322 މެމްބަރުންގެ ތާއީދާ އެކު، ލޭބާ ޕާޓީގެ ލީޑަރުގެ މަޤާމަށް ބާންހަމް ކުރިމަތި ލައްވައިފި

އިނގިރޭސިވިލާތުގެ ލޭބާ ޕާޓީގެ ލީޑަރުގެ މަގާމަށް، އެންޑީ ބާންހަމް ވަޑައިގަންނަވާނެ ކަމަށް ވަރަށް ބޮޑަށް ބެލެވިއްޖެ އެވެ.

ޤާނޫނު ހަދާ މަޖިލީހުގައި ހިމެނޭ ލޭބާ ޕާޓީގެ މެމްބަރުންގެ ތެރެއިން އެންމެ ގިނަ މެމްބަރުން ބާންހަމް އަށް ތާއީދު ކޮށްފައިވާއިރު، އެ މަގާމަށް ކުރިމަތިލެއްވީ މިހާތަނަށް އޭނާ އެކަންޏެވެ. 

ޤާނޫނު ހަދާ މަޖިލީހުގައި ހިމެނޭ ލޭބާ ޕާޓީގެ 403 މެމްބަރުންގެ ތެރެއިން، 322 މެމްބަރުން ވަނީ ބާންހަމް އަށް ތާއީދު ކުރައްވައިފަ އެވެ. މިއީ އެ މަޤާމު ޔަޤީން ކުރުމަށް ބޭނުންވާ 323 މެމްބަރުންގެ އަދަދަށް ވުރެ، އެއް މެމްބަރު މަދު އަދަދެކެވެ. ބާންހަމް އަށް 323 މެމްބަރުން ތާއީދު ކޮށްފި ނަމަ، އިތުރު ކެންޑިޑޭޓަކަށް ވާދަ ކުރުމުގެ ފުރުސަތެއް ނޯންނާނެ އެވެ. 

ބައެއް މެމްބަރުން ބުނެފައި ވަނީ ބުރާސްފަތި ދުވަހު ބާންހަމް އަށް ވޯޓު ދިނުމުގެ ފުރުސަތު ނުލިބުނު ނަމަވެސް، ޤާނޫނު ހަދާ މަޖިލީހަށް އައުމުން ބާންހަމް އަށް ވޯޓި ދެއްވާނެ ކަމަށެވެ. މިހާރު އޮތް ގޮތުން އިތުރު އެހެން ކެންޑިޑޭޓަކު ވާދަ ކުރާނެ ކަމަށް ނުބެލެވޭތީ، ލޭބާ ޕާޓީގެ ލީޑަރުގެ ގޮތުގައި އަންނަ ހަފުތާގައި ބާންހަމް އިއުލަން ކުރެވޭނެ އެވެ. އަދި ޖުލައި މަހުގެ 20 ވަނަ ދުވަހު އިނގިރޭސިވިލާތުގެ ބޮޑު ވަޒީރުގެ މަގާމަށް އޭނާ އައްޔަން ކުރެވޭނެ ކަމަށް ބެލެވެ އެވެ. 

ބާންހަމް ވަނީ އޭނާ އަށް ތާއީދު ކޮށްދެއްވި ލޭބާ ޕާޓީގެ މެމްބަރުންނަށް ވަރަށް ބޮޑަށް ޝުކުރު އަދާ ކުރައްވައިފަ އެވެ. ބާންހަމް ވިދާޅުވީ، އޭނާ އަށް ލިބުނު ތާއީދަކީ ޕާޓީގެ ހުރިހާ ބަޔަކުން ލިބުނު ތާއީދެއް ކަމަށާއި، މިއީ އިނގިރޭސިވިލާތުގެ ސިޔާސަތަށް އައު އުސޫލެއް ބޭނުންވާ ކަމަށް ގިނަ ބަޔަކު ޤަބޫލު ކުރާ ކަމުގެ ހެއްކެއް ކަމަށެވެ. 

އިނގިރޭސިވިލާތުގެ ބޮޑު ވަޒީރުގެ މަގާމުގައި މިހާރު ހުންނެވި ކިއާ ސްޓާމާ ވަނީ އެ މަގާމުން އިސްތިއުފާ ދެއްވާނެ ކަމަށް އިއުލާން ކުރައްވައިފަ އެވެ. އޭނާ މަގާމުގައި ދެމި ހުންނަވަނީ، ލޭބާ ޕާޓީ އިން އައު ލީޑަރަކު އިންތިޚާބު ކުރުމާ ހަަމައަށެވެ. އިސްތިއުފާ ދެއްވަން ސްޓާމާ ނިންމެވީ، ލޭބާ ޕާޓީގެ އެތެރެއިން ކުރިމަތި ވަމުން ދިޔަ ފިއްތުން ތަކުގެ ސަބަބުންނެވެ.