ވޯލްޑް ކަޕްގެ ފައިނަލް މެޗުގެ ރެފްރީކަން ކުރި ވިންޗިޗް ރިޓަޔަރކޮށްފި
28 ޖުލައި 2026 | އަންގާރަ 04:06ސްލޮވީނިއާގެ ފުޓުބޯޅަ އެސޯސިއޭޝަން އިން ނެރުނު ބަޔާނެއްގައި ބުނެފައި ވަނީ، މިއަހަރުގެ ވޯލްޑް ކަޕްގެ ފައިނަލް ފަހު ހަފުތާއެއް ނުވަނީސް ވިންޗިޗް، އޭނާގެ ތާރީޚީ ރެފްރީ ކަމުގެ ކެރިއަރު ދުނިޔޭގެ އެންމެ އުސް މިނުގައި ހުރެ ނިންމާލާފައިވާ ކަމަށް
ފީފާ ވޯލްޑް ކަޕްގެ ފައިނަލް މެޗުގެ ރެފްރީކަން ހުރި ސްލޮވީނިއާގެ ސްލާވްކޯ ވިންޗިޗް، އަދި އާޖެންޓީނާގެ ކެޕްޓަން މެސީ ވާހަކަ ދައްކަނީ | ގެޓީ އިމޭޖަސް
އެމެރިކާ އާއި ކެނެޑާ އަދި މެކްސިކޯގައި ކުރިއަށް ދިޔަ ފީފާ ވޯލްޑް ކަޕްގެ ފައިނަލް މެޗުގެ ރެފްރީކަން ހުރި ސްލޮވީނިއާގެ ސްލާވްކޯ ވިންޗިޗް، ފުޓުބޯޅަ ރެފްރީކަން ކުރުމުން ރަސްމީކޮށް ރިޓަޔަރ ކޮށްފި އެވެ.
އުމުރުން 46 އަހަރުގެ ވިންޗިޗް ރެފްރީ ކަމުން ރިޓަޔަރ ކޮށްފައިވާކަން، ނުވަތަ ވަކިވެފައިވާކަން ސްލޮވީނިއާގެ ފުޓުބޯޅަ އެސޯސިއޭޝަން އިން ވެސް ވަނީ ކަށަވަރު ކޮށްދީފައި އެވެ.
ސްލޮވީނިއާގެ ފުޓުބޯޅަ އެސޯސިއޭޝަން އިން ނެރުނު ބަޔާނެއްގައި ބުނެފައި ވަނީ، މިއަހަރުގެ ވޯލްޑް ކަޕްގެ ފައިނަލް ފަހު ހަފުތާއެއް ނުވަނީސް ވިންޗިޗް، އޭނާގެ ތާރީޚީ ރެފްރީ ކަމުގެ ކެރިއަރު ދުނިޔޭގެ އެންމެ އުސް މިނުގައި ހުރެ ނިންމާލާފައިވާ ކަމަށެވެ.
ސްޕެއިން އާއި އާޖެންޓީނާ ބައްދަލު ކުރި ފައިނަލް މެޗުގެ ރެފްރީކަން ވިންޗިވް ކުރިއިރު، އޭނާ އަކީ ވޯލްޑް ކަޕްގެ ފައިނަލްގައި އިންސާފު ކުރި ސްލޮވީނިއާގެ ފުރަތަމަ ރެފްރީ އެވެ. މި ކާމިޔާބާއެކު އޭނާ ވެގެން ގޮސްފައި ވަނީ، ފުޓުބޯޅައިގައި އުފެދުނު އެންމެ މޮޅު އެއް ރެފްރީ އަށެވެ.
އޭނާގެ ކެރިއަރުގެ އެންމެ ފަހު ސީޒަންގައި ހޯދި ބޮޑު ކާމިޔާބީ ފާހަގަކުރަމުން، އިންޓަނޭޝަނަލް ފެޑެރޭޝަން އޮފް ފުޓްބޯލް ހިސްޓްރީ އެންޑް ސްޓެޓިސްޓިކްސް (އައިއެފްއެޗްއެޗްއެސް) އިން ވަނީ، އޭނާ އަކީ ވޯލްޑް ކަޕްގެ އެންމެ މޮޅު ރެފްރީގެ ގޮތުގައި ކަނޑައަޅައިފަ އެވެ. މީގެ އިތުރުން، އިޓަލީގައި ދެމުން އަންނަ ޝަރަފުވެރި "ޖޫލިއޯ ކަމްޕަނާޓީ" އެވޯޑު ވެސް އޭނާާ އަށް ވަނީ ލިބިފައި އެވެ.
ވިންޗިޗްގެ ރެފްރީ ކަމުގެ ކެރިއަރަށް ބަލާއިރު، އޭނާ ވަނީ ޔޫރަޕުގެ ބޮޑެތި މުބާރާތްތަކުގައި ފާހަގަ ކޮށްލެވޭ މަސައްކަތްތަކެއް ކޮށްފައި އެވެ. އެގޮތުން ޔޫރޮޕާ ލީގުގެ ތިން ފައިނަލެއްގައި އޭނާ ބައިވެރިވެފައިވާއިރު، 2022 ވަނަ އަހަރު ފްރެންކްފާޓް އާއި ރޭންޖާސް ބައްދަލުކުރި ފައިނަލް މެޗުގައި އިންސާފުކުރީ ވެސް އޭނާ އެވެ.
ސްލޮވީނިއާގެ މަރިބޯއަށް އުފަން ވިންޗިޗް ކެރިއަރު ނިންމާލީ ފީފާގެ އެންމެ ޝަރަފުވެރި މެޗު ކަމަށްވާ ވޯލްޑް ކަޕް ފައިނަލްގައި އިންސާފުވެރި ނިންމުންތަކެއް ނިންމުމަށް ފަހު އެވެ.
