ނުރައްކާތެރި އަސްކަރީ ބޮޑު އޮޕަރޭޝަނެއް ހިންގާ އީރާނުގެ ނިއުކްލިއާ މާއްދާތައް ވަގަށްނެގުމަށް ޕެންޓަގަން އިން ރާވަނީ

އީރާނުން މުއްސަނދިކޮށްފައިވާ ޔުރޭނިއަމްގެ ރަސްމީ ރިޒާވް ނުވަތަ ސްޓޮކް އަތުލައިގަތުމަށްޓަކައި، އަސްކަރީ ތާރީޚުގައިވެސް ހިންގާނެ އެންމެ އުނދަގޫ އަދި ވަރުގަދަ އޮޕަރޭޝަން ހިންގުމަށް އެމެރިކާގެ ދިފާއީ އިދާރާ، ޕެންޓަގަނުން ވިސްނަމުންދާ ކަމަށް ނިއުޔޯކް ޕޯސްޓުން ހޮނިހިރު ދުވަހު ރިޕޯޓްކޮށްފި އެވެ. އެ ނޫހުން މިކަން ހާމަކޮށްފައިވަނީ މިކަމުގެ މައުލޫމާތު އެނގޭ މަސްދަރުތަކާ ހަވާލާދީ އެވެ.

މިކަމާ ގުޅޭ މައުލޫމާތު އެނގޭ މަސްދަރަކުން އެ ނޫހަށް މައުލޫމާތު ދިން ގޮތުގައި، މި ރޭވުމުގެ ދަށުން އެތައް ހާސް އެއްގަމު ސިފައިންނެއް އީރާނުގެ ވަރުގަދަ ނިއުކްލިއާ މަރުކަޒުތަކަށް އަރައިގަންނާނެ އެވެ. އަދި އެ ތަންތަނުން ޔުރޭނިއަމްތައް ނެރުމުގެ މަސައްކަތް ކުރާނީ ހޮވާލެވިފައިވާ ކޮމާންޑޯންގެ ކުޑަ ޓީމަކުންނެވެ.

ނިއުކްލިއާ ހަތިޔާރު އުފެއްދުމަށް ބޭނުންކުރެވިދާނެ އީރާނުގެ މުއްސަނދިކޮށްފައިވާ ޔުރޭނިއަމް ހުރި ސީދާ ތަންތަން އަދި ސާފެއް ނުވެ އެވެ. އީރާނުގެ މައިގަނޑު ހަތަރު ނިއުކްލިއާ މަރުކަޒު ހުންނަނީ ފޯޑޯ، ނަތާންޒް، އިސްފަހާން އަދި ޕިކްއެކްސް ފަރުބަދައިގަ އަޑީގަ އެވެ. މީގެ ތެރެއިން ފުރަތަމަ ތިން ތަނަށް މިދިޔަ އަހަރު އެމެރިކާ އާއި އިސްރާއީލުން ވަނީ ހަމަލާދީފަ އެވެ. އީރާނުގައި ހުރި ކަމަށް ބެލެވޭ 440 ކިލޯގެ މުއްސަނދި ޔުރޭނިއަމްގެ ތެރެއިން ގާތްގަނޑަކަށް 200 ކިލޯ ހުރީ އިސްފަހާންގެ ބޭރުގައި ހުންނަ ފުން ބިންގަރާސްތަކެއްގައި ކަމަށް ބެލެވޭއިރު، ބާކީ ހުރި ބައި ހުރީ ނަތާންޒްގައި ކަމަށް ލަފާކުރެވެ އެވެ.

އީރާނުގެ ޚާރިޖީ ވަޒީރު އައްބާސް އަރަގްޗީ މާރިޗު މަހު ވިދާޅުވި ގޮތުގައި، އެމެރިކާ އާއި އިސްރާއީލުގެ ހަމަލާތަކުގައި ސުންނާފަތިވި މަރުކަޒުތަކުގެ "ކުނިތަކުގެ ދަށުގައި" އީރާނުގެ މުއްސަނދި ޔުރޭނިއަމްތައް އަދިވެސް އެބަހުއްޓެވެ. އަދި އެ ތަކެތި އަލުން ނެގުމުގެ ނުވަތަ ބޭނުންކުރުމުގެ އެއްވެސް ރޭވުމެއް މިވަގުތު އީރާނުން ނުގެންގުޅޭ ކަމަށްވެސް އޭނާ ވިދާޅުވި އެވެ.

ވަރުގަދަ ގްރެނައިޓް ހިލައިގެ ފަރުބަދައެއްގެ ފުނުގައި ހަދާފައިވާ ޕިކްއެކްސް މައުންޓަން މަރުކަޒަށް މިދިޔަ އަހަރުގެ ހަމަލާތަކުގައި ގެއްލުމެއް ނުލިބެ އެވެ. އެއީ އެ ދުވަސްވަރު އެތަނުގެ މަސައްކަތް ނުނިމި ހުރުމާއި، އެތަން އޭރު ހުސްކޮށް އޮތުމުން ކަމަށް ބެލެވެ އެވެ.

ނަމަވެސް، އޭގެ ފަހުން އެ މަރުކަޒު އިތުރަށް ވަރުގަދަކޮށްފައިވާ ކަމަށް ރިޕޯޓްތައް ބުނެއެވެ. އެމެރިކާ އާއި އިސްރާއީލުން ތުހުމަތުކުރާ ގޮތުގައި އީރާނުން ވަނީ އެތަނުގެ ބިމުގެ އަޑިއަށް ސެންޓްރިފިއުޖްތަކާއި ޔުރޭނިއަމްތައް ބަދަލުކޮށްފަ އެވެ. އެހެންނަމަވެސް، އެ މަރުކަޒު އަދި ފުރިހަމައަށް އޮޕަރޭޓް ކުރަން ފަށާފައިވާ ކަމަކަށް ނުބެލެވެ އެވެ.

