އެމެރިކާ އިން އަލުން ހަމަލާ ދީފި ނަމަ، ހަނގުރާމަ ފުޅާވާނެ ކަމުގެ އިންޒާރު އީރާން އިން ދީފި

އީރާން އަށް ދެމުން އަންނަ ހަމަލާތައް އެމެރިކާ އިން އަލުން ދީފި ނަމަ، މެދުއިރުމަތީގެ ސަރަހައްދުގައި ހަނގުރާމަ ފުޅާވެގެން ދާނެކަމުގެ އިންޒާރު އީރާން އިން ދީފި އެވެ.

އީރާން އިން މިފަދަ އިންޒާރެއް ދީފައި ވަނީ، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އެމެެރިކާ އަށް ވަޑައިގަންނަވަން އުޅުއްވާ ވަގުތާ ދިމާކޮށެވެ.

އީރާންގެ ސިފައިންގެ ތަރުޖަމާން މުޙައްމަދު އަކްރަމީނިއާ ސަރުކާރުގެ ޓެލެވިޒަން އަށް ދިން ބަޔާނެއްގައި ބުނީ އެމެރިކާ އިން އަނެއްކާ ވެސް ޔަހޫދީ ދައުލަތުގެ ބަހަށް ހެއްލިއްޖެ ނަމަ، ނުވަތަ އެމީހުންނާ އެކު ހަރަކާތްތެރިވެ ހަނގުރާމަ ކުރިއަށް ގެންދިއުމަށް ނިންމަފައިފި ނަމަ، މެދުއިރުމަތީގެ ސަރަހައްދުގެ ހަނގުރާމަ އިތުރަށް ފުޅާވެގެން ދާނެ ކަމަށެވެ. 

މީގެ އިތުރުން އަކްރަމީނިއާ ބުނީ، މެދުއިރުމަތީގެ ސަރަހައްދުގައި މިހާރު އެމެރިކާ ބަލިކަށިވަމުން އަންނަ ކަމަށާއި، އެމެރިކާގެ ޙާލަތު ވެސް ދަށްވެފައިވާ ކަމަށެވެ. އަދި މިހާރު އެމެރިކާ އިން މަސައްކަތް ކުރަމުން އަންނަނީ އައު ސިޔާސަތެއް ހޯދުމަށް ކަމަށް ވެސް އޭނާ ވަނީ ލަފާކޮށްފައި އެވެ. އެއާއެކު އޭނާ ބުނީ، އެމެރިކާގެ ފަރާތުން ކުރިމަތި ވެދާނެ ކޮންމެ ފަދަ ޙާލަތަކަށް ވެސް އީރާން އޮތީ ތައްޔާރަށް ކަމަށެވެ. 

ހުކުރު ދުވަހު އިސްރާއީލް އިން ވަނީ، މި ހަފުތާގެ އަންގާރަ ދުވަހު ނަތަންޔާހޫ އެމެރިކާ އަށް ވަޑައިގަންނަވާނެ ކަމަށް ބުނެފައި އެވެ. އަދި އެ ދަތުރުފުޅުގައި ނަތަންޔާހޫ އާއި، އެމެރިކާގެ ރައީސް ޑޮނަލްޑް ޓްރަމްޕް ބައްދަލު ކުރައްވާނެ ކަމަށް ވެސް ބުނެފައިވެ އެވެ. ނަތަންޔާހޫގެ މި ދަތުރުފުޅު ކުރައްވަން ހަމަޖެހިފައި މި ވަނީ، އެމެރިކާ އާއި އީރާާންއާ ދެމެދު އޮތް ނުތަނަވަސްކަން އިތުރުވެފައިވާ ވަގުތެއްގައި އެވެ. 

އީރާންގެ ސިފައިންގެ ފަރާތުން މި އިންޒާރު ދީފައި ވަނީ ސަރަހައްދުގައި ހަނގުރާމަ އިތުރަށް ފުޅާވުމުން ނުރައްކާތެރި ނަތީޖާތައް ނުކުންނާނެ ކަމުގެ މެސެޖެއް ފޯރުކޮށްދިނުމަށެވެ. އީރާން އިން ވަނީ އެމެރިކާ އާއި އިސްރާއީލްގެ ހަރަކާތްތަކަށް ރައްދު ދިނުމަށް ތައްޔާރަށް އޮތްކަން ކަށަވަރު ކޮށްދީފައި އެވެ. 

މި ޙާލަތުގައި ބައިނަލްއަޤުވާމީ މުޖުތަމައުން އިންތިޒާރު ކުރަމުން އަންނަނީ، އެމެރިކާ އިން ދެން ނިންމާނެ ނިންމުމަކަށެވެ. ނުވަތަ ކުރިއަށް އޮތް ތަނުގައި އެމެރިކާާ އިން އަމަލު ކުރާނެ ގޮތެއްގެ މައްޗަށެވެ. ބައިނަލްއަޤުވާމީ މުޖުތަމައުން އަންނަނީ އެމެރިކާ އާއި އީރާންއާ ދެމެދު އޮތް ނުތަނަވަސްކަން ކުޑަކޮށް، ދާއިމީ ޙައްލެއް ޤާއިމު ކުރުމަށް މަސައްކަތް ކުރަމުންނެވެ.