ޣައްޒާ އަށް އިސްރާއީލުން ދިން ވަރުގަދަ ހަމަލާތަކެއްގައި 5 މީހުން ޝަހީދު ވެއްޖެ
ޣައްޒާގެ ސުލްހައިގެ މަޝްވަރާތައް ގާހިރާގައި ކުރިއަށްދާއިރު، އިސްރާއީލުން ދެމުންދާ ހަމަލާތަކުގައި ފަލަސްތީނުގެ ގިނަ ބަޔަކު ދަނީ ޝަހީދުވަމުން. ހަމަލާބަދަލުކުރުން ހުއްޓާލުމުގެ އެއްބަސްވުމަށް އަމަލުކުރަން ފެށިފަހުން 1،000 އަށްވުރެ ގިނަ މީހުން ޝަހީދުވެފައިވާއިރު، މި ހަމަލާތަކާ ގުޅިގެން ޣައްޒާގެ ރައްޔިތުން ވަނީ އިންސާނީ ބޮޑު ކާރިސާއެއްގެ ތެރޭގައި.
ފަލަސްތީނުގެ ޣައްޒާ ސިޓީގެ މެދުތެރޭގެ ސަރަހައްދުތަކަށް އިސްރާއީލުން ދިން ވަރުގަދަ ހަމަލާތަކާ އެކު އެ ސަރަހައްދުން ބޯ ދުމާއި އަލިފާން އަރަނީ | ސްކްރީން އިމޭޖް
ފަލަސްތީނުގެ ސިއްހީ އޮފިޝަލުންނާ ހަވާލާދީ ރިޕޯޓްކޮށްފައިވާ ގޮތުގައި، އާދީއްތަ ދުވަހު އިސްރާއީލުން ޣައްޒާއަށް ދިން ހަމަލާތަކުގައި 9 އަހަރުގެ އަންހެން ކުއްޖަކާއެކު މަދުވެގެން ފަސް މީހުން ވަނީ ޝަހީދުކޮށްލާފަ އެވެ.
މެޑިކަލް އޮފިޝަލުން ބުނި ގޮތުގައި، ޣައްޒާގެ މެދުތެރޭގައި އޮންނަ އަލް-ބުރައިޖް ރެފިއުޖީ ކޭމްޕުގެ އިރުމަތީ ފަރާތުގައި ހުރި ފޭލިގެތަކަކަށް އަމާޒުކޮށް އިސްރާއީލު ސިފައިން ބަޑިޖެހުމުގެ ސަބަބުން، އުމުރުން 9 އަހަރުގެ ތާލާ އަބޫ މަޠަރު ވަނީ ޝަހީދުވެފަ އެވެ. މި ކުއްޖާގެ މަރާ ގުޅޭގޮތުން އިސްރާއީލު ސިފައިން ވަގުތުން އެއްވެސް އެއްޗެއް ބުނެފައެއް ނުވެ އެވެ.
މީގެ އިތުރުން، ޣައްޒާ ސިޓީގެ ސަބްރާ އަވަށުގައި ހުންނަ ދަގަނޑު މަސައްކަތްކުރާ ތަނަކަށް އިސްރާއީލުން ދިން ވައިގެ ހަމަލާއެއްގައި ހަތަރު މީހަކު ވަނީ ޝަހީދުވެފަ އެވެ. މަންޒަރު ދުށް މީހުން ބުނި ގޮތުގައި އިސްރާއީލުން އެ ތަނަށް ތިން މިސައިލް ހަމަލާ ފޮނުވާލާފައިވެ އެވެ.
އިސްރާއީލު ސިފައިން ރޮއިޓާސްއަށް މައުލޫމާތު ދެމުން ބުނެފައިވަނީ، އެމީހުން ހަމަލާދިނީ "ޓެރަރިސްޓުންގެ" އިންފްރާސްޓްރަކްޗަރަކަށް ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް ދީފައެއް ނުވެ އެވެ.
