ތުހުމަތުތަކާ ގުޅިގެން ރިފޯމް ޔޫކޭގެ ލީޑަރު ފަރާޖު މެމްބަރު ކަމުން އިސްތިއުފާ ދެއްވައިފި، އަލުން އިންތިޚާބުގައި ވާދަ ކުރައްވާނެ!

އިނގިރޭސިވިލާތުގެ ކަނާއަތު ފިޔައިގެ ސިޔާސީ ލީޑަރު ނައިޖެލް ފަރާޖް އަށް މާލީ އެހީތެރިކަން ފޯރުކޮށްދިން ފަރާތްތަކާ ގުޅޭ މައްސަލަ ތަކެއް ފެންމަތިވުމާ ގުޅިގެން، ގާނޫނު ހަދާ މަޖިލީހުގެ މެންބަރު ކަމުން އޭނާ އިސްތިއުފާ ދެއްވައިފި އެވެ.

ފަރާޖް އިