އދ.ގެ ސެކްރެޓަރީ ޖެނެރަލް މަގާމަށް އާޖެންޓިނާ ސަރުކާރުން ނަމެއް ހުށަހަޅާފައިވަނިކޮށް ރާއްޖެ އިން އެ މަގާމަށް އާޖެންޓިނާގެ އެހެން ފަރާތެއްގެ ނަން ހުށަހަޅައިފި

އދ.ގެ ސެކްރެޓަރީ ޖެނެރަލް މަގާމަށް އާޖެންޓިނާ ސަރުކާރުން ނަމެއް ހުށަހަޅާފައިވަނިކޮށް ދިވެހިރާއްޖެ އިން ހަމަ އެ މަގާމަށް އާޖެންޓިނާގެ އެހެން ފަރާތެއްގެ ނަން ހުށަހަޅައިފި އެވެ.

ސެކްރެޓެރީ ޖެނެރަލްގެ މަގާމުގައި މިހާރު ހުންނެވި އެންޓޯނިއޯ ގުޓެރޭޒްގެ ދައުރު ހަމަވުމުން، އެ މަގާމަށް އާޖެންޓިނާގެ ސަރުކާރުން ވަނީ އިންޓަރނޭޝަނަލް އެޓޮމިކް އެނާޖީ އޭޖެންސީގެ ސެކްރެޓަރީ ޖެނެރަލް ރަފައެލް ގްރޮސީ ގެ ނަން ހުށަހަޅާފަ އެވެ.

އދ. ގެ އޮފިޝަލަކާ ހަވާލާދީ އާޖެންޓިނާގެ ބިއުނަސާރިސް ޓައިމްސް އިން ރިޕޯޓްކޮށްފައިވާ ގޮތުގައި، އާޖެންޓީނާގެ ސަރުކާރުން ކެންޑިޑޭޓަކު ހުށަހަޅާފައިވަނިކޮށް އެ ގައުމުގެ ޑިޕްލޮމޭޓް ވާޖިނިއާ ގެމްބާ އދ. ގެ ދެން އަންނަ ވެރިޔަކަށް ވުމުގެ ރޭހަށް ރަސްމީކޮށް ނުކުންނަވާފައިވަނީ އޭނާގެ ނަން ދިވެހިރާއްޖެ އިން ހުށަހަޅައިގެންނެވެ.

މިހާރުގެ ސެކްރެޓަރީ ޖެނެރަލް، ޕޯޗުގަލްގެ އެންޓޯނިއޯ ގުޓަރޭޒްގެ ދައުރު ހަމަވުމުން، އާ ސެކްރެޓަރީ ޖެނެރަލް މަގާމާ ހަވާލުވެވަޑައިގަންނަވާނީ 2027 ވަނަ އަހަރުގެ ޖެނުއަރީ މަހުގެ 1 ވަނަ ދުވަހުއެވެ.

އާންމުކޮށް އދ. ގެ މި މަގާމު ދުނިޔޭގެ ސަރަހައްދުތަކުގެ މެދުގައި ދައުރުވަމުންދާއިރު، ނުރަސްމީކޮށް އެއްބަސްވެފައިވާ އުސޫލުގެ ދަށުން ދެން މި މަގާމަށް ބޭފުޅަކު އައްޔަންކުރާނީ ލެޓިން އެމެރިކާ ސަރަހައްދުން ކަމަށް ބެލެވެއެވެ. ނަމަވެސް، މީގެ ކުރިން ބައެއް ފަހަރު މި އުސޫލަށް އަމަލުކޮށްފައި ނުވާކަން ފާހަގަކުރެވެއެވެ.

އުމުރުން 72 އަހަރުގެ ގެމްބާގެ އިތުރުން، މި މަގާމަށް ދެން ވާދަކުރައްވާ ބޭފުޅުންގެ ތެރޭގައި ސެނެގާލްގެ ކުރީގެ ރައީސް މާކީ ސާލް، ކޮސްޓަރީކާގެ ކުރީގެ ނައިބު ރައީސް ރެބެކާ ގްރިންސްޕަން، ޗިލީގެ ކުރީގެ ރައީސް މިޝޭލް ބެޗެލެޓް އަދި މިހާރު އިންޓަނޭޝަނަލް އެޓޮމިކް އެނާޖީ އެޖެންސީ (އައި.އޭ.އީ.އޭ) ގެ އިސްވެރިޔާގެ މަގާމުގައި ހުންނެވި އާޖެންޓީނާގެ ރަފައެލް ގްރޮސީ ހިމެނިވަޑައިގަންނަވައެވެ.

ގެމްބާގެ ނަން މި މަގާމަށް ދިވެހިރާއްޖެ އިން ހުށަހެޅި ނަމަވެސް އާޖެންޓީނާގެ ރައީސް ހާވިއޭ މިލެއިގެ ސަރުކާރުން ތާއީދުކުރަނީ އެ ގައުމުގެ އަނެއް ކެންޑިޑޭޓް ރަފައެލް ގްރޮސީއަށެވެ. އދ. ގެ އުސޫލުތައް އާންމު ގޮތެއްގައި އޮންނަ ގޮތުން، ކޮންމެ ކެންޑިޑޭޓެއްގެ ނަންވެސް ރަސްމީ ކޮށް ހުށަހަޅަނީ ވަކި ގައުމަކުން ނުވަތަ ގައުމުތަކެއްގެ މައްޗަށް އެކުލެވޭ ގްރޫޕަކުންނެވެ.

