އީރާނާއި އެމެރިކާ ހަމަލާތައް މެދުކަނޑާލައިފި

ވޮޝިންޓަނުން އީރާނަށް ދެމުންދިޔަ ހަމަލާތައް ފާއިތުވި ދެ ރޭ ހުއްޓާލުމާ ގުޅިގެން، މެދުއިރުމަތީގައި ތިބި އެމެރިކާގެ ބައިވެރިންނަށް އަމާޒުކޮށް ދެމުންދިޔަ ބަދަލުހިފުމުގެ ހަމަލާތައް މެދުކަނޑާލާފައިވާ ކަމަށް އީރާނުން އާދީއްތަ ދުވަހު ބުނެފި އެވެ.

އީރާނުން މިކަން އިޢުލާނުކޮށްފައި މިވަނީ، ފަސްވަނަ މަހަކަށް ދެމިގެން ގޮސްފައިވާ މި ހަނގުރާމައިގެ ހަމަލާތައް އެމެރިކާއިން މަޑުޖައްސާލުމާ ގުޅިގެންނެވެ. އަދި ހަމަލާތައް އިތުރަށް ވަރުގަދަކުރުމަށް އެމެރިކާއިން ގެންގުޅޭ ރޭވުންތަކަށް، ހަތިޔާރު މަދުވުމުގެ ސަބަބުން ހުރަސްތަކެއް ކުރިމަތިވެފައިވާ ކަމުގެ ރިޕޯޓުތަކެއް ފެންމަތިވެފައިވާ ދަނޑިވަޅެއްގަ އެވެ.

އީރާނުގެ އަސްކަރިއްޔާގެ ތަރުޖަމާނު މުޙައްމަދު އަކްރަމީނިއާ ވިދާޅުވީ، މީގެ ދެ ރޭ ކުރިއާ ހަމައަށް އެމެރިކާގެ ހަމަލާތައް ކުރިއަށްދިޔަ ނަމަވެސް، ފާއިތުވި ދެ ރޭ އެމެރިކާއިން ހަމަލާދިނުން ހުއްޓާލާފައިވާ ކަމަށެވެ.

އަކްރަމީނިއާ އިތުރަށް ވިދާޅުވީ، އީރާނުގެ ސިޔާސަތަކީ ބަދަލުހިފުން ކަމަށްވާތީ، އެމެރިކާއިން ހަމަލާތައް ހުއްޓާލުމާއެކު އީރާނުންވެސް ބަދަލުހިފުމުގެ އޮޕަރޭޝަންތައް މިހާރު މެދުކަނޑާލާފައިވާ ކަމަށެވެ.

ހުރްމުޒް ކަނޑުއޮޅީގެ ކޮންޓްރޯލް ހޯދުމަށް ކުރަމުންދިޔަ ހަނގުރާމައިގެ ސަބަބުން، ވޮޝިންޓަނާއި ތެހެރާނާ ދެމެދު ކުރިއަށްދިޔަ ޑިޕްލޮމެޓިކް މަސައްކަތްތަކަށް ވަނީ ބުރޫއަރާފަ އެވެ. އަދި މި ހަމަނުޖެހުންތައް ހަކަތަ ފޯރުކޮށްދޭ މުހިންމު ސަރަހައްދުން ބޭރަށް ފެތުރި، އެމެރިކާގެ އަސްކަރީ މަރުކަޒުތަކަށާއި، ސަރަހައްދީ އާގުބޯޓުތަކުގެ އިތުރުން ގަލްފުގެ ގައުމުތަކަށްވެސް ވަނީ ހަމަލާތައް އަމާޒުވެފަ އެވެ.

