އައްޑޫ ސިޓީގެ އިހްތިސާސުން ސަވާހިލި ވަކިކުރީ ރައްޔިތުންގެ މަޖިލީހުގެ ބައެއް މެންބަރުންގެ ނުފޫޒުން: ނިޒާރު
29 ޖުލައި 2026 | ބުދަ 07:08އައްޑޫ ސިޓީގެ އިހުތިސާސުން ސަވާހިލި ވަކިކުރީ މަޖިލިސް މެންބަރުންގެ ނުފޫޒުން ކަމަށް މޭޔަރު އަލީ ނިޒާރު ވިދާޅުވެއްޖެ. ކައުންސިލުން އެ ރަށް ތަރައްގީކުރަން ބީލަމަށް ހުޅުވާލާފައި ވަނިކޮށް ސަރުކާރުން މި ނިންމުން ނިންމީ މަޝްވަރާކުރުމެއް ނެތި ކަމަށްވާތީ، އެކަން މުރާޖައާކޮށް އެ ރަށް އަލުން އައްޑޫގެ އިހުތިސާސަށް ގެނައުމަށް މޭޔަރު ވަނީ ގޮވާލައްވާފައި
އައްޑޫ ސިޓީގެ މޭޔަރު އަލީ ނިޒާރު | އައްޑޫ ސިޓީ ކައުންސިލް
އައްޑޫ ސިޓީގެ އިހުތިސާސުން ސަވާހިލި ވަކިކުރީ ރައްޔިތުންގެ މަޖިލީހުގެ ބައެއް މެންބަރުންގެ ނުފޫޒުން ކަމަަށް އައްޑޫ ސިޓީގެ މޭޔަރު އަލީ ނިޒާރު ވިދާޅުވެއްޖެ އެވެ.
އައްޑޫ ސިޓީ ކައުންސިލުން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނިޒާރު ވިދާޅުވީ، ސަވާހިލި މައްސަލައިގައި ސަރުކާރުގެ ބައެއް އިސް ފަރާތްތަކާއެކު މަޝަވަރާތަކެއް ކުރެވުނު ކަމަށެވެ. އަދި އެ ފަރާތްތަކާއެކު ކުރެވުނު މަޝްވަރާތަކުން ރައީސް މުއިއްޒު އެ ރަށް އައްޑޫ ސިޓީގެ އިހުތިސާސުން ވަކިކުރީ ރައްޔިތުންގެ މަޖިލީހުގެ ބައެއް މެންބަރުންގެ ނުފޫޒާއެކުގައި ކަމަށް މައުލޫމާތު ލިބިވަޑައިގެންފައިވާ ކަމަށެވެ. މިކަން ޔަގީންކުރެވުނީ އެކަމާ ގުޅިގެން އެ މެންބަރުންގެ ބަސްމަގު ހުރި ގޮތުން ކަމަށާއި ނާޖާއިޒު ފައިދާ ނަގަމުންދާ ކަމަށް ވިދާޅުވެ އެ މެންބަރުން ކައުންސިލްގެ މައްޗަށް ތުހުމަތުތައް ކުރައްވާ ކަމަށް އޭނާ ވިދާޅުވި އެވެ.
ނިޒާރު ވިދާޅުވީ ކައުންސިލްގެ މައްޗަށް އެ ބޭފުޅުން އެ ކުރައްވަނީ ވަރަށް ބޮޑު ތުހުމަތުތަކެއް ކަމަށާއި އެފަދަ ތުހުމަތެއް ކުރައްވާނަމަ އެކަން ބަލާނެ ކަމަށެވެ. އަދި ބައެއްގެ މައްޗަށް ތުހުމަތެއް ކުރާއިރު އެ ތުހުމަތުކުރެވެނީ ކޮންގޮތަކަށްކަން އެނގެންޖެހޭނެ ކަމަށް ވެސް އޭނާ ވިދާޅުވި އެވެ. ނިޒާރު ވިދާޅުވީ، ސަވާހިލީގެ މުއާމަލާތް ސަރުކާރުން ކުރިއަށް ގެންދިޔަ ގޮތަކީ ރުހެވޭނެ ގޮތެއް ނޫން ކަމަށާއި، ކައުންސިލްތަކަށް ހުރަސްއެޅޭ ގޮތަށް ތަރައްގީގެ ކަންކަން ބައްޓަންކުރުމަކީ ރަނގަޅު ގޮތެއް ނޫން ކަމަށެވެ. އެހެންކަމުން މި މައްސަލަ ބަލައި މުރާޖައާކުރުމަށް ފަހު އަލުން އައްޑޫ ސިޓީގެ އިހްތިސާސްގެ ތެރޭގައި އެ ރަށް ހިމަނައިދިނުމަށް ނިޒާރު ވަނީ ގޮވާލައްވައިފަ އެވެ.
މި ސަރުކާރުން ސަވާހިލީގެ ތަރައްގީއަށް އެއްވެސް ކަމެއް ކޮށްދޭނެ ކަމުގެ އެއްވެސް އުންމީދެއް ނެތް ކަމަށާއި ސަރުކާރަށް އެކަން ނުވެސް ކުރެވޭނެ ކަމަށް ނިޒާރު ވިދާޅުވި އެވެ. ނަމަވެސް އައްޑޫ ސިޓީ ކައުންސިލްގެ ބެލުމުގެ ދަށަށް ސަވާހިލި ގެނެވިއްޖެ ނަމަ އެ ރަށް ތަރައްގީކޮށްދެއްވާނެ ކަމުގެ ޔަގީންކަން އޭނާ ދެއްވި އެވެ.
ސަވާހިލީގެ ތަރައްގީއަށް އެއްވެސް ކަމެއް ކުރެވޭނެ ކަމުގެ އުއްމީދެއް ނެތް، ސަރުކާރަކަށް އެކަމެއް ނުވެސް ކުރެވޭނެ، އަދިވެސް އެތަން އައްޑޫ ސިޓީ ކައުންސިލްގެ ބެލުމުގެ ދަށަށް ގެނެވިއްޖެ ނަމަ އެތަން ތަރައްގީކޮށްދޭނެ ކަމުގެ 100 ޕަސެންޓް ޔަގީންކަން ރައްޔިތުންނަށް އަރުވަންއަލީ ނިޒާރު
ސަވާހިލީގެ މުއާމަލާތް ސަރުކާރުން ކުރިއަށް ގެންދިޔަ ގޮތާމެދު ނުރުހުން ފާޅުކުރައްވަމުން ނިޒާރު ވިދާޅުވީ، އެ ރަށް އައްޑޫ ސިޓީގެ އިހުތިސާސުން ވަކިކުރިކަން އަންގައި ރައީސް މުއިއްޒު ގަރާރެއް ނެރުއްވީ "ނިދަން އެނދަށް އަރާ އޮއްވާ" ކަމަށެވެ. ދައުލަތުގެ ދެ މުއައްސަސާއެއްގެ ދޭތެރޭ މުއާމަލާތްތައް ހިނގަން ޖެހޭނީ ރަސްމީކޮށް ކަމަށާއި، ކައުންސިލަކީ ސަރުކާރުން އަންގާ ގޮތަށް ކަންކަން ކުރަން ތިބޭ ބައެއް ނަމަވެސް، ދެ ފަރާތުގެ މެދުގައި މަޝްވަރާތައް ކުރެވެންޖެހޭނެ ކަމަށް ނިޒާރު ވިދާޅުވި އެވެ.
އައްޑޫ ސިޓީގެ އިހްތިސާސުން ސަވާހިލި ވަކިކޮށްފައިވަނީ އެ ރަށް އެންޓަޓެއިންމަންޓް އެންޑް ރެކްރިއޭޝަން ފެސިލިޓީއެއްގެ ގޮތުގައި ތަރައްގީކުރާނެ ބަޔަކު ހޯދުމަށް އައްޑޫ ސިޓީ ކައުންސިލުން އިއުލާނުކޮށް، އެ މަސައްކަތަށް ބީލަމަށް ހުޅުވާލާފައިވަނިކޮށެވެ. އެ ރަށް އައްޑޫ ސިޓީގެ އިހުތިސާސުން ވަކިކުރަން ނިންމީ ފަތުރުވެރިކަމުގެ ބޭނުމަށް އެ ރަށް ބޭނުންކުރުމަށް ކަމަށް ރައީސް މުއިއްޒު ނެރުއްވި ގަރާރުގައި ބަޔާންކޮށްފައިވީ ނަމަވެސް، އެކަމާ ގުޅޭ އިތުރު އެއްވެސް ތަފްސީލެއް އެ ގަރާރުގައި ބަޔާންކޮށްފައެއް ނުވެ އެވެ. މި މައްސަލައާ ގުޅިގެން އައްޑޫ ސިޓީގެ ރައްޔިތުން އަންނަނީ ނުރުހުން ފާޅުކުރަމުންނެވެ. އެ ފަރާތްތަކުން ބުނާ ގޮތުގައި މި ސަރުކާރުން މަސައްކަތް ކުރަމުންދަނީ އައްޑޫ ސިޓީގެ ތަރައްގީއަށް ހުރަސްއެޅުމަށެވެ.