ޚާރިޖީ ގުޅުންތަކާއި ބެހޭ ތަޖުރިބާކާރަކު ނަން ނުޖެހުމަށް ޝަރުތުކޮށް ވިދާޅުވީ، ރާއްޖެއިން މި ކުރީ ލަތުވެތި ކަމެއް ކަމަށާއި، އެއީ ދުނިޔޭގެ ގައުމުތަކުން އަނެއްކާވެސް ރާއްޖެ އަކީ ކުޅޭކުޅޭ ތަނެއް ކަމަށް ދުށުމުގެ ފުރުސަތު އޮތް ކަމެއް ކަމުގައެވެ.

"ގައުމަކުން އެހެން ގައުމަކަށް ނިސްބަތްވާ ފަރާތެއްގެ ނަން ހުށަހެޅުން އދ. ގެ އުސޫލުތައް މަނާ ނުކުރި ކަމުގައި ވިޔަސް، އާންމު ގޮތެއްގައި ވަކި ގައުމަކަށް ނިސްބަތްވާ ކެންޑިޑޭޓުން ހުށަހަޅަނީ އެ ގައުމެއްގެ ސަރުކާރުން،" ކަމަށް އޭނާ ވިދާޅުވިއެވެ.

އޭނާ އިތުރަށް ވިދާޅުވި ގޮތުގައި މިއީ އާޖެންޓިނާ ސަރުކާރާ ރާއްޖެއާ ދެމެދު ނުތަނަވަސްކަން އުފެދުމުގެ ފުރުސަތު އޮތް ކަމެއް ކަމުގައެވެ.

މިކަން ހިނގި ގޮތުގެ މައުލޫމާތު އެނގޭ ފަރާތަކުން ބުނި ގޮތުގައި، ރާއްޖޭގެ ފޮރިން މިނިސްޓްރީގެ ފަރާތުން ގަމްބާ ގެ ނަން އދ. އަށް ހުށަހެޅީ ރައީސް އޮފީހުން އަންގައިގެންނެވެ. އަދި އެކަމުގައި ފޮރިން މިނިސްޓްރީގެ ލަފަ އެއް ވެސް ހޯދާފައެއް ނުވެއެވެ.  ސެކްރެޓަރީ ޖެނެރަލުގެ މަގާމަށް ބޭފުޅަކު ހޮވުމުގެ ފުރުސަތު ލެޓިން އެމެރިކާ ސަރަހައްދަށް އޮތް ދަނޑިވަޅެއްގައި ރާއްޖެ އިން މިކަމުގެ ތެރެއަށް ވަތް ސަބަބެއް ސާފުވާ ގޮތެއް ނުވި އެވެ.

އާޖެންޓީނާ އަށް ނިސްބަތްވާ ދެ ކެންޑިޑޭޓުން ރޭހުގައި ވާދަ ކުރައްވާ އިރު އެ ދެބޭފުޅުން ވެސް  ވަނީ، ދުނިޔޭގެ އެކި ކަންކޮޅުތަކުގައި ހަނގުރާމަތައް އިތުރުވަމުންދާ މި ދަނޑިވަޅުގައި، ހަމަނުޖެހުންތައް ހުއްޓުވުމުގައި އދ. އިން އަދާކުރާ ދައުރު މިހާރަށްވުރެ ވަރުގަދަކުރަންޖެހޭ ކަމަށް ވިދާޅުވެފައެވެ.

މި މަގާމަށް ކުރިމަތިލާ ބޭފުޅުންގެ ތެރެއިން އާއްމު މަޖިލިހަށް ފޮނުވާނެ ކެންޑިޑޭޓުން ކަނޑައަޅާނީ އދ. ގެ ސަލާމަތީ މަޖިލީހުންނެވެ. އެ މަޖިލީހުގައި ވީޓޯ ކުރުމުގެ ބާރު ލިބިފައިވާ ދާއިމީ ފަސް މެންބަރުން ކަމަށްވާ އެމެރިކާ، ޗައިނާ، ރަޝިއާ، އިނގިރޭސިވިލާތް އަދި ފްރާންސްގެ ނިންމުން މިކަމުގައި މުހިންމު ދައުރެއް އަދާކުރާނެއެވެ. ބެލެވޭ ގޮތުގައި ސަލާމަތީ މަޖިލީހުން އާ ސެކްރެޓަރީ ޖެނެރަލް ހޮވުމުގެ ރަސްމީ މަރުހަލާ ޖުލައި މަހުގެ ނިޔަލަށް ފަށާނެއެވެ.

ސެކްރެޓަރީ ޖެނެރަލްގެ މަގާމަށް ބޭފުޅަކު އައްޔަންކުރާނީ، ސަލާމަތީ މަޖިލީހުން ވަކި ބޭފުޅެއްގެ ނަން ހުށަހެޅުމުން އދ. ގެ އާންމު މަޖިލީހުން ފާސްކޮށްގެންނެވެ. މި މަގާމުގެ ދައުރަކީ ފަސް އަހަރު ދުވަހެވެ. އަދި އެއް ދައުރު ފުރިހަމަކުރުމަށްފަހު އިތުރު އެއް ދައުރަށް ކުރިމަތިލުމުގެ ފުރުސަތު އޮވެއެވެ.