ޑީއާރުސީ އާއި ޔުގެންޑާގައި އެބޯލާ ބަލީގައި 1،000 އަށްވުރެ ގިނަ މީހުން މަރުވެއްޖެ
ޑީއާރުސީގެ އިތުރުން ޔުގެންޑާގައި ހަލުވިކަމާއެކު އެބޯލާ ފެތުރެމުންދާއިރު، މި ބަލީގެ "ބުންޑިބުގްޔޯ" ވޭރިއަންޓަށް ރަސްމީ ފަރުވާއެއް އަދި ހޯދިފައެއް ނުވޭ. ނަމަވެސް ބަލި ކޮންޓްރޯލްކުރުމަށް އާ ވެކްސިނަކާއި ބޭސްތަކެއް ޓެސްޓުކުރަމުންދާކަމަށް ދުނިޔޭގެ ސިއްހަތު ޖަމިއްޔާއިން ބުނޭ. ބަލި ފެތުރުން ހުއްޓުވުމަށް ގިނަ މަސައްކަތްތަކެއް ކުރިނަމަވެސް، ކުރިއަށްވުރެ ބާރުމިނުގައި ބަލި ފެތުރެމުންދާތީ އެ ޖަމިއްޔާއިން ވަނީ ކަންބޮޑުވުން ފާޅުކޮށްފައި.
ޕާސަނަލް ޕްރޮޓެކްޓިވް އިކުއިޕްމަންޓް (ޕީޕީއީ) ނުވަތަ ރައްކާތެރިކަމުގެ ހެދުން އަޅައިގެން ތިބި ސިއްހީ ޚިދުމަތްތެރިން، ތަމްރީނު ޕްރޮގްރާމެއްގެ ތެރެއިން އެކަކު އަނެކަކުގެ ސަލާމަތީ ފިޔަވަޅުތައް ހުރި ނެތްގޮތް ބަލައި ޗެކްކުރުމުގެ އުސޫލުތައް ފަރިތަކުރަނީ. | ގެޓީ އިމޭޖަސް
ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރުސީ) އާއި ޔުގެންޑާގައި މިދިޔަ މެއި މަހު ފެތުރެން ފެށި އެބޯލާ ބަލީގައި މިހާތަނަށް 1،000 އަށްވުރެ ގިނަ މީހުން މަރުވެފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުދަ ދުވަހު ބުނެފި އެވެ.
ދެ ގައުމުގެ ރަސްމީ ތަފާސްހިސާބުތަކަށް ބިނާކޮށް ޑަބްލިއުއެޗްއޯ އިން އާންމުކުރި ރިޕޯޓެއްގައިވާ ގޮތުން، ޑީއާރުސީން މި ނުރައްކާތެރި ވައިރަސް ޖެހިފައިވާ 2،473 ކޭސް ފެނިފައިވާއިރު، އޭގެ ތެރެއިން 999 މީހުން ވަނީ މަރުވެފަ އެވެ. އަދި އަވަށްޓެރި ޔުގެންޑާގައި މި ބަލި ޖެހުނު 20 މީހަކު ރަޖިސްޓްރީކޮށްފައިވާއިރު، އޭގެ ތެރެއިން ދެ މީހަކު ވަނީ މަރުވެފަ އެވެ.
ޑީއާރުސީގައި 17 ވަނަ ފަހަރަށް އެބޯލާ ފެތުރެން ފެށިކަން އިއުލާނުކުރީ އިޓޫރީ ޕްރޮވިންސްގައި ބައެއް މީހުން މަރުވުމާ ގުޅިގެން މިދިޔަ މެއި މަހުގެ 15 ވަނަ ދުވަހު އެވެ. ހަތިޔާރު އެޅި ޖަމާއަތްތަކުގެ ނުފޫޒު އޮންނަ، މައުދަނުން މުއްސަނދި އެ ގައުމުގެ އިރުއުތުރުގެ މި ސަރަހައްދުގައި ބަލި ފެތުރުން ވަނީ ވަރަށް ބޮޑަށް އިތުރުވެފަ އެވެ.
ގާތުން ބައްދަލުވުމާއި ހަށިގަނޑުން ބޭރުވާ ދިޔާ ތަކެތީގެ ޒަރީއާއިން ފެތުރޭ އެބޯލާ ވައިރަސް، ޑީއާރުސީގެ އިތުރު ހަތަރު ޕްރޮވިންސަކުން ވެސް މިހާރު ވަނީ ފެނިފަ އެވެ.
ޔުގެންޑާއިން ފެނުނު ކޭސްތަކަކީ ގިނައިން ބޯޑަރު ހުރަސްކޮށް އެ ގައުމަށް އެތެރެވި ކޮންގޯގެ ރައްޔިތުން ކަމަށްވާއިރު، ވޭތުވެދިޔަ ތިން ހަފުތާގެ ތެރޭގައި އެ ގައުމުން އާ ކޭސްއެއް ފެނިފައިނުވާ ކަމަށް ޔުގެންޑާ ސަރުކާރުން ބުނެ އެވެ.
ޑަބްލިއުއެޗްއޯގެ ވެރިޔާ ޓެޑްރޯސް އަދަނޮމް ގެބްރެޔޭސަސް މިދިޔަ ހަފުތާގައި އިންޒާރު ދެއްވި ގޮތުގައި، ވޭތުވެދިޔަ މަހެއްހާ ދުވަހުގެ ތެރޭގައި މި ބަލި ފެތުރެމުންދަނީ ކުރިން އެބޯލާ ފެތުރުނު އެއްވެސް ފަހަރަކަށްވުރެ މާ ބާރުމިނެއްގަ އެވެ.
ބަލި ކޮންޓްރޯލް ކުރުމަށް ކުރާ މަސައްކަތްތައް ވަރުގަދަކޮށްފައިވީ ނަމަވެސް، ބަލި ފެތުރޭ މިންވަރު އަދިވެސް ހުރީ ކޮންޓްރޯލް ކުރެވޭ މިންވަރަށްވުރެ މަތީގައި ކަމަށް ޑީއާރުސީގައި ހުންނަވާ ޑަބްލިއުއެޗްއޯގެ އިންސިޑެންޓް މެނޭޖަރު ތިއެރްނޯ ބަލްޑޭ އަންގާރަ ދުވަހު ނޫސްވެރިންނަށް މައުލޫމާތު ދެއްވަމުން ވިދާޅުވި އެވެ.
މިފަހަރު ފެތުރެމުންދާ އެބޯލާގެ "ބުންޑިބުގްޔޯ" ވޭރިއަންޓަށް މިހާތަނަށް އެއްވެސް ވެކްސިނެއް ނުވަތަ ފަރުވާއެއް ރަސްމީކޮށް ފާސްކޮށްފައެއް ނުވެ އެވެ.
ނަމަވެސް، މި ބައްޔަށް ފަރުވާ ދިނުމަށް ބޭނުންކުރެވިދާނެ ދެ ބޭހަކާއި، ވެކްސިނެއްގެ އިތުރުން ބަލި ޖެހުމުގެ ފުރުސަތު އޮތް މީހުންނަށް ދޭ ރައްކާތެރިކަމުގެ ފަރުވާއެއް ޓެސްޓުކުރުމުގެ މަސައްކަތް މިހާރު ކުރިއަށްދާ ކަމަށާއި، އޭގެއިން އުންމީދީ ނަތީޖާތަކެއް ފެންނަމުންދާ ކަމަށް ޑަބްލިއުއެޗްއޯ އިން ވަނީ ރިޕޯޓުކޮށްފަ އެވެ.
