ވޯލްޑް ކަޕްގެ ފައިނަލް އަށް ޗެފެރިން ވަޑައިނުގެންނެވީ، ފީފާގެ ނިންމުންތަކާ ދެކޮޅު ހެދުމުގެ ގޮތުން

ފީފާގެ ނިންމުންތަކާ ދެކޮޅަށް އިހުތިޖާޖު ކުރުމުގެ ގޮތުން ޔުއެފާގެ ރައީސް އަލެކްސެންޑާ ޗެފެރިން، މިއަހަރުގެ ފީފާ ވޯލްޑް ކަޕްގެ ފައިނަލް އަށް ވަޑައިނުގެންނެވިކަން ހާމަވެއްޖެ އެވެ. 

ޔުއެފާގެ ރައީސްގެ ހައިސިއްޔަތުން ޗެފެރިން ވަނީ މެކްސިކޯގައި ބޭއްވި ވޯލްޑް ކަޕް ހުޅުވުމުގެ ރަސްމިއްޔާތުގައި ބައިވެރިވެ ވަޑައިގެންފައި އެވެ. ނަމަވެސް، މުބާރާތުގެ ތެރޭގައި ފީފާ އިން ނިންމި ބައެއް ނިންމުންތަކާ މެދު ހިތްހަމަނުޖެހިވަޑައިނުގަންނަވާތީ، އާދީއްތަ ދުވަހުގެ ރޭ ސްޕެއިން އާއި އާޖެންޓީނާ ބައްދަލު ކުރި ފައިނަލް މެޗަށް ޗެފެރިން ވަޑައިނުގެންނެވި އެވެ. 

ވޯލްޑް ކަޕްގެ ފައިނަލް މެޗު ބޮއިކޮޓް ކުރަން ޗެފެރިން ނިންމެވީ، ފީފާ އިން އެމެރިކާގެ ފްލޯރިން ބަލޮގަންގެ ރަތް ކާޑު ސަސްޕެންޝަން އުވާލުމާ ގުޅިގެންނެވެ. ފީފާގެ އެ ނިންމުމާ ގުޅިގެން، މުބާރާތުގެ ތެރޭގައި ޔުއެފާ އިން ވަނީ އެކަމާ ދެކޮޅަށް ބަޔާނެއް ވެސް ނެރެފައި އެވެ. އަދި އެމެރިކާގެ ރައީސް ޑޮނަލްޑް ޓްރަމްޕް ވަނީ، ބަލޮގަންގެ ސަސްޕެންޝަން އުވާލުމަށް ފީފާގެ ރައީސް ޖިއާނީ އިންފަންޓީނޯގެ އަރިހުން އެދިވަޑައިގެންނެވި ކަމަށް ވިދާޅުވެފައި އެވެ. 

ފީފާގެ ރައީސް އިންފަންޓީނޯ ގެންނަން ބޭނުންވާ ބައެއް ބަދަލުތަކާ އަބަދު ވެސް ޗެފެރިން ދެކޮޅު ހައްދަވާކަން ފާހަގަ ކުރެވެ އެވެ. އޭގެ ތެރޭގައި މެޗުގެ ހާފް ޓައިމްގައި ގެނެސްދޭ ޝޯތަކާއި، އިތުރު ބައެއް އެހެން ކަންކަން ހިމެނެ އެވެ. އަދި މިފަދަ ބަދަލުތައް ޔުއެފާ ޗެމްޕިއަންސް ލީގު އަދި ޔޫރަޕުގެ އެހެން މުބާރާތްތަކުގައި ނުގެންނާނެ ކަމަށް ވެސް ޔުއެފާ އިން ވަނީ ބުނެފައި އެވެ. 

މީގެ އިތުރުން ވޯލްޑް ކަޕްގައި ވާދަ ކުރާ ޓީމުތަކުގެ އަދަދު 64 އަށް އިތުރު ކުރުމަށް ކުރަމުން އަންނަ މަސައްކަތާ ވެސް، ޔުއެފާ އިން ދެކޮޅު ކަމަށް ބުނެފައިވެ އެވެ. އެމެރިކާ އާއި ކެނެޑާ އަދި މެކްސިކޯގައި ނިމުނު ވޯލްޑް ކަޕްގެ ތެރޭގައި އިންފަންޓީނޯ ވަނީ، އެފަދަ ވިސްނުމެއްގެ ވާހަކަ ދައްކަވައިފަ އެވެ. މިފަހަރުގެ ވޯލްޑް ކަޕްގައި 48 ޤައުމު ވާދަ ކޮށްފައިވާއިރު، މިއީ އައު ފޯމެޓަށް ބޭއްވި ފުރަތަމަ ވޯލްޑް ކަޕް އެވެ. 

މީގެ އިތުރުން މިފަހަރުގެ މުބާރާތުގައި ރެފްރީގެ ގޮތުގައި މަސައްކަތް ކުރުމަށް ދިޔަ ސޯމާލިއާގެ އޮމަރްް އަރްޓާން އަށް އެމެރިކާ އިން ނުވަދެވުނުއިރު، ފީފާ އިން ވަނީ އެކަމުގައި ކުރެވޭނެ ކަމެއް ނެތް ކަމަށް ބުނެފައި އެވެ. ނަމަވެސް ޔުއެފާ އިން ވަނީ، އަންނަ އޯގަސްޓު މަހު ޕެރިސް ސެއިންޓް ޖާމަން (ޕީއެސްޖީ) އާއި އެސްޓަން ވިލާ ކުޅޭ ސުޕަ ކަޕްގެ މެޗުގައި ރެފްރީކަން ކުރުމުގެ ދައުވަތު އަރްޓާން އަށް ދީފައި އެވެ. 

މީގެ އިތުރުން މުބާރާތުގެ ޓިކެޓުގެ އަގު ބޮޑުވުމާއި، ބައެއް އެހެން ޤަވާއިދުތަކާ ވެސް ޔުއެފާ އިން ވަނީ ދެކޮޅު ހަދައިފަ އެވެ. އަދި 2028 ވަނަ އަހަރު އޮންނަ ޔޫރޯ މުބާރާތުގެ ޓިކެޓުތައް ހަމަހަމަކޮށް ބަހައްޓަން މަސައްކަތް ކުރާނެ ކަމަށް ވެސް ޔުއެފާ އިން ބުނެފައިވެ އެވެ.