އެމެރިކާއާއި ސައުދީ އަރަބިއްޔާ ގުޅިގެން އިރާގަށް ދިން ވައިގެ ހަމަލާތައް އީރާނުން ވަރަށް ހަރުކަށި އިބާރާތުން ކުށްވެރިކޮށްފި

އެމެރިކާއާއި ސައުދީ އަރަބިއްޔާ ގުޅިގެން އިރާގަށް ދިން ވައިގެ ހަމަލާތައް އީރާނުގެ ފޮރިން މިނިސްޓްރީން ވަރަށް ހަރުކަށި އިބާރާތުން ކުށްވެރިކޮށްފި އެވެ.

ތެހެރާނުން ބުނި ގޮތުގައި މި ހަމަލާތަކަކީ ބަޣުދާދުގެ އިސްތިގުލާލަށް އަރައިގަތުމުގެ ސާފު އަމަލެއްގެ އިތުރުން، ސަރަހައްދީ ހަނގުރާމަ ފުޅާކުރުމަށް ވޮޝިންޓަނާއި ޒަޔަނިސްޓް އިސްރާއީލުން ގަސްތުގައި ކުރި މަސައްކަތެކެވެ.

ބުދަ ދުވަހު ނެރުނު ބަޔާނެއްގައި، އީރާނުގެ ފޮރިން މިނިސްޓްރީން ވަނީ އިރާގުގެ ރަސްމީ ދައުލަތުގެ މުއައްސަސާތަކަށާއި، އަރްބައީން ހިނގާލުމުގައި ބައިވެރިވާ ފަރާތްތަކަށް ޚިދުމަތް ދިނުމަށް ހާއްސަކޮށްފައިވާ ސްޓޭޝަންތަކަށް އަމާޒުކޮށް ދިން ހަމަލާތަކަކީ "ޖަރީމާއެއް" އަދި "އިންސާނިއްޔަތާ ހިލާފު" އަމަލެއްގެ ގޮތުގައި ފާހަގަކޮށްފަ އެވެ.

"އެމެރިކާއާއި ސައުދީ އަރަބިއްޔާއިން އިރާގުގެ އެކި ސަރަހައްދުތަކަށް ދިން އުދުވާނީ ހަމަލާތައް، އިސްލާމީ ޖުމްހޫރިއްޔާ އީރާނުގެ ފޮރިން މިނިސްޓްރީން އެންމެ ހަރުކަށި އިބާރާތުން ކުށްވެރިކުރަން،" އެ ބަޔާނުގައި ވެއެވެ.

އީރާނުގެ ޚާރިޖީ ވުޒާރާއިން މި ބޮން އެޅުން ސިފަކޮށްފައިވަނީ "އިރާގުގެ ގައުމީ އިސްތިގުލާލާއި ސަރަހައްދީ އިސްތިގުލާލަށް ދިން ފާޅުކަން ބޮޑު އުދުވާނެއް" އަދި "އދ. ގެ ޗާޓަރުގެ 2 ވަނަ މާއްދާގެ 4 ވަނަ ނަންބަރާއި ބައިނަލްއަގުވާމީ ގާނޫނުތަކުގެ އަސާސީ އުސޫލުތަކާ ކަނޑައެޅިގެން ޚިލާފު" އަމަލެއްގެ ގޮތުގަ އެވެ.

މި ހަމަލާތަކަކީ ހުޅަނގު އޭޝިއާ ސަރަހައްދުގައި ހަނގުރާމައާއި ހަމަނުޖެހުން ފުޅާކުރުމަށް އެމެރިކާއާއި ޒަޔަނިސްޓް އިސްރާއީލުން ގެންގުޅޭ ފިކުރާ އެއްގޮތަށް ދީފައިވާ ހަމަލާތަކެއް ކަމަށް ބުނެ ތެހެރާނުން ވަނީ އިންޒާރު ދީފަ އެވެ.

މި ހަމަލާތަކުގައި ޝަހީދުވި އިރާގުގެ ރައްޔިތުންގެ އާއިލާތަކަށް ފުން ތައުޒިޔާއެއް ފޮނުވަމުން، ފޮރިން މިނިސްޓްރީން ވަނީ އިރާގުގެ ސަރުކާރާއި ރައްޔިތުންނާއެކު އީރާނުން ސާބިތުކަމާއެކު އޮތްކަން އަލުން ކަށަވަރުކޮށްދީފަ އެވެ.

އަދި މި "ޖަރީމާ، އިންސާނިއްޔަތާ ހިލާފު އަދި ފިތުނަވެރި އަމަލުތަކުގެ" ސަބަބުން ކުރިމަތިވެދާނެ ނުރައްކާތެރި ނަތީޖާތަކުގެ ފުރިހަމަ މަސްއޫލިއްޔަތު އުފުލަންޖެހޭނީ "ހަނގުރާމައަށް ފެންބޮވައިގެންފައިވާ އެމެރިކާ ސަރުކާރާއި ސަރަހައްދުގައިވާ އެ ގައުމުގެ ބައިވެރިން" ކަމަށް އީރާނުން ބުނެފައިވެ އެވެ.

ބުދަ ދުވަހުގެ ފަތިހުގެ ވަގުތެއްގައި އެމެރިކާއާއި ސައުދީ ގުޅިގެން ދިން މި ވައިގެ ހަމަލާތައް އަމާޒުކޮށްފައިވަނީ އިރާގުގެ އެކި ޕްރޮވިންސްތަކުގައި ހުރި ހަޝްދުއްޝައުބީ (ޕޮޕިއުލާ މޮބިލައިޒޭޝަން ފޯސަސް) ގެ މަރުކަޒުތަކަށެވެ.

ޕެންޓަގަންއާއި ރިޔާޟުން މި ބޮން އެޅުން ދިފާއުކުރުމުގެ ގޮތުން، އެއީ "އީރާނަށް ތާއީދުކުރާ ޓެރަރިސްޓުން" ކަމަށް ބުނި ނަމަވެސް، ހަޝްދުއްޝައުބީއަކީ އިރާގުގެ ބޮޑުވަޒީރުގެ ސީދާ ކޮމާންޑުގެ ދަށުން ހިންގާ، ދައުލަތުން ގަބޫލުކުރާ އިރާގުގެ ގައުމީ ހަތިޔާރު އެޅި ފައުޖުތަކުގެ ރަސްމީ ބައެކެވެ. އެހެންކަމުން އެ ޖަމާއަތުގެ މަރުކަޒުތަކަށް ހަމަލާދިނުމަކީ އިރާގު ދައުލަތަށް ސީދާ ދިން ހަމަލާއެކެވެ.

ހަޝްދުއްޝައުބީގެ މީޑިއާ އޮފީހުން މައުލޫމާތު ދޭ ގޮތުގައި، އެއްވެސް އުސޫލެއް ނެތި ދިން މި އުދުވާނީ ހަމަލާތަކުގައި މިހާތަނަށް އިރާގުގެ 20 މީހުން ޝަހީދުވެފައިވެ އެވެ. އޭގެ ތެރޭގައި އަސްކަރީ ފަރާތްތަކާއި އާންމުން ހިމެނޭއިރު، އިތުރު 32 މީހަކު ވަނީ ޒަޚަމްވެފަ އެވެ.

ހަމަލާދިން ސަރަހައްދުތަކުގައި މީހުން ސަލާމަތްކުރުމުގެ މަސައްކަތް ކުރިއަށްދާއިރު، މަރުވި މީހުންގެ އަދަދު މިއަށްވުރެ އިތުރުވުން އެކަށީގެންވާ ކަމަށް އޮފިޝަލުން އިންޒާރު ދެއެވެ.

އެމެރިކާގެ ސެންޓްރަލް ކޮމާންޑާއި ސައުދީގެ ދިފާއީ ވުޒާރާއިން ބުނެފައިވަނީ، މި ހަމަލާތަކަކީ އެމެރިކާގެ ސިފައިންނަށާއި ސައުދީގެ ހަކަތަ އުފައްދާ ވަސީލަތްތަކަށް ޑްރޯން ބޭނުންކޮށްގެން ދިން ހަމަލާތަކަށް ރައްދު ދިނުމުގެ ގޮތުން ދިން "ސީދާ" ހަމަލާތަކެއް ކަމަށެވެ.

އިރާގުގެ ހަނގުރާމަވެރި ޖަމާއަތްތަކުން ސައުދީގެ ތެޔޮ މަރުކަޒުތަކަށް ހަމަލާދޭ ކަމަށް އެއްވެސް ހެއްކެއް ނެތި ރިޔާޟުން ތަކުރާރުކޮށް ތުހުމަތު ކުރަމުންދެ އެވެ.