަށް އެމެރިކާއިން ހުރަސްއެޅުން ހުއްޓާލަންދެން، އީރާނުން ވަނީ އެ ކޮރިޑޯ ބަންދުކޮށްފަ އެވެ.