ފާއިތުވި ދެ ހަފުތާއެއްހާ ދުވަހު ކޮންމެ ރެއަކު އެމެރިކާއިން ބޮން އަޅަމުން ދިއުމަށްފަހު، މިހާރު ހަމަލާތަކަށް އައިސްފައިވާ މަޑުޖެހުމާއެކު އަލުން މަޝްވަރާތައް ފެށިދާނެ ކަމުގެ އުންމީދު ވަނީ އާވެފަ އެވެ. ނަމަވެސް އެމެރިކާގެ މީޑިއާތަކުން ރިޕޯޓުކުރާ ގޮތުގައި، ހަމަލާތައް މެދުކަނޑާލީ ޕެޓްރިއަޓް އިންޓަރސެޕްޓަރ މިސައިލްތަކާއި ދިފާއީ އެހެނިހެން ހަތިޔާރުތައް ހުސްވަމުންދާތީ އެކަމުގެ ފިއްތުންތަކާ ހުރެ އެވެ.

މިދިޔަ ހުކުރު ދުވަހު އެމެރިކާގެ ރައީސް ޑޮނަލްޑް ޓްރަމްޕް، މިއަށްވުރެ މާ ވަރުގަދަ ހަމަލާތަކެއް ދޭނެ ކަމުގެ އިންޒާރު ދެއްވާފައިވީ ނަމަވެސް، އީރާނާ ދެކޮޅަށް ހިންގާ އޮޕަރޭޝަންތައް މިވަގުތު އޮތީ "މަޑުޖައްސާލާފައި" ކަމަށް ޕެންޓަގަންގެ މަސްދަރަކާ ހަވާލާދީ ސީ.އެން.އެން އިން ރިޕޯޓުކޮށްފައިވެ އެވެ.

ނިއުޔޯކް ޓައިމްސް އިން ރިޕޯޓުކޮށްފައިވާ ގޮތުގައި، ހަމަލާތައް ވަރުގަދަކުރުމަށް ރާވާފައިވާ ރޭވުންތައް ފަސްކޮށްފައިވަނީ ހަތިޔާރުގެ ރިޒާވް މަދުވަމުންދާތީ އެވެ. މިކަން އެ ނޫހަށް ކަށަވަރުކޮށްދީފައިވަނީ މި މައުލޫމާތު އެނގޭ ދެ ފަރާތަކުންނެވެ.

ހުކުރު ދުވަހު ވައިޓް ހައުސްގައި ބޭއްވި ބައްދަލުވުމެއްގައި، އެމެރިކާގެ ނައިބު ރައީސް ޖޭ.ޑީ ވޭންސް އާއި އެމެރިކާގެ އިސް ޖެނެރަލް ޑޭން ކޭން، ހަނގުރާމަ އިތުރަށް ފުޅާވެގެން ހިނގައިދާނެތީ އެކަމުގެ ކަންބޮޑުވުން ފާޅުކުރެއްވި ކަމަށް ސީ.އެން.އެން އިން ބުނެ އެވެ.

އެ ނެޓްވޯކުން ރިޕޯޓުކޮށްފައިވާ ގޮތުގައި، ލިބެންހުރި އަސްކަރީ ފުރުސަތުތަކުގެ ބޭނުން ހިފައިގެން ކާމިޔާބު ހަމަލާތަކެއް ދެވިދާނެ ކަމަށް ޖެނެރަލް ކޭން ރައީސް ޓްރަމްޕަށް ދެންނެވިއެވެ. ނަމަވެސް އެކަމުގެ ސަބަބުން ނުކުމެދާނެ ނަތީޖާއާ މެދު އޭނާ ވަނީ އިންޒާރު ދެއްވާފަ އެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަންގާރަ ދުވަހު ވޮޝިންޓަނަށް ކުރައްވާ ދަތުރުފުޅުގެ ކުރިން، އީރާނުގެ އަސްކަރިއްޔާއިން އާދީއްތަ ދުވަހު ވަނީ އިންޒާރު ދީފަ އެވެ. އީރާނުން ބުނީ އެމެރިކާއިން އަލުން ހަމަލާދޭން ފަށައިފިނަމަ، މި ހަނގުރާމަ މިއަށްވުރެ ބޮޑަށް ފުޅާވެގެންދާނެ ކަމަށެވެ.