މި ސަރުކާރުން ދިވެހި ރައްޔިތުން ލޭބަލް ކުރަނީ ކުށްވެރިން ގޮތުގައި، ސަރުކާރު މުވައްޒަފުންނާމެދު އަމަލު ވެސް ކުރަނީ އެހެން: ނިޝާން
25 ޖުލައި 2026 | ހޮނިހިރު 19:26ފެނަކައިގެ މުވައްޒަފުންގެ ތައުލީމީ ސެޓްފިކެޓާއި ކުށުގެ ރެކޯޑު އަލުން ހުށަހަޅަން އެންގީ، ކުރިން ހުށަހެޅި ލިޔެކިޔުންތައް ނައްތާލުމަށްފަހު މުވައްޒަފުން ވަކިކުރާނެ ބަހަނާއެއް ހޯދުމަށް ކަމަށް ނިޝާން ވިދާޅުވި. އަދި މިއީ ސަރުކާރުން ސިޔާސީ ބޭނުމަށް ނަހަމަ ގޮތުގައި ވަޒީފާ ދިނުމުގެ ނަތީޖާކަމަށް އޭނާ ވިދާޅުވި
ގާނޫނީ ވަކީލު މުހައްމަދު ނިޝާން އިބްރާހީމް | ރާއްޖެއެމްވީ
މި ސަރުކާރުން ދިވެހި ރައްޔިތުންނާއި ދިވެހި މަސައްކަތްތެރިން ލޭބަލް ކުރަމުންދަނީ ކުށްވެރިންގެ ގޮތުގައި ކަމަށާއި ސަރުކާރު ކުންފުނިތަކުގައި މަސައްކަތް ކުރާ މުވައްޒަފުންނާމެދު އަމަލު ވެސް ކުރަމުންދަނީ އެހެން ކަމަށް ގާނޫނީ ވަކީލު މުހައްމަދު ނިޝާން އިބްރާހީމް ވިދާޅުވެއްޖެ އެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ނިޝާން ވިދާޅުވީ މިކަން އެންމެ ބޮޑަށް ސާފު ވަނީ މި ސަރުކާރުން ފެނަކަ ކުންފުނީގެ މުވައްޒަފުންނާމެދު ކަންކުރަމުންދާ ގޮތުން ކަމަށެވެ.
ފެނަކަ ކުންފުނި އައިސް އެގޮތް މިގޮތަށް ވާހަކަ އައިސް، މުވައްޒަފުން މަދު ކުރާނެ ވާހަކައާ މުވައްޒަފުންނަށް އަނެއްކަމެއް ކުރާނެ ވާހަކައާ، ފެނަކަ އަށް ލިބޭ އާމްދަނީ އަކުން މުވައްޒަފުންނަށް މުސާރަ ދީފަ ކުންފުންޏަކަށް ކޮޅަކަށް ނުތެދުވެވެއޭ. ފެނަކަ އަށް އެވަރަކަށް އާމްދަނީ އެއް ނުލިބެ އޭ. ތަފާތު ގޮތްގޮތަށް ވާހަކަ ދައްކަމުން ދައްކަމުން އައިސް އެންމެ ފުރަތަމަ އިއުލާނު ކުރީ މުވައްޒަފުންގެ ތައުލީމީ ސެޓްފިކެޓުތައް ފެނަކައިގެ މައި އޮފީހަށް ހުށަހަޅަން. ފެނަކައިގެ ހުރިހާ މުވައްޒަފުންނަށް އެންގި. މި ސަރުކާރު އައިސްފަ މި ސަރުކާރުން ވިސްނީ ކުރީ ސަރުކާރުން ފެނަކައިގެ ވަޒީފާތަކަށް ވައްދާފަ ތިިބޭނީ ޝަރުތު ހަމަނުވާ މީހުންނޭ. ވައްދާ މީހުންނަކީ ކުފޫ ހަމަނުވާ މީހުންނޭ. މި ވިސްނުމުގައި ފެނަކައިގެ ހުރިހާ މުވައްޒަފުންނަށް މި އަންގަނީ ތައުލީމީ ސެޓްފިކެޓްތައް ހުށަހަޅާށޭ. މި ރާއްޖޭގައި އަބަދުވެސް ވަޒީފާ ދެމުންދިޔައީ ތައުލީމީ ސެޓްފިކެޓް ހުށަހަޅައިގެންމުހައްމަދު ނިޝާން އިބްރާހީމް
އޭނާ ވިދާޅުވީ ފެނަކައިން ވެސް ވަޒީފާ ދީފައިވަނީ ބަޔާން ކޮށްފައިވާ ޝަރުތުތަކާއި އެހެނިހެން ކަންކަމަށް ބެލުމަށް ފަހުގައި ކަމަށެވެ. ނަމަވެސް މި ސަރުކާރު ވެރިކަމަށް އައުމާއެކު ފެނަކައިގެ އާކައިވްގައި ހުރި މުވައްޒަފުންގެ ތައުލީމީ ސެޓްފިކެޓްތަކަށް ވީ ގޮތެއް ނޭންގި ގެއްލިފައިވާކަމަށް ނިޝާން ވިދާޅުވި އެވެ.
އެ ނައްތާލީ ކަމެއް ނުވަތަ އަންދާލީ ކަމެއް ވެސް ސާފު ނުވޭ. އެއަށް ހެދި ގޮތެއް ނޭންގޭ ނަމަވެސް އެނގޭ ކަމަކީ ހުރިހާ މުވައްޒަފުންނަކީ ވެސް ބޭނުންވާ ލިޔެކިޔުން ހުށަހަޅައިގެން ވަޒީފާ އަށް ނަގާފައިވާ ބައެއް ކަން. އެވަރުން ވެސް ނުވެގެން އެންމެ ފަހުން މުވައްޒަފުން ކަނޑާލެވޭނެ ކޮންމެވެސް ގޮތެއް ހޯދުމަށް ސަރުކާރުން މަސައްކަތް ފެށި. އެކަން ކުރުމަށްޓަކައި ކުށުގެ ރެކޯޑު ހޯދުމަށް ސަރކިއުލާ އަކުން މުވައްޒަފުންނަށް އެންގި. މިއީ ވެސް މުވައްޒަފަކު ވަޒީފާ އަށް ނެގުމުގެ ކުރިން އެ ކުންފުންޏަކުން ބަލާ އެއްޗެހި. އެ ތަކެތި ވެސް ނައްތާލީމުހައްމަދު ނިޝާން އިބްރާހީމް
ނިޝާން އިތުރަށް ވިދާޅުވީ، މި ހުރިހާ ކަމެއް ކޮށްގެން ވެސް ވަޒީފާ އިން މުވައްޒަފުން ކަނޑާލެވޭނެ ގޮތެއް ސަރުކާރަށް ނުފެނުމުން، މުވައްޒަފުން އަމިއްލަ އަށް ވަޒީފާ އިން ވަކިވުމަށް ވެސް ފުރުސަތު ހުޅުވާލީ ކަމަށެވެ. ނަމަވެސް، އެ ގޮތަށް ވެސް މުވައްޒަފުން ވަޒީފާ ދޫކޮށްލަން ބޭނުން ނުވުމުން، ވަޒީފާއިން ވަކިކުރަން ފެށީ ކަމަށާއި ބައެއް މަގާމުތައް ވެސް އުވާލާ، ކުންފުނިތެރޭގައި އެގޮތް މިގޮތް ހެދީ ކަމަށެވެ. މި ހުރިހާ ކަމަކުން ދޭހަވަނީ މި ސަރުކާރަށް މިއަދު މުވައްޒަފުންނާ ހުރެ އުނދަގޫ ވެގެން އުޅޭ ކަމަށާއި މި ހުރިހާ ކަމަކީ ވެސް މި ސަރުކާރުން ސިޔާސީ ބޭނުމަށްޓަކައި ނަހަމަ ގޮތުގައި ވަޒީފާ ދިނުމުން ނުކުތް ނަތީޖާ ކަމުގައި ނިޝާން ވިދާޅުވި އެވެ.
