ހުރްމުޒް ކަނޑުއޮޅި ބެލެހެއްޓުމާ ގުޅޭ ގޮތުން އޮމާން އާއެކު ކުރިއަށްދާ މަޝްވަރާތަކުގައި ކުރިއެރުންތަކެއް ލިބިފައިވާ ކަމަށް އީރާން އިން ބުނެފި

ދުނިޔޭގެ ތެލާއި ގޭހުގެ ވިޔަފާރީގައި މުހިންމު ދައުރެއް އަދާކުރާ ހުރްމުޒް ކަނޑުއޮޅި ބެލެހެއްޓުމާ ގުޅޭ ގޮތުން އޮމާން އާއެކު ކުރިއަށްދާ މަޝްވަރާތަކުގައި ބޮޑެތި ކުރިއެރުންތަކެއް ލިބިފައިވާ ކަމަށް އީރާން އިން ބުނެފި އެވެ.

މި މަޝްވަރާތައް ބާއްވާފައި ވަނީ އީރާންގެ ކޮންޓްރޯލްގެ ދަށުގައި އޮންނަ މި ކަނޑުއޮޅީގެ ބާރު ކަނޑުވާލުމަށް އެމެރިކާ އިން އަލުން ހަމަލާތައް ދޭން ފަށާފައިވާ ދަނޑިވަޅެއްގައި އެވެ.

އީރާންގެ ފޮރިން މިނިސްޓްރީގެ ތަރުޖަމާނު އިސްމާއިލް ބަޣާއީ އާދީއްތަ ދުވަހު ވިދާޅުވީ، އީރާން އާއި އޮމާންގެ ފޮރިން މިނިސްޓަރުންގެ ނައިބުންގެ މެދުގައި މިދިޔަ ހުކުރު އަދި ހޮނިހިރު ދުވަހު އީރާންގައި މަޝްވަރާ ބައްދަލުވުންތަކެއް ބާއްވާފައިވާ ކަމަށެވެ. މި ބައްދަލުވުންތަކުގައި މައިގަނޑު ގޮތެއްގައި މަޝްވަރާކޮށްފައި ވަނީ ދެ ގައުމުގެ އިސްތިގުލާލަށް އިހުތިރާމް ކުރަމުން، ކަނޑު އޮޅިން ދަތުރުކުރާ އުޅަނދު ފަހަރުގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އަމަލު ކުރާނެ އުސޫލުތަކާއި، މެކޭނިޒަމްތަކާ ގުޅޭ ގޮތުންނެވެ.

މި މަޝްވަރާތަކަކީ ވަރަށް ބޭނުންތެރި ބައްދަލުވުން ތަކެއްގެ ގޮތުގައި ސިފަ ކުރައްވަމުން ބަޣާއީ ވިދާޅުވީ، ފަންނީ އަދި ސިޔާސީ ގޮތުން ދެ ގައުމުގެ މެދުގައި އިތުރު މަޝްވަރާތައް ކުރިއަށްދާ ކަމަށެވެ. މީގެ ކުރިން މިދިޔަ ޖޫން މަހު ދެ ގައުމުން ވަނީ ކަނޑުއޮޅިން ދަތުރުކުރާ އުޅަނދުތަކުން ޚިދުމަތުގެ ފީއެއް ނެގުމާ ގުޅޭ ގޮތުން ވާހަކަ ދައްކާފައި އެވެ. ނަމަވެސް އެމެރިކާ އިން ވަނީ އެކަމާ ދެކޮޅު ހަދާފައި އެވެ. އަދި އޮމާންގެ ކަނޑުގެ ސަރަހައްދުން އުޅަނދުތަކަށް ދަތުރު ކުރެވޭނެ ކަމަށް އެ ގައުމުން ބުނުމާ ގުޅިގެން، އީރާން އިން ވަނީ ނުރުހުން ފާޅުކޮށް މަސްރަހު ހޫނުކޮށްފައި އެވެ.

މިދިޔަ ދެ ހަފުތާއެއްހާ ދުވަހު އެމެރިކާ އިން މެދުނުކެނޑި ހަމަލާތައް ދިނުމަށް ފަހު، ވޭތުވެ ދިޔަ 24 ގަޑިއިރު ތެރޭގައި އެމެރިކާގެ އެއްވެސް ހަމަލާއެއް ރެކޯޑު ކުރެވިފައިނުވާ ކަމަށް އީރާން އިން ހޮނިހިރު ދުވަހު ވަނީ ބުނެފައި އެވެ. އެމެރިކާގެ ނޫސް ސައިޓެއް ކަމަށްވާ އެކްސިއޯސް އިން ރިޕޯޓު ކޮށްފައިވާ ގޮތުގައި، ޕެންޓަގަން އިން 14 ވަނަ ރެއަކަށް ހަމަލާ ދިނުމުގެ ޕްލޭނެއް އެމެރިކާގެ ރައީސް ޑޮނަލްޑް ޓްރަމްޕް އަށް ހުށަހެޅި ނަމަވެސް، އޭނާ ވަނީ އެކަން ހުއްޓުވާފައި އެވެ. ޓްރަމްޕް މި ނިންމެވުން ނިންމެވީ، ހުރްމުޒް ކަނޑުއޮޅި އަލުން ހުޅުވާލުމާ ގުޅޭ ގޮތުން މަޝްވަރާކުރުމަށް އޮމާންގެ ވަފުދެއް އީރާން އަށް ދިއުމާ ގުޅިގެން ކަމަށް އެ ރިޕޯޓުގައިވެ އެވެ.

ކަނޑުއޮޅީގެ މިހާރުގެ ހާލަތާ ގުޅޭ ގޮތުން ނޫސްވެރިން ކުރި ސުވާލަކަށް ޖަވާބު ދެއްވަމުން ބަޣާއީ ވިދާޅުވީ، ކަނޑުއޮޅިން ދަތުރުކުރާ އުޅަނދު ފަހަރުގެ ޓްރެފިކަށް އެއްވެސް ބަދަލެއް އައިސްފައި ނުވާ ކަމަށެވެ. ނަމަވެސް އީރާންގެ ދައުލަތުގެ މީޑިއާ އިން ރިޕޯޓު ކޮށްފައިވާ ގޮތުގައި، އާދީއްތަ ދުވަހު އީރާންގެ އަސްކަރިއްޔާ އިން ވަނީ ކަނޑުއޮޅިން ދަތުރު ކުރަން އުޅުނު ހަ އުޅަނދެއް ހުއްޓުވާފައި އެވެ. މި އުޅަނދުތައް ހުއްޓުވާފައި ވަނީ ފާއިތުވި 24 ގަޑިއިރު ތެރޭގައި ދިން އިންޒާރުތަކަށް ބޯނުލެނބުމުން ކަމަށް އީރާން އިން ބުނެ އެވެ.