އިނގިރޭސިވިލާތުގެ ކުރީގެ މިނިސްޓަރު އޭން ވިޑެކޯމްބް މަރުވެފައި އޮއްވާ ފެނިއްޖެ، ތުހުމަތު ކުރެވެނީ އަނިޔާވެރި ގޮތަކަށް މަރާލީ ކަމަށް

އިނގިރޭސިވިލާތުގެ ކުރީގެ މިނިސްޓަރު އަދި އެ ޤައުމުގެ ސިޔާސީ މައިދާނުގައި މަޝްހޫރުކަން ހޯދާފައިވާ އޭން ވިޑެކޯމްބް އަމިއްލަ ގޭގައި މަރުވެފައިވާ އޮއްވާ ފެނިފައިވާއިރު، އޭނާ މަރާލި ކަމުގެ ތުހުމަތުގައި މީހަކު ހައްޔަރު ކޮށްފި އެވެ. 

ޑެވޮން އެންޑް ކޯންވޯލް ފުލުހުން ބުނެފައި ވަނީ އުމުރުން 78 އަހަރުގެ ވިޑެކޯމްބް މަރުވެފައި އޮއްވާ ފެނުނީ މިދިޔަ ބުރާސްފަތި ދުވަހު، އޭނާ ދިރިއުޅުއްވާ ގޭގެ ތެރެއިން ކަމަށެވެ. ފުލުހުން ބުނެފައި ވަނީ، އޭނާ މަރުވެފައި އޮއްވާ ފެނުނުއިރު ހަށިގަނޑުގައި ބޮޑެތި ޒަޚަމު ތަކެއް ހުރި ކަމަށެވެ. 

މި މައްސަލައިގައި ފުލުހުން ވަނީ އިނގިރޭސިވިލާތަށް ނިސްބަތްވާ ދޮން ނަސްލުގެ ފިރިހެނެއް ހައްޔަރު ކޮށްފައި އެވެ. އޭނާ މިހާރު ފުލުހުންގެ ބަންދުގައި ބަހައްޓާފައި ހުރިއިރު، އެއީ އުމުރުން 26 އަހަރުގެ މީހެކެވެ. ނަމަވެސް، އޭނާއާ ގުޅޭ އިތުރު މައުލޫމާތެއް ފުލުހުން ހާމަ ކޮށްފައި ނުވެ އެވެ. 

އޭން ވިޑެކޯމްބްގެ ގެ ކައިރީގައި އެމްބިއުލާންސް އަދި ފުލުހުން ޙަރަކާތްތެރިވާ މަންޒަރު. | ރޮއިޓާސް

މި ހާދިސާއާ ގުޅޭ ގޮތުން ފުލުހުން އިތުރަށް ބުނެފައި ވަނީ، މިއީ ޓެރަރިޒަމްގެ އަމަލެއް ކަމަށް ނުބެލެވޭ ކަމަށާއި، އަދި މިއީ ސިޔާސީ މަގުސަދެއްގައި ހިންގާފައިވާ އަމަލެއްކަން ދޭހަވާ އެއްވެސް މައުލޫމާތެއް މިހާތަނަށް ލިބިފައި ނުވާ ކަމަށެވެ. އަދި މި މައްސަލައިގެ ތުހުމަތުގައި ހައްޔަރު ކޮށްފައިވާ މީހާ އަކީ ވިޑެކޯމްބް ދަންނަ މީހެއްތޯ، ނުވަތަ ނޫންތޯ ބުނަން ވެސް އަދި މާ އަވަސް ކަމަށް ފުލުހުން ބުނެފައިވެ އެވެ.

މިކަމާ ގުޅިގެން އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވިދާޅުވީ، އެއީ ކުއްލި ސިހުމެއް ލިބިވަޑައިގެންނެވި އަދި ވަރަށް ބިރުވެރި ޚަބަރެއް ކަމަށެވެ. ސްޓާމާގެ އިތުރުން އިދިކޮޅު ކޮންޒަވޭޓިވް ޕާޓީގެ ލީޑަރު ކެމީ ބޭޑެނޮކް ވެސް ވަނީ މި ހާދިސާއާ ގުޅިގެން ހިތާމަ ފާޅު ކުރައްވައި، އެއީ އަނިޔާވެރި އަމަލެއް ކަމަށް ވިދާޅުވެފައި އެވެ. 

ވިޑެކޯމްބް އަކީ އިނގިރޭސިވިލާތުގެ ސިޔާސީ ދާއިރާގައި ފާހަގަ ކޮށްލެވޭ ބޭފުޅެކެވެ. އޭނާ ވަނީ ކެންޓްގެ މެއިޑްސްޓޯމް ދާއިރާގެ މެމްބަރުކަން 23 އަހަރު ވަންދެން ކުރައްވައިފަ އެވެ. އަދި ކޮންޒަވޭޓިވް ޕާޓީގެ ސަރުކާރުގައި މިނިސްޓަރުކަން ކުރެއްވިއިރު، ފަހުން އޭނާ މަސައްކަތް ކުރެއްވީ ރިފޯމް ޔޫކޭގެ ތަރުޖަމާނުގެ ގޮތުގައި އެވެ.