ޔޫގެންޑާގެ ކުރީގެ ފޮރިން މިނިސްޓަރު އދ.ގެ ސެކްރެޓަރީ ޖެނެރަލް މަގާމަށް ކުރިމަތިލައްވައިފި

އދ. ގެ ސެކްރެޓަރީ ޖެނެރަލްގެ މަގާމަށް ޔޫގެންޑާގެ ކުރީގެ ފޮރިން މިނިސްޓަރު އޮލާރާ އޮޓޫނޫ ކުރިމަތިލައްވައިފި އެވެ. މިއާއެކު، މިހާރުގެ ސެކްރެޓަރީ ޖެނެރަލް އެންޓޯނިއޯ ގުޓަރޭސްގެ ބަދަލުގައި އެ މަގާމަށް އަންނާނެ ބޭފުޅަކު ހޮވުމަށް ކުރިއަށްދާ ވާދަވެރިކަމުގައި ހަތްވަނަ ކެންޑިޑޭޓަކަށް އޮޓޫނޫ ވަނީ ވެވަޑައިގެންފަ އެވެ.

އިރުމަތީ އެފްރިކާގެ ގައުމެއް ކަމަށްވާ ޔޫގެންޑާގެ ފޮރިން މިނިސްޓްރީން އާދީއްތަ ދުވަހު ނެރުނު ރަސްމީ ބަޔާނެއްގައި އޮޓޫނޫގެ ކެންޑިޑޭސީ އިއުލާންކޮށްފައިވާއިރު، އޭނާއަކީ ޑިޕްލޮމެޓިކް ދާއިރާގައި 40 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ، ބައިނަލްއަގުވާމީ ފެންވަރުގައި ފާހަގަކޮށްލެވޭ ޚިދުމަތްތެރިއެއްގެ ގޮތުގައި ވަނީ ސިފަކޮށްފަ އެވެ.

އޮޓޫނޫއަކީ ޑިޕްލޮމަސީއާއި، ސަރުކާރު ހިންގުމާއި، ތައުލީމީ ދާއިރާގެ އިތުރުން ސުލްހަ ގާއިމުކުރުމުގެ ދާއިރާއިން ބޮޑެތި ތަޖުރިބާތަކެއް ހާސިލްކުރައްވާފައިވާ ބޭފުޅެއް ކަމަށް އެ މިނިސްޓްރީން ބުނެފައިވެ އެވެ. އެހެންކަމުން، ދުނިޔޭގެ މަސްރަހު މިހާރު އޮތް ނާޒުކު ދަނޑިވަޅުގައި އދ. އަށް އިސްވެ ހުންނަވައި އިރުޝާދު ދެއްވުމަށް އޭނާއަކީ އެންމެ އެކަށީގެންވާ ގާބިލް ބޭފުޅާ ކަމަށްވެސް ޔުގެންޑާގެ ފޮރިން މިނިސްޓްރީން ވަނީ ފާހަގަކޮށްފަ އެވެ.

އުމުރުން 75 އަހަރުގެ އޮލާރާ އޮޓޫނޫ ވަނީ 1985 އިން 1986 އަށް ޔޫގެންޑާގެ ފޮރިން މިނިސްޓަރުކަން ކުރައްވާފަ އެވެ. އަދި 1980 އިން 1985 އަށް އދ. އަށް ކަނޑައަޅާފައި ހުންނަވާ ޔޫގެންޑާގެ ދާއިމީ މަންދޫބުގެ މަގާމުވެސް އޭނާ ވަނީ ފުރުއްވާފަ އެވެ. މީގެ އިތުރުން، 1998 އިން 2005 އަށް އޭނާ ވަނީ އދ. ގެ އަންޑަރ ސެކްރެޓަރީ ޖެނެރަލްގެ މަގާމާއި، ހަނގުރާމަތަކުގެ ސަބަބުން އަސަރުކުރާ ކުޑަކުދިންގެ ހައްގުތަކާ ބެހޭ އދ. ގެ ފުރަތަމަ ޚާއްސަ މަންދޫބުގެ މަގާމުވެސް އަދާކުރައްވާފަ އެވެ.

"ހަނގުރާމައިގެ ސަބަބުން އަސަރުކުރާ ކުޑަކުދިންގެ ރައްކާތެރިކަން ކަށަވަރުކުރުމުގެ މައްސަލަ އދ. ގެ ސަލާމަތީ މަޖިލީހުގެ އެޖެންޑާއަށް ގެނައުމުގައި އޭނާ ވަނީ ކާމިޔާބީ ހޯއްދަވާފައި. އަދި 2005 ވަނަ އަހަރު ސަލާމަތީ މަޖިލީހުން ފާސްކުރި 1612 ވަނަ ގަރާރުގެ ދަށުން، ކަންކަން މޮނިޓަރކޮށް ބެލެހެއްޓުމަށް އެކުލަވާލި މުހިންމު ނިޒާމަކީ އޭނާ ފަރުމާކުރެއްވި ނިޒާމެއް. އެ ނިޒާމަށް މިއަދާ ހަމައަށްވެސް އަމަލުކުރަމުންދޭ،" ޔޫގެންޑާގެ ފޮރިން މިނިސްޓްރީގެ ބަޔާނުގައި ބުނެފައިވެ އެވެ.

މި މަގާމަށް އެފްރިކާ ބައްރުން ވާދަކުރައްވަނީ އޮޓޫނޫގެ އިތުރުން ސެނެގާލްގެ ކުރީގެ ރައީސް މެކީ ސާލް އެކަންޏެވެ. މީގެ ތެރެއިން ބޭފުޅަކު ހޮވިއްޖެނަމަ، އެ ބޭފުޅަކު ވެގެންދާނީ އދ. ގެ އިސްވެރިޔާގެ މަގާމު ފުރުއްވާ އެފްރިކާގެ ތިންވަނަ ބޭފުޅާއަށެވެ. މީގެ ކުރިން އެފްރިކާއިން މި މަގާމު ފުރުއްވާފައިވަނީ 1992 އިން 1996 އަށް މިސްރުގެ ބުޓްރުސް ބުޓްރޯސް-ގާލީ އަދި 1997 އިން 2006 އަށް ގާނާގެ ކޯފީ އަނާން އެވެ.

މި މަގާމަށް ވާދަކުރައްވާ އަނެއް ފަސް ކެންޑިޑޭޓުންނަކީ ލެޓިން އެމެރިކާ އަދި ކެރީބިއަން ސަރަހައްދަށް ނިސްބަތްވާ ބޭފުޅުންނެވެ. މިއީ މިހާތަނަށް އދ. ގެ ސެކްރެޓަރީ ޖެނެރަލްގެ މަގާމު ލިބިފައިނުވާ ހަމައެކަނި ސަރަހައްދެވެ. އެ ބޭފުޅުންނަކީ ޗިލީގެ ކުރީގެ ރައީސާ މިޝޭލް ބެޗެލެޓް، އިންޓަނޭޝަނަލް އެޓޮމިކް އެނާޖީ އެޖެންސީގެ ޑިރެކްޓަރު ޖެނެރަލް އާޖެންޓީނާގެ ރަފައެލް ގްރޮސީ، ކޮސްޓަރީކާގެ ކުރީގެ ނައިބު ރައީސާ ރެބެކާ ގްރިންސްޕަން، އިކުއެޑޯގެ ކުރީގެ ފޮރިން މިނިސްޓަރު މާރިއާ ފެނާންޑާ އެސްޕިނޯސާ އަދި ގުޔާނާގެ ކުރީގެ ފޮރިން މިނިސްޓަރު ކެރޮލިން ރޮޑްރިގޭޒް-ބާކެޓް އެވެ.

މިހާރުގެ ސެކްރެޓަރީ ޖެނެރަލް ގުޓަރޭސްގެ ފަސް އަހަރުގެ ދެވަނަ ދައުރު މި އަހަރުގެ ޑިސެމްބަރު 31 އަށް ހަމަވާނެ އެވެ. އޭނާގެ ބަދަލުގައި މަގާމާ ހަވާލުވާ ބޭފުޅަކަށް ކުރިމަތިލާން ޖެހޭނީ ދުނިޔޭގެ ހަމަނުޖެހުންތަކާ ގުޅިގެން އދ. އަށް އަމާޒުވެފައިވާ ފިއްތުންތަކާއި، އެ އިދާރާގެ އޮނިގަނޑަށް ބަދަލު ގެނައުމަށް ކުރެވޭ ޑިމާންޑްތަކާއެވެ. މީގެ ތެރޭގައި ސަލާމަތީ މަޖިލީހުގެ ދާއިމީ މެންބަރުކަމުގެ މަދުވެގެން ދެ ގޮނޑި އެފްރިކާ އިއްތިހާދަށް ދިނުމަށް އެދި ހުށަހަޅާފައިވާ ހުށަހެޅުން ހިމެނެ އެވެ.

އދ. ގެ ސަލާމަތީ މަޖިލީހުން އަންނަ ބުރާސްފަތި ދުވަހު ސިއްރު ވޯޓުތަކެއް ނަގަން ފަށާނެ އެވެ. މި ވޯޓުގައި މެންބަރުން ކެންޑިޑޭޓުންނަށް ދޭނީ "ތާއީދުކުރަން"، "ތާއީދުނުކުރަން" ނުވަތަ "ވަކި ގޮތެއް ނެތް" ކަމުގެ ވޯޓެވެ. މަގާމަށް އައްޔަންކުރުމަށް އާންމު މަޖިލީހަށް ނަން ހުށަހެޅުމުގެ ކުރިން، ކެންޑިޑޭޓަކު ސަލާމަތީ މަޖިލީހުގެ 15 ވޯޓުގެ ތެރެއިން މަދުވެގެން 9 ވޯޓު ހޯދަން ޖެހެ އެވެ. އަދި ޗައިނާ، ފްރާންސް، ރަޝިއާ، އިނގިރޭސިވިލާތް ނުވަތަ އެމެރިކާގެ ތެރެއިން އެއްވެސް ގައުމަކުން ވީޓޯގެ ބާރު ބޭނުންކޮށްގެން ނުވާނެ އެވެ.

ޔޫގެންޑާގެ އޮޓޫނޫ ނެރުއްވި އޭނާގެ ތަސައްވަރުގައި، އދ. ގެ އިދާރީ އޮނިގަނޑަށް ބަދަލު ގެނައުމަށާއި، ހަމަނުޖެހުންތައް ހައްލުކުރުމަށް ކުރާ މަސައްކަތްތައް ވަރުގަދަކުރުމަށާއި، އާޓިފިޝަލް އިންޓެލިޖެންސް (އޭއައި) ބައިނަލްއަގުވާމީ ފެންވަރުގައި ބެލެހެއްޓުމަށް މަސައްކަތް ކުރައްވާނެ ކަމަށް ވައުދުވެވަޑައިގެންފައިވެ އެވެ. އޭނާ ވިދާޅުވީ އޭނާގެ ކެންޑިޑޭސީއަކީ އދ. އަށް އާ ދިރުމެއް ދީ، އެ އިދާރާ "އަލުން އުފަންކޮށް އާކުރުމަށް" ލިބޭ ފުރުސަތެއް ކަމަށެވެ.