ނިއުޔޯކް ޕޯސްޓުން ރިޕޯޓްކުރި ގޮތުގައި، އެމެރިކާގެ އާންމު ސިފައިންގެ ޒިންމާއަކީ އެ މަރުކަޒުތަކަށް އަރައިގަނެ، އެ ސަރަހައްދުގައި ދިފާއީ ފާރަވެރިންގެ ގޮތުގައި ތިބުމެވެ. އެ ވަގުތު، ސީލް ޓީމް 6 ގެ ސިލްވަރ ސްކޮޑްރަން އާއި، އާމީގެ 2 ވަނަ ރޭންޖަރ ބެޓާލިއަން އަދި 21 ވަނަ އޯޑްނަންސް ކޮމްޕެނީ ހިމެނޭ ކުޑަ ޓީމަކުން، ހަލާކުވެފައިވާ ފޯޑޯ އަދި އިސްފަހާން މަރުކަޒުން ޔުރޭނިއަމްތައް ނެރެ އުފުލުމުގެ މަސައްކަތް ކުރާނެ އެވެ.

މި އޮޕަރޭޝަނުގައި އީރާނުގެ އެއްގަމު ސިފައިންގެ ދީފާއުން ނެއްޓި، ބަންދުވެފައިވާ ބިންގަރާސްތަކުގެ ދޮރުތައް ހުޅުވަން ޖެހޭނެ އެވެ. އަދި އެމެރިކާގެ ހަނގުރާމަމަތީ ބޯޓުތަކުން އީރާނުގެ ވައިގެ ސަރަހައްދު ކޮންޓްރޯލްކޮށް، ޔުރޭނިއަމްތައް ބޭރަށް ގެންދިއުމަށް "އެއަރ ކޮރިޑޯ" އެއް ނުވަތަ ރައްކާތެރި ވައިގެ މަގެއް ގާއިމުކުރަން ޖެހޭނެ ކަމަށްވެސް ރިޕޯޓްގައިވެ އެވެ.

"މިހެން ބުނަން އުނދަގޫވި ނަމަވެސް، އީރާނުގެ ނިއުކްލިއާ މާއްދާތައް ނައްތާލުމަށް އޮތް އެންމެ ފުރުސަތު ބޮޑު ގޮތަކީ އަސްކަރީ އޮޕަރޭޝަނެއް ހިންގުން. ސަބަބަކީ މަޝްވަރާތަކުން އެދެވޭ ނަތީޖާއެއް ނުފެންނާތީ،" ސެންޓަރ ފޯ ސްޓްރެޓީޖިކް އެންޑް އިންޓަނޭޝަނަލް ސްޓަޑީޒްގެ ޑެޕިއުޓީ ޑައިރެކްޓަރ ޖޯސެފް ރޮޖާސް ނިއުޔޯކް ޕޯސްޓަށް ވިދާޅުވި އެވެ. ދުޝްމަނުންގެ ސަރަހައްދެއްގެ ފުނުގައި، ނުރައްކާތެރި އެތައް މަރުކަޒެއް ބަލަހައްޓަމުން މިފަދަ މަސައްކަތެއް ކުރުމަކީ އަސްކަރީ ތާރީޚުގައިވެސް ހިންގާނެ އެންމެ އުނދަގޫ އޮޕަރޭޝަނަށް ވެދާނެ ކަމަށް އޭނާ ފާހަގަކުރެއްވި އެވެ.

ރޮޖާސް އިތުރަށް ވިދާޅުވީ، މިއީ ލޮޖިސްޓިކް ގޮތުން ވަރަށް ބުރަ އަދި ނުރައްކާތެރި މާހައުލެއްގައި ކުރަންޖެހޭނެ ކަމެއް ކަމަށެވެ. އީރާނުގެ އަސްކަރިއްޔާ ބަލިކަށިވެފައިވީ ނަމަވެސް، އެމީހުންނަކީ ވެނެޒުއޭލާގެ ލީޑަރު ނިކޮލަސް މަދޫރޯ ބަލަހައްޓަން ތިބި ކިއުބާ ސިފައިންނަށްވުރެ މާ ހުށިޔާރު ބައެއް ކަމަށްވެސް އޭނާ ވިދާޅުވި އެވެ.

ނިއުޔޯކް ޓައިމްސްއިން މިދިޔަ މަހު ރިޕޯޓްކޮށްފައިވާ ގޮތުގައި، އީރާނުގެ ޔުރޭނިއަމްތައް ހުރީ ބިމުގެ އެހާ ފުނުގައި ކަމުން، އެމެރިކާގެ އެންމެ ވަރުގަދަ "ބަންކަރ-ބަސްޓަރ" ބޮންތަކުންވެސް އެތަކެތި ހަލާކެއް ނުކުރެވޭނެ އެވެ. އަދި އެ ތަކެތި ނެގުމަށް ހިންގާ އޮޕަރޭޝަނަކީ ބޮޑު ނުރައްކަލެއް އޮތް ކަމެއް ކަމަށް ވެސް ނޫހުން ވަނީ ބުނެފަ އެވެ.