އީރާނާ ދެކޮޅަށް ހަނގުރާމަ ފެށި ފަހުން އެމެރިކާގެ 18 ސިފައިން މަރުވެ، 624 މީހުން ޒަޚަމްވެއްޖެ: ސީއެންއެން
27 ޖުލައި 2026 | ހޯމަ 10:56އީރާނުގެ ހަމަލާތަކުގައި ޒަޚަމްވި ސިފައިންގެ އަދަދު ހާމަކުރުމުގައި ޕެންޓަގަންއިން ދެފުށް ފެންނަ ސިޔާސަތެއް ނުގެންގުޅޭ ކަމަށް ބުނެ ފާޑުކިޔުންތައް އަމާޒުވުމުން، އެމެރިކާގެ ދިފާއީ ވުޒާރާއިން ވަނީ ހަނގުރާމައިގެ ތަފާސްހިސާބުތައް އަލުން އަޕްޑޭޓްކޮށްފައި. މި ބަދަލާއެކު ޒަޚަމްވި މީހުންގެ އަދަދު 624 އަށް އަރާފައިވާއިރު، މައުލޫމާތު އޮޅުވާލި ސަބަބު ސާފުކޮށްދިނުމަށް އެދި ސެނެޓްގެ މެންބަރުން މިހާރު ވަނީ ދިފާއީ ވަޒީރަށް ސިޓީއެއް ފޮނުއްވާފައި
2026 ޖުލައި 22 ވަނަ ދުވަހު، ޑޯވަރ އެއަރ ފޯސް ބޭސްގައި ބޭއްވި ޝަރަފުވެރި ވަދާއީ ރަސްމިއްޔާތެއްގައި، އެމެރިކާ ސިފައިންގެ ހަތަރު މެންބަރުން ކަމަށްވާ ފަސްޓް ލެފްޓިނަންޓް ޓައިލަރ ޖޭމްސް ފީހަން އާއި، ސްޓާފް ސާޖަންޓް މައިކަލް އެމަނުއަލް ސްވިންޓަން އާއި، ސާޖަންޓް އެންޖެލް އެސް. ރާމްޕްރަސާދު އަދި ޕްރައިވެޓް އިޒަބެލާ ގޮންޒާލޭޒްގެ ހަށިތައްލާފައިވާ ސަންދޯއްތައް ވެހިކަލަކަށް އަރުވާފައި | ގެޓީ އިމޭޖަސް
އީރާނާ ދެކޮޅަށް ހަނގުރާމަ ފެށި ފަހުން މިހާތަނަށް އެމެރިކާގެ 18 ސިފައިން މަރުވެ، 624 މީހުން ޒަޚަމްވެއްޖެ ކަމަށް ސީއެންއެން އިން ރިޕޯޓުކޮށްފި އެވެ.
އީރާނުން މިދިޔަ ހަފުތާގައި ދިން ހަމަލާތަކުގައި ޒަޚަމްވި މީހުންގެ އަދަދު ހާމަކުރުމުގައި ދެފުށް ފެންނަ ސިޔާސަތެއް ނުގެންގުޅޭ ކަމަށް ބުނެ ސުވާލުތައް އުފެދިފައިވަނިކޮށް، އެމެރިކާގެ ދިފާއީ ވުޒާރާ (ޕެންޓަގަން) އިން ހަނގުރާމައިގެ ގެއްލުންތަކާ ބެހޭ މައުލޫމާތު ހިމެނޭ ޑޭޓާބޭސް ހޮނިހިރު ދުވަހު އަޕްޑޭޓްކޮށްފައިވާ ކަމަށް ސީއެންއެން އިން ބުނެފައިވެ އެވެ. މި އާ މައުލޫމާތުތަކާއެކު، އިތުރު 140 މީހަކު ޒަޚަމްވިކަން ރިކޯޑުކޮށްފައިވާއިރު، އީރާނުގެ ހަމަލާތަކުގައި އެންމެ ފަހުން މަރުވި ހަތަރު ސިފައިންގެ މައުލޫމާތު ވެސް ވަނީ އަލުން ޑޭޓާބޭސްގައި ހިމަނާފަ އެވެ.
"ޑިފެންސް ކެޝުއަލްޓީ އެނަލިސިސް ސިސްޓަމް" (ޑީ.ސީ.އޭ.އެސް) އަށް ގެނައި މި ބަދަލާއެކު، ޖުލައި މަހުގެ 7 ވަނަ ދުވަހުން ފެށިގެން މަރުވާ އަދި ޒަޚަމްވާ މީހުންގެ މައުލޫމާތު ހިމެނުމަށް "އޯވަސީސް އޮޕަރޭޝަންސް" ގެ ނަމުގައި އާ ގިންތިއެއް ވެސް ވަނީ ތައާރަފުކޮށްފަ އެވެ.
ޕެންޓަގަންގެ އާ ތަފާސްހިސާބުތަކާއި "އޮޕަރޭޝަން އެޕިކް ފިއުރީ" ގެ އަދަދުތައް އެއްކޮށްލުމުން، ފެބްރުއަރީ 28 ގައި އެމެރިކާއިން އީރާނާ ދެކޮޅަށް ހަނގުރާމަ ފެށި ފަހުން މިހާތަނަށް 18 ސިފައިން މަރުވެ، 624 މީހުން ވަނީ ޒަޚަމްވެފަ އެވެ. ޒަޚަމްވި މީހުންގެ މި އަދަދަކީ މިދިޔަ ހަފުތާގައި ސީ.އެން.އެން އިން ރިޕޯޓުކުރި އެންމެ މަތީ އަދަދު ކަމަށްވާ 482 އާ އަޅާބަލާއިރު ބޮޑު އިތުރުވުމެކެވެ.
އީރާނުގެ ހަމަލާތައް ކުރިއަށްދިޔަ ވަގުތު، ޑީ.ސީ.އޭ.އެސް ސިސްޓަމުން، މަރުވި އަދި ޒަޚަމްވި މީހުންގެ އަދަދުތައް މަދުވަމުންދިއުމާ ގުޅިގެން، މީޑިއާތަކާއި ގާނޫނު ހަދާ މަޖިލީހުގެ މެންބަރުންގެ ފާޑުކިޔުން ޕެންޓަގަންއަށް ވަނީ އަމާޒުވެފަ އެވެ. މިކަމާ ގުޅިގެން ސެނެޓްގެ އާމްޑް ސާވިސަސް ކޮމިޓީގައި ހިމެނޭ ޑިމޮކްރެޓިކް ޕާޓީގެ 12 މެންބަރަކު ވަނީ، ތަފާސްހިސާބުތަކަށް މިފަދަ ބަދަލުތަކެއް އަންނަން މެދުވެރިވި ސަބަބު ސާފުކޮށްދިނުމަށް އެދި ދިފާއީ ވަޒީރު ޕީޓް ހެގްސެތަށް ބުރާސްފަތި ދުވަހު ސިޓީއެއް ފޮނުއްވާފަ އެވެ.