2025 ވަނަ އަހަރުގެ އޮކްޓޯބަރު މަހު އިސްރާއީލާއި ހަމާސްއާ ދެމެދު އެއްބަސްވި ހަމަލާބަދަލުކުރުން ހުއްޓާލުމުގެ އެއްބަސްވުމާއެކު، ޣައްޒާގައި ކުރިއަށްދިޔަ ބޮޑެތި ހަމަލާތައް މެދުކެނޑުނު ނަމަވެސް، އިސްރާއީލުން ދެމުންދާ ހަމަލާތައް ހުއްޓުވުމުގައި އެ އެއްބަސްވުން ވަނީ ނާކާމިޔާބުވެފަ އެވެ. އެ އެއްބަސްވުމަށް އަމަލުކުރަން ފެށި ފަހުން މިހާތަނަށް އިސްރާއީލުގެ ހަމަލާތަކުގައި 1،000 އަށްވުރެ ގިނަ ފަލަސްތީނު މީހުން ވަނީ ޝަހީދުވެފަ އެވެ. ހަމަ އެ މުއްދަތުގެ ތެރޭގައި ޣައްޒާގެ މުޖާހިދުން ދިން ހަމަލާތަކުގައި އިސްރާއީލުގެ ހަތަރު ސިފައިން ވެސް ވަނީ މަރުވެފަ އެވެ.
މި ފަހުގެ ހަމަލާތައް ކުރިމަތިވެފައި މިވަނީ، އެމެރިކާގެ ރައީސް ޑޮނަލްޑް ޓްރަމްޕްގެ ޣައްޒާގެ ސުލްހައިގެ ޕްލޭންގެ ދެވަނަ މަރުހަލާ ތަންފީޒުކުރުމާ ގުޅޭގޮތުން އިތުރު މަޝްވަރާތަކެއް ކުރުމަށް ހަމާސްގެ ލީޑަރުން ގާހިރާއަށް ޒިޔާރަތްކުރައްވަމުން ގެންދަވާ ދަނޑިވަޅެއްގައެވެ.
މި މަޝްވަރާތަކާ ގާތް މަސްދަރުތަކުން ބުނާ ގޮތުގައި، މި ބައްދަލުވުންތަކުގައި ހަމާސްގެ ހަތިޔާރު އަތުލުމާއި އިސްރާއީލު ސިފައިން ޣައްޒާއިން ފޭބުމާ ގުޅޭގޮތުން ވާހަކަދެކެވެމުންދެ އެވެ. ނަމަވެސް މިހާތަނަށް އެއްވެސް ކުރިއެރުމެއް ލިބިފައި ނުވާކަމަށް އެ މަސްދަރުތަކުން ބުނެ އެވެ.
ޣައްޒާގައި ދިރިއުޅޭ 2 މިލިއަން މީހުންގެ ތެރެއިން ގާތްގަނޑަކަށް ހުރިހާ އެންމެންނަކީ އެކި ފަހަރު މަތިން ގެދޮރު ދޫކޮށް ދާންޖެހިފައިވާ މީހުންނެވެ. މިހާރު އެމީހުން ދިރިއުޅެމުންދަނީ އައްސޭރިފަށުގެ ހަނި ބިންކޮޅެއްގައި، ވަގުތީ ފޭލިގެތަކާއި ހަލާކުވެފައިވާ އިމާރާތްތަކުގަ އެވެ. މި ސަރަހައްދު އަދިވެސް އޮތީ ހަމާސްގެ ކޮންޓްރޯލްގެ ދަށުގަ އެވެ.
އިސްރާއީލުގެ ތަފާސްހިސާބުތަކުން ދައްކާ ގޮތުގައި، 2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސްއިން އިސްރާއީލުގެ ބޯޑަރު ހުރަސްކޮށް ދިން ހަމަލާގައި 1،200 މީހުން ވަނީ މަރުވެފަ އެވެ. ޣައްޒާގެ ސިއްހީ ވުޒާރާއިން ބުނާ ގޮތުގައި އެ ދުވަހުން ފެށިގެން މިހާތަނަށް އިސްރާއީލުން ދިން ހަމަލާތަކުގައި ފަލަސްތީނުގެ 73،000 އަށްވުރެ ގިނަ މީހުން ވަނީ ޝަހީދުވެފަ އެވެ.
މަސްދަރު: ރޮއިޓާސް
