އިސްރާއީލުން ހިފާފައިވާ ހުޅަނގު އައްސޭރީގައި ހުރި މިސްކިތެއްގައި އިސްރާއީލުގެ ވަޒަންވެރިން އަލިފާން ރޯކޮށްލައިފި

އިސްރާއީލުން ހިފާފައިވާ ހުޅަނގު އައްސޭރީގައި ހުރި މިސްކިތެއްގައި އިސްރާއީލުގެ ވަޒަންވެރިން އަލިފާން ރޯކޮށްލައިފި އެވެ.

އަލް ޖަޒީރާ އިން ރިޕޯޓުކޮށްފައިވާ ގޮތުގައި ހޮނިހިރު ދުވަހުގެ ރެއަކީ ހިފާފައިވާ ހުޅަނގު އައްސޭރީގެ އެކި ސަރަހައްދުތަކުގައި ދިރިއުޅޭ ފަލަސްތީނު ރައްޔިތުންނަށް ނިދިނަގައިލަން ޖެހުނު ބިރުވެރި ރެއެކެވެ.

ހުޅަނގުއައްސޭރީގައި ފަލަސްތީނުގެ ރައްޔިތުން މިހާރު ތިބީ އެއްވެސް އެހީތެރިކަމެއް ނުލިބޭ ފަދަ ބަންދު ހާލަތެއްގަ އެވެ. އަލިފާން ނިއްވާ މީހުންނަށް ގުޅޭނެ ގޮތެއް ނެތްއިރު، ފަލަސްތީނުގެ ފުލުހުންގެ ފަރާތުން ނުވަތަ ވަޒަންވެރިންނަށް ހިމާޔަތްދޭ އިސްރާއީލުގެ ސިފައިންގެ ފަރާތުން ވެސް އެއްވެސް ރައްކާތެރިކަމެއް ނުލިބޭ ކަމަށް ވެސް އަލްޖަޒީރާ އިން ރިޕޯޓުކޮށްފައިވެ އެވެ.

ޔަހޫދީ ވަޒަންވެރިން ދެމުންދާ އަލިފާނުގެ ހަމަލާތަކުން އެމީހުންގެ ގެދޮރު ސަލާމަތްކުރުމަށާއި، އާއިލާގެ ލޯބިވާ މީހުން ހިމާޔަތްކުރުމަށްޓަކައި ފަލަސްތީނު ރައްޔިތުން ތިބީ ނުނިދާ ހޭލާ ކަމަށް ވެސް އަލް ޖަޒީރާ އިން ވަނީ ރިޕޯޓުކޮށްފަ އެވެ.

ރޭގަނޑުގެ ވަގުތު މަގުމަތީގައި އުޅުނު ކޮންމެ މީހަކަށް ވެސް އިސްރާއީލުގެ ވަޒަންވެރިންގެ ފަރާތުން ނުރައްކާތަކާ ކުރިމަތިލާން ޖެހުނު ކަމަށާއި، ވަޒަންވެރިން ވަނީ މަގުތަކުގައި ވަގުތީ ޗެކްޕޯސްޓްތައް ހަދައި، ފަލަސްތީނުގެ ކާރުތައް ހުއްޓުވައި، އޭގެ ތެރެއަށް އޮއްގަލުން ހަމަލާދީ، ޑްރައިވަރުންނާއި ފަސިންޖަރުންނަށް އަނިޔާކޮށްފަ އެވެ.

ހޮނިހިރު ދުވަހު ހިފާފައިވާ ހުޅަނގު އައްސޭރީގައި އިސްރާއީލު މީހުންނާއި ފަލަސްތީނު މީހުންނާ ދެމެދު ވަރުގަދަ ކުރިމަތިލުންތަކެއް ހިނގާފައިވާ ކަމަށް އިސްރާއީލުގެ އަސްކަރިއްޔާއިން ބުނެފައިވެ އެވެ. މިއީ ހުޅަނގު އައްސޭރީގެ އެހެން ސަރަހައްދުތަކުގައި ހިނގި ކުރިމަތިލުންތަކެއްގައި ހަ މީހުން މަރުވިތާ އެއް ދުވަސް ފަހުން ހިނގި ހާދިސާއެކެވެ.

ހެބްރޯންއާ ކައިރީގައި އޮންނަ، އިސްރާއީލުން ޣައިރު ގާނޫނީ ގޮތެއްގައި އާބާދުވެފައިވާ ކިރްޔަތު އަރްބާ ކައިރީގައި ހަރަކާތްތެރިވާ ހަތިޔާރުއެޅި އިސްރާއީލުގެ ވަޒަންވެރިން | އޭއެފްޕީ

2023 އޮކްޓޯބަރު 7 ގައި ހަމާސްއިން އިސްރާއީލަށް ދިން ހަމަލާއާ ގުޅިގެން ޣައްޒާ ހަނގުރާމަ ފެށުނު ފަހުން، އިސްރާއީލުން ހިފާފައިވާ ހުޅަނގު އައްސޭރީގައި ހިންގާ އަނިޔާވެރި އަމަލުތައް ވަނީ ވަރަށް ބޮޑަށް އިތުރުވެފަ އެވެ.

އިސްރާއީލުގެ އަސްކަރިއްޔާއިން ބުނި ގޮތުގައި ހޮނިހިރު ދުވަހުގެ ކުރިމަތިލުންތައް ހިނގާފައިވަނީ ހުޅަނގު އައްސޭރީގެ ދެކުނުގައި އޮންނަ ސޫސިޔާ ނަމަކަށް ކިޔާ އުސް ބިމެއްގައި ހަދާފައިވާ ވަޒަންވެރިންގެ އާބާދީއެއްގަ އެވެ. އެތަނުގައި އިސްރާއީލު މީހުންނާއި ފަލަސްތީނު މީހުން ވަނީ އެއްބަޔަކު އަނެއް ބަޔަކަށް އޮއްގަލުން ހަމަލާދީފަ އެވެ.

"އޭގެ ފަހުން، ޓެރަރިސްޓަކު (ފަލަސްތީނު މީހަކު) އިސްރާއީލުގެ އާންމު ރައްޔިތެއްގެ އަތުން ހަތިޔާރެއް ފޭރިގަނެ، ވައިގެ ތެރެއަށް ބަޑިޖެހި،" އަސްކަރިއްޔާއިން ބުންޏެވެ.

މީގެ އިތުރުން، އޮއްގަލުން ދިން ހަމަލާތަކުގެ ސަބަބުން އިސްރާއީލުގެ އާންމު ރައްޔިތަކަށް އަނިޔާވެގެން ފަރުވާއަށް ގެންގޮސްފައިވާ ކަމަށާއި، އެ ސަރަހައްދުގައި މަގުތައް ބަންދުކޮށް "ޓެރަރިސްޓް" ހޯދުމުގެ މަސައްކަތް ސިފައިން ކުރަމުންދާ ކަމަށް ވެސް އިސްރާއީލުގެ އަސްކަރިއްޔާއިން ބުނެފައިވެ އެވެ.

ހުކުރު ދުވަހު ހުޅަނގު އައްސޭރީގެ އުތުރުގައި އޮންނަ ތަލް އަވަށުގައި އިސްރާއީލުގެ ވަޒަންވެރިންނާއި ފަލަސްތީނު މީހުންނާ ދެމެދު ހިނގި މިފަދަ ކުރިމަތިލުމެއްގައި އިސްރާއީލުގެ ދެ މީހުންނާއި ފަލަސްތީނުގެ ހަތަރު މީހުން ވަނީ މަރުވެފަ އެވެ.

އިރުމަތީ ގުދުސް ނުހިމެނޭހެން، ބައިނަލްއަގުވާމީ ގާނޫނުތަކާ ޚިލާފަށް ހުޅަނގު އައްސޭރީގައި ގާއިމުކޮށްފައިވާ އާބާދީތަކުގައި އިސްރާއީލުގެ 500،000 އަށްވުރެ ގިނަ މީހުން ދިރިއުޅެ އެވެ.

އިސްރާއީލުގެ ތަފާސްހިސާބުތަކުން ދައްކާ ގޮތުގައި، ޣައްޒާ ހަނގުރާމަ ފެށުނު ފަހުން ފަލަސްތީނުން ދިން ހަމަލާތަކުގައާއި އިސްރާއީލުގެ އަސްކަރީ އޮޕަރޭޝަންތަކުގައި، އާންމުންނާއި ސަލާމަތީ ބާރުތަކުގެ މީހުން ހިމެނޭހެން އިސްރާއީލުގެ މަދުވެގެން 48 މީހުން ވަނީ މަރުވެފަ އެވެ.

ފަލަސްތީނުގެ ސިއްހީ ވުޒާރާގެ މައުލޫމާތަށް ބިނާކޮށް އޭއެފްޕީން އެކުލަވާލާފައިވާ ހިސާބުތަކުން ދައްކާ ގޮތުގައި، ހަމަ އެ މުއްދަތުގެ ތެރޭގައި ހުޅަނގު އައްސޭރީގައި އިސްރާއީލު ސިފައިންނާއި ވަޒަންވެރިން ވަނީ ފަލަސްތީނުގެ މަދުވެގެން 1،097 މީހުން ޝަހީދުކޮށްލާފަ އެވެ. މީގެ ތެރޭގައި ހަނގުރާމަވެރިންނާއި އާންމު ރައްޔިތުން ވެސް ހިމެނެ އެވެ.