ރާއްޖޭގައި މިނިވަން މުއައްސަސާއެއް ނެތް، ޕީސީބީ ވެސް އޮތީ ސަރުކާރުގެ ކޮންޓްރޯލްގެ ދަށުގައި: މެންބަރު މައުރޫފް

ދިވެހިރާއްޖޭގައި މިނިވަން މުއައްސަސާއެއް ނެތް ކަމަށާއި، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ވެސް އޮތީ ސަރުކާރުގެ ކޮންޓްރޯލްގެ ދަށުގައި ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.

މިނިވަން ދުވަހާ ގުޅިގެން ރާއްޖެޓީވީން ގެނެސްދިން ''މިނިވަންކަމުން އަޅުވެތިކަމަށް'' ޚާއްސަ ކަވަރޭޖްގައި މެންބަރު މައުރޫފް ވަނީ ރާއްޖޭގައި މިނިވަންކަމާއެކު މަސައްކަތްކުރާ އެއްވެސް މުއައްސަސާއެއް މިހާރު ހުރި ކަމަށް ގަބޫލުނުކުރެވޭ ކަމަށެވެ. މި ސަރުކާރަށް ވަރަށް ބޮޑަށް ފާޑު ވިދާޅުވަމުން އޭނާ ވިދާޅުވީ ރައީސް ޑރ. މުއިއްޒަށް ރައްޔިތުންގެ މަޖިލީހުގެ އަޣްލަބިއްޔަތު އޮތުމުން، ހުރިހާ ތަނެއް އޮތީ ސަރުކާރުގެ ފުރިހަމަ ކޮންޓްރޯލްގެ ދަށުގައި ކަމަށެވެ.

ޕީސީބީއަށް އެންމެ ފަހުން އައްޔަންކުރެވުނު މެންބަރުންނާ ގުޅޭގޮތުން ވާހަކަދައްކަވަމުން މެންބަރު މައުރޫފް ވިދާޅުވީ، އެ ބޭފުޅުންގެ ތައުލީމީ ގާބިލުކަމާ މެދު ސުވާލު ނުއުފައްދާ ކަމަށެވެ. ނަމަވެސް، ވަޒީފާގެ މަޖުބޫރުކަން އޮތް މިންވަރުން، އެހެން މުވައްޒަފުންގެ ހައްގުތައް ނިގުޅައިގަންނަ ފަދަ އުސޫލުތައް ކަނޑައަޅަން އެ ބޭފުޅުންނަށް މަޖުބޫރުވަމުންދާ ކަމަށް އޭނާ ތުހުމަތުކުރެއްވި އެވެ.

މީގެ އިތުރުން ސަރުކާރު ހިއްސާވާ ކުންފުނިތަކުގެ މާލީ ހާލަތާ ގުޅޭގޮތުން ޕީސީބީން ފިޔަވަޅު އަޅާއިރު، ކުންފުނިތަކަށް ބޭނުންނުވާ ވަރަށް މުވައްޒަފުން އިތުރުކުރަމުންދިޔަ ވަގުތު ޕީސީބީން އެކަން ހުއްޓުވަން މަސައްކަތް ނުކުރި ސަބަބާ ގުޅޭގޮތުން މެންބަރު މައުރޫފް ވަނީ ސުވާލު އުފައްދަވާފަ އެވެ. 

ޕީސީބީއަށް ބުނެވިދާނެ، ޕީސީބީގެ މެންޑޭޓް އޮންނަގޮތުން، ކުންފުންޏެއްގެ މާލީ ހާލަތު ގޯސްވީމާ، ކުންފުނިން އެޅިދާނެ ފިޔަވަޅުތައް. ޕީސީބީއަށް ބުނެވިދާނެ އެހެންނަމަވެސް، އެ ކުންފުންޏަކުން އެގޮތަށް އަމަލުކުރުމާއި ނުކުރުމަކީ އަނެއްކާވެސް އެ ކުންފުންޏެއްގެ ރެސްޕޮންސް ޒިންމާގެ ދަށުގައި އޮތް ކަމެއް. މީގެ އެންމެ ހަމަނުޖެހޭ ނުވަތަ ދެކޮޅުނުޖެހޭ ކަމަކީ، ކުންފުންޏަކުން މުވައްޒަފުން ހަޔާކުރަމުން، އިންތިހާއަށް ނަގަމުން، ކުންފުންޏަށް ބޭނުން ނުވާވަރަށް ނަގަމުންދިޔަ ވަގުތުގައި ޕީސީބީ ކީއްތޯ ކުރީ؟ ތިޔަ ކޮށްގެންވާނެ ކަމެއް ނޫނޭ ޕީސީބީ އަށް ކީއްވެތޯ ނުބުނެވުނީ؟

މައުރޫފް ޒާކިރު

ފެނަކަ ފަދަ ކުންފުނިތަކަކީ ރައްޔިތުންގެ ފައިސާއިން ހިންގާ ތަންތަންކަން ފާހަގަކުރައްވައި މެންބަރު މައުރޫފް ވިދާޅުވީ ސިޔާސީ ފިކުރަށް ބަލައި މުވައްޒަފުން ވަކިކުރުމަކީ ބަލައިގަނެވޭނެ ކަމެއް ނޫން ކަމަށެވެ. އެއްވެސް ދިވެހި ރައްޔިތެއްގެ މެދުގައި ތަފާތުކުރުން ގެންގުޅުމަކީ ސަރުކާރަށް ކުރެވޭނެ ކަމެއް ނޫން ކަމަށާއި، ވަޒީފާއިން ވަކިކޮށް ބިކަކޮށްލުމަކީ މީގެ އެތައް ޒަމާނެއް ކުރީގެ އުސޫލެއް ކަމަށް ވެސް ވިދާޅުވި އެވެ.

މެންބަރު މައުރޫފް އިތުރަށް ވިދާޅުވީ، ވަޒީފާގެ މިނިވަންކަން ނެތް ގައުމެއްގައި ހަގީގީ މިނިވަން ކަމެއް އޮތް ކަމަށް ގަބޫލުނުކުރެވޭ ކަމަށެވެ. އަދި ކޮންމެ މީހަކު ވެސް އެންމެ ފުރަތަމަ މަސައްކަތް ކުރަނީ އާއިލާގެ ބަނޑުފުރާ މުއްތިކުރުމަށް ކަމަށްވާއިރު، މިހާރު ރާއްޖެ މިދަނީ އަޅުވެތިކަމަކާ ދިމާލަށް ކަމަށް ކަމަށް މެންބަރު މައުރޫފް ވިދާޅުވި އެވެ.