ކުންފުނިތަކުގައި މަސައްކަތްކުރާ އާދައިގެ މުވައްޒަފުން ވަޒީފާއިން ވަކިކުރަންވާނީ، ދައުލަތުން ކުރާ އިސްރާފާއި އައްޔަންކޮށްފައިވާ ސިޔާސީ މުވައްޒަފުން މަދުކުރުމަށް ފަހު: ޝަމްހީދު

ކުންފުނިތަކުގައި މަސައްކަތްކުރާ އާދައިގެ މުވައްޒަފުން ވަޒީފާއިން ވަކިކުރަންވާނީ، ދައުލަތުން ކުރާ އިސްރާފާއި އައްޔަންކޮށްފައިވާ ސިޔާސީ މުވައްޒަފުން މަދުކުރުމަށް ފަހުގައި ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާ ތަމްސީލުކުރައްވާ މެންބަރު އަހްމަދު ޝަމްހީދު ވިދާޅުވެއްޖެ އެވެ.

ރާއްޖެޓީވީން ގެނެސްދޭ ޓީވީ ޓޯކް ޕްރޮގްރާމުގައި ވާހަކަ ދައްކަވަމުން މެންބަރު ޝަމްހީދު ވިދާޅުވީ، ފެނަކަ ކޯޕަރޭޝަނާއި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ފަދަ ކުންފުނިތަކަށް މުވައްޒަފުން ނެގިއިރު މި ސަރުކާރުން ދެއްކި ހުއްޖަތަކީ އެ ކުންފުނިތަކުގެ މެންޑޭޓް ފުޅާކޮށް އުމްރާނީ މަސައްކަތްތައް ކުރިއަށް ގެންދިޔުން ކަމަށެވެ. އެގޮތުން ފެނަކައަށް މިސްކިތް ބިނާކުރަން ހަވާލުކޮށްފައިވާކަން ފާހަގަކުރައްވަމުން އޭނާ ވިދާޅުވީ، މި ސަރުކާރުން އެފަދަ މަސައްކަތްތައް ކުރުމުގެ ނަމުގައި އެތައް މުވައްޒަފުންނެއް ކުންފުނިތަކަށް ނަގާފައިވާ ކަމަށެވެ.

ްއެ ސިޔާސަތު އަދިވެސް އެބަ އޮތޭ، މިސްކިތް އަޅަން ހަވާލުކޮށްފަ އޮތް ކޮންޓްރެކްޓް ވެސް އެބައިނޭ، ދެން މިސްކިތް އަޅަން ބޭނުންވާ ތަކެތި ނެތިގެންތޯ މުވައްޒަފުން ކަނޑާލި ސަބަބަކީ، އެހެންވީމަ މި ބަޖެޓް ފޮތުންނާ ސަރުކާރުން އެތައް ފަހަރު އިއުލާންކޮށްފައިވާ ޕްރޮޖެކްޓްތަކުގައި ސޮއިކޮށްފަ އެއޮތީ، އާންމުކޮށް ފެނަކައިން ކުރާ ކަމަކީ އިންޖީނުގެ ހިންގުން، އެ މެންޑޭޓް ފުޅާކުރީ ރަށްރަށުގައި މިސްކިތް އަޅަން، ހިނަވާގެ އަޅަން ހާވަލުކޮށްފަ އެބަހުރި، ސްކޫލްތައް އަޅަން ހަވާލުކޮށްފަ އެބަހުރި، އަދި ފުލެޓް އަޅަން ހަވާލުކޮށްފަ އެބަހުރި. މި މަސައްކަތް ކުރާށޭ ކިޔާފައި މުވައްޒަފުން ނަގާފަ އެހެރީ. އެ މުވައްޒަފުން ގޮސްފަ ހަމަ ފެނަކައަށް ގޮސް ވަޒީފާއެއް ދޭން ބުނީކީ ނޫން، އެ ބޭފުޅުންގެ ރިކުއެސްޓަކަށް ވަޒީފާ ދިނީ.

އަހްމަދު ޝަމްހީދު

ކަން މިހެން އޮތުމާއެކު ވަޒީފާތަކުން މުވައްޒަފުން ވަކިކުރާއިރު، ދައުލަތަށް ހާއްސަ ހާލަތެއް ދިމާވެގެންކަން އުޅޭކަން އެ މުވައްޒަފުންނަށް އަންގަންޖެހޭނެ ކަމަށް ޝަމްހީދު ވިދާޅުވި އެވެ. ޝަމްހީދު ވިދާޅުވީ މުވައްޒަފުން ވަޒީފާތަކުން ވަކިކުރުމުގެ ކުރިން އެންމެ ފުރަތަމަ ވަކިކުރަންޖެހޭނީ ގާނޫނު އަސާސީގެ 115 މާއްދާގެ ދަށުން އައްޔަންކޮށްފައި ތިބި ސިޔާސީ މުވައްޒަފުން ކަމަށެވެ.  އެފަދަ މުވައްޒަފުންނަކީ އެއްވެސް މަސައްކަތެއް ނެތިފައި ތިބޭ ބައެއް ކަމަށާއި، އެފަދަ އެތައް ބަޔަކު މި ސަރުކާރުން އައްޔަންކޮށްފައި އެބަތިބި ކަމަށެވެ. އަދި އެ މީހުންނަށް ދޭ މުސާރަ ވެސް މާ ބޮޑު ކަމަށާއި، އެންމެ މަދުން ލިބޭ މީހާއަށް ވެސް 25،000 ރުފިޔާގެ މުސާރައެއް ލިބޭ ކަމަށް ޝަމްހީދު ވިދާޅުވި އެވެ.

މެންބަރު ޝަމްހީދު ވަނީ 115 ވަނަ މާއްދާގެ ދަށުން އައްޔަންކޮށްފައި ތިބި މުވައްޒަފުން ވަޒީފާއިން ވަކިނުކޮށް ރަށްރަށުގައި ތިބި އާދައިގެ މުވައްޒަފުން ލައްވާ މަސައްކަތް ނުކުރުވައި، އެ މުވައްޒަފުން ވަޒީފާއިން ވަކިކުރާ ހިސާބަށް ދިޔައީ ކީއްވެގެންތޯ ސުވާލު އުފައްދަވައިފަ އެވެ. ޝަމްހީދު އިތުރަށް ވިދާޅުވީ، ސަރުކާރުގެ ކުންފުނިތަކުގައި މަސައްކަތް ކުރާ މުވައްޒަފުން ވަޒީފާތަކުން ވަކިކުރުމަކީ ރަނގަޅު ނިޔަތެއްގައި ކުރާ ކަމެއް ނަމަ، އެ މުވައްޒަފުން ވަކިކުރުމުގެ ބަދަލުގައި އެންމެ ފުރަތަމަ ވަޒީފާއިން ވަކިކުރަން ޖެހޭނީ އައްޔަންކޮށްފައިވާ ސިޔާސީ މުވައްޒަފުން ކަމަށެވެ.

ސަރުކާރު ހިއްސާވާ ކުންފުނިތަކުން 33 އިންސައްތަ މުވައްޒަފުން ވަކިކުރުމަށް ސަރުކާރުން ނިންމާފައިވާއިރު މިއީ 14,000 އަށްވުރެ ގިނަ މުވައްޒަފުން ކަމަށް އެމްޑީޕީން ވަނީ ބުނެފަ އެވެ. ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މިދިޔަ އޭޕްރީލް މަހުގެ 18 ވަނަ ދުވަހު ނެރުނު ސާކިއުލާއެއްގައި، ސަރުކާރުގެ ހަރަދުތައް ކުޑަކުރުމަށް ކަމަށް ބުނެ، ސަރުކާރު ހިއްސާވާ ކުންފުނިތަކުގެ މުވައްޒަފުން މަދުކުރުމަށް ވަނީ އަންގައިފަ އެވެ. މީގެ އިތުރުން، އެޗްޑީސީ އާއި ފެނަކަ ފަދަ ބޮޑެތި ކުންފުނިތަކުން ހަތަރު މަސްދުވަހުގެ މުސާރަ ދިނުމަށް ފަހު އަމިއްލައަށް ވަޒީފާއިން ވަކިވާން ބޭނުންވާ މުވައްޒަފުންނަށް އެ ފުރުސަތު ވެސް މިހާރު ވަނީ ހުޅުވާލައިފަ އެވެ.

ހަރަދު ކުޑަކުރުމުގެ ނަމުގައި އާދައިގެ މުވައްޒަފުން ވަޒީފާތަކުން ވަކިކޮށް، އާއިލާތައް ބިކަކުރަމުންދާއިރު، ސިޔާސީ މަގާމުތަކަށް އައްޔަންކުރާ މީހުންގެ އަދަދު ދަނީ އިތުރުވަމުންނެވެ. ރައީސް މުއިއްޒު ވެރިކަމާ ހަވާލުވެވަޑައިގަތީ ސިޔާސީ މަގާމުތަކުގެ އަދަދު 700 އަށްވުރެ އިތުރު ނުކުރައްވާނެ ކަމަށް ވިދާޅުވެފައި ނަމަވެސް، މިހާތަނަށް 2,000 އަށްވުރެ ގިނަ މީހުން ސިޔާސީ މަގާމުތަކަށް އައްޔަންކޮށްފައިވާ ކަމަށް ބުނެ ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފަ އެވެ.