ހަނގުރާމަތަކުގައި އިސްރާއީލް އިން ބޭނުންވާ ނަތީޖާ ނުނެރެވޭ، ފުރިހަމަ އަށް ފެއިލްވެއްޖެ: ސިފައިންގެ ބިއުރޯގެ ކުރީގެ ރައީސް

އިސްރާއީލް އިން ގިނަ ހަނގުރާމަތަަކެއްގައި ބައިވެރިވެއްޖެ ކަމަށާއި، އެ ހަނގުރާމަތަކުގައި އިސްރާއީލް އިން ބޭނުންވާ ނަތީޖާ ނުނެރެވި އެންމެ ފުރިހަމަ މިނުގައި ފެއިލްވެފައިވާ ކަމަށް، އެ ޤައުމުގެ ޑިފެންސް މިނިސްޓްރީގެ ސިޔާސީ ސިފައިންގެ ބިއުރޯގެ ކުރީގެ ރައީސް ޑްރޯ ޝަލޯމް ވިދާޅުވެއްޖެ އެވެ. 

އިސްރާއީލްގެ ޤައުމީ ސަލާމަތީ ދިރާސާތަކުގެ އިންސްޓިޓިއުޓުން ބޭއްވި ކޮންފަރެންސެއްގައި ދެއްވި އިންޓަވިޔުއެއްގައި ޝަލޯމް ވިދާޅުވީ، އެއްވެސް ހަނގުރާމައެއް ކާމިބުކަމާ އެކު ނިންމާލައި، ބޭނުންވި ނަތީޖާ ނެރެވިފައި ނުވާ ކަމަށެވެ. 

އެކަން ފާހަގަ ކުރައްވައި ޝަލޯމް ވިދާޅުވީ، ޣައްޒާގައި ހަރަކާތްތެރި ވަމުން އަންނަ ހަމާސް ޖަމާއަތް އަދިވެސް އޮތީ ވަރަށް ވަރުގަދަކޮށް ކަމަށާއި، ހިޒްބުﷲ ޖަމާއަތުގެ ހަތިޔާރުތައް އަތުލުމަކީ ނުވަތަ ހުއްޓުވުމަކީ ދުރު ކަމެއް ކަމަށެވެ. 

މީގެ އިތުރުން އީރާންއާ ގުޅޭ ގޮތުން އޭނާ ވިދާޅުވީ، އީރާންގެ ނިއުކްލިއާ ޕްރޮގްރާމް ކުޑަކޮށް ފަސް ކުރެވުނު ނަމަވެސް، އެ ޕްރޮގްރާމް އަދިވެސް ހިންގަމުން އަންނަ ކަމަށެވެ. އެއާ އެކު އޭނާ ވިދާޅުވީ، އިސްރާއީލްގެ ބައިނަލްއަޤުވާމީ ހައިސިއްޔަތު ރެކޯޑު މިންވަރަކަށް ދަށަށް ގޮސްފައިވާ ކަމަށާއި، އެމެރިކާ އާއެކު އޮތް ގުޅުން ވެސް އޮތީ އެންމެ ރަނގަޅު ޙާލަތުގައި ނޫން ކަމަށެވެ. 

މީގެ ކުރިން ބްރިގޭޑިއާ ޖެނަރަލެއްގެ ގޮތުގައި ވެސް ޚިދުމަތް ކުރައްވާފައިވާ ޝަލޯމް ވިދާޅުވީ، އިސްރާއީލްގައި ދެން އަންނަ ސަރުކާރަކުން ޖެހޭނީ ޣައްޒާގައި ހަމާސްގެ ކިބައިން ބަދަލެއް ހޯދުމާއި، ސީރިއާ އާއި ލުބުނާން އާއެކު ޑިޕްލޮމެޓިކް ގުޅުން ރަނގަޅު ކުރުމަށް ސަމާލުކަން ދޭން ކަމަށެވެ. 

އިސްރާއީލް އިން އަބަދު ވެސް އީރާންގެ ވެރިކަން ބަދަލު ކުރަން ބޭނުންވާއިރު، ޝަލޯމް ވިދާޅުވީ ވައިގެ މަގުން ހަމަލާތަކެއް ދީގެން އީރާންގެ ސަރުކާރުން ބަދަލު ކުރެވިދާނެ ކަމަށް ހީކޮށްގެން ނުވާނެ ކަމަށާއި، އެކަން އެހެން ނުވާނެ ކަމަށެވެ. 

ޝަލޯމް ވިދާޅުވީ ޣައްޒާ ހަނގުރާމައިގައި މިހާާތަނަށް އިސްރާއީލް އަށް ލިބުނު ހަމައެކަނި ކާމިޔާބީ އަކީ، ހަމާސް އިން ހައްޔަރު ކޮށްފައި ތިބި އިސްރާއީލްގެ ރައްޔިތުން މިނިވަން ކުރުން އެކަނި ކަމަަށެވެ. އެކަން ކުރެވުނީ ބޮޑު ވަޒީރު ބެންޖަމިން ނަތަންޔާހޫގެ ސަރުކާރާ ދެކޮޅު މުޒާހަރާތަކުގެ ސަބަބުން، އެމެރިކާ އިން އެކަމަށް ދިން ޚާއްސަ އިސްކަމެއްގެ ސަބަބުން ކަމަށް ވެސް ޝަލޯމް ވަނީ ވިދާޅުވެފައި އެވެ. 

އިސްރާއީލްގައި ނަތަންޔާހޫގެ މަޤުބޫލުކަން ވަރަށް ބޮޑަށް ދަށްވަމުން އަންނަ ކަމަށް މީޑިއާތަކުގައި ވަނީ ބުނެފައިވެ އެވެ. ޚާއްސަކޮށް ޣައްޒާ ހަނގުރާމައިގައި ނަތަންޔާހޫ އަށް އެތައް ޕްރެޝަރެއް ކުރިމަތިވި، އެތައް ބަޔަކު ސަރުކާރާ ދެކޮޅަށް މުޒާހަރާ ވެސް ކޮށްފައިވެ އެވެ.