ލާމަރުކަޒީ ނިޒާމު ބަލިކަށިކޮށްލިކަމުގެ ޗެންޕިއަންކަން ރައީސް މުއިއްޒަށް ލިބިވަޑައިގަންނަވާ، އެއީ ސުވާލެއް ވެސް ނެތް ކަމެއް: ނިޔާޒު
27 ޖުލައި 2026 | ހޯމަ 07:33ލާމަރުކަޒީ ނިޒާމު ބަލިކަށިކުރުމަށްފަހު އެ ނިޒާމުގެ ޗެމްޕިއަނަކަށް ވުމަކީ ކުރިއެރުމެއް ނޫން ކަމަށް ވިދާޅުވެ، ކުރީގެ މެންބަރު އަލީ ނިޔާޒު ރައީސް މުއިއްޒަށް ވަނީ ވަރަށް ބޮޑަށް ފާޑު ވިދާޅުވެފައި. ކައުންސިލްތަކުގެ ބާރުތައް ކުޑަކޮށް ގާނޫނަށް ގެންނަ ބަދަލުތަކަކީ ރައްޔިތުންނަށް ދޭ ބާރުވެރިކަން ނިގުޅައިގަތުން ކަމަށާއި، މި ސަރުކާރުން މި ނިޒާމު ގަބޫލުނުކުރާ ކަމަށްވެސް އޭނާ ވިދާޅުވި
މިނިވަން ދުވަހާ ގުޅިގެން ރާއްޖެޓީވީން ގެނެސްދޭ ''މިނިވަންކަމުން އަޅުވެތި ކަމަށް'' ޚާއްސަ ކަވަރޭޖްގައި ހުޅުމާލޭ ދާއިރާގެ ކުރީގެ މެންބަރު އަދި 19 ވަނަ ރައްޔިތުން މަޖިލީހުގެ ލާމަރުކަޒީ ކޮމެޓީގެ މުގައްރިރު އަލީ ނިޔާޒު ވާހަކަ ދައްކަވަނީ | ރާއްޖެއެމްވީ
ލާމަރުކަޒީ ނިޒާމު ބަލިކަށިކޮށްލިކަމުގެ ޗެންޕިއަންކަން ރައީސް ޑރ.މުހައްމަދު މުއިއްޒުއަށް ލިބިވަޑައިގަންނަވާ ކަމަށް ހުޅުމާލޭ ދާއިރާގެ ކުރީގެ މެންބަރު އަދި 19 ވަނަ ރައްޔިތުން މަޖިލީހުގެ ލާމަރުކަޒީ ކޮމެޓީގެ މުގައްރިރު އަލީ ނިޔާޒު ވިދާޅުވެއްޖެ އެވެ.
މިނިވަން ދުވަހާ ގުޅިގެން ރާއްޖެޓީވީން ގެނެސްދޭ ''މިނިވަންކަމުން އަޅުވެތިކަމަށް'' ޚާއްސަ ކަވަރޭޖްގައި ވާހަކަ ދައްކަވަމުން ނިޔާޒު ވަނީ ލާމަރުކަޒީ ނިޒާމުގެ ޗެޕްމިއަންކަން ކުރައްވާނީ ރައީސް މުއިއްޒު ކަމަށް އެމަނިކުފާނު ވިދާޅުވާ ބަސްފުޅަށް ވަރަށް ބޮޑަށް ފާޑު ވިދާޅުވެފަ އެވެ.
ނިޔާޒު ވިދާޅުވީ، ލާމަރުކަޒީ ނިޒާމު ބަލިކަށިކޮށް، އެ ނިޒާމު އެއްފަރާތް ކުރުމަށްފަހު ޗެމްޕިއަނަކަށް ވުމަކީ އެ ނިޒާމަށް ލިބުނު ކުރިއެރުމެއް ނޫން ކަމަށެވެ.
ނިޔާޒު ވިދާޅުވީ މިހާރު އޮތް ރައްޔިތުންގެ މަޖިލީހުގެ މެޖޯރިޓީ އާއި ދައުލަތުގެ ތެރެއިން ލިބިފައިވާ ބާރުގެ ބޭނުންކޮށްގެން ލާމަރުކަޒީ ނިޒާމު ވަރަށް ބޮޑަށް ބަލިކަށި ކުރަމުންދާ ކަމަށެވެ.
އެގޮތުން އަތޮޅު ކައުންސިލްތައް އުވާލައި، ކައުންސިލަރުންގެ އަދަދު މަދުކޮށް، ކައުންސިލްގެ ފަހު ދައުރު އެއްވެސް މަސައްކަތެއް ނުކުރެވޭ ގޮތަށް ލާމަރުކަޒީ ގާނޫނަށް ގެނެސްފައިވާ އިސްލާހު އޭނާ ފާހަގަކުރެއްވި އެވެ. އަދި މިއީ އެއްވެސް ހާލެއްގައި މި ނިޒާމުގެ ޗެމްޕިއަނެކޭ ބުނެވޭ ފަދަ ބަދަލުތަކެއް ނޫން ކަމަށް ވެސް ނިޔާޒު ވިދާޅުވި އެވެ.
ޗެމްޕިއަންކަން މި ހޯދަނީ ހޯދުމަށްޓަކައި ވާދަކުރަން އެބަޖެހޭ އެނގޭތޯ. އަޅުގަނޑު ދެކޭގޮތުގައި ލާމަރުކަޒީ ނިޒާމު ބަލިކޮށްފައި ޗެމްޕިއަނަކަށް އެވަޑައިގަންނަވާނީ އެނގޭތޯ. އެކަމުގެ ޗެމްޕިއަނުން ލާމަރުކަޒީ ނިޒާމު އެއްފަރާތަށް ލާފައި އެޔާ ވާދަކުރައްވައިގެން އެ ނުހިނގާ ގޮތަށް ހަދައިގެން އެ ބަލިކުރައްވާފައި ބުނެފާނެ ޗެމްޕިއަނަކަށް ވަނީ. އެއްވެސް ހާލެއްގައި މި ނިޒާމުގެ ޗެމްޕިއަނެކޭ ބުނެވޭ ފަދަ ބަދަލުތަކެއް ނޫން ގެނެސްފައި ހުރީއަލީ ނިޔާޒު
ނިޔާޒު ވިދާޅުވީ އެމްޑީޕީ ފިޔަވައި އެހެން ސިޔާސީ ޕާޓީއަކުން މި ނިޒާމު ގަބޫލު ނުކުރާ ކަމަށާއި، އެ ސިޔާސަތު ގެންނަން ބޭނުންނުވާ ކަމަށެވެ. އަދި ލާމަރުކަޒީ ނިޒާމު ހަރުދަނާކޮށް ރައްޔިތުންނަށް ބާރުވެރިކަން ދޭނެ ވާހަކަތައް ދައްކަމުން ދަނީ ވެރިކަމަށް އައުމުގެ މަގުސަދުގައި ރައްޔިތުންގެ ތާއީދު ހޯދުމަށް ކަމަށް އޭނާ ވިދާޅުވި އެވެ.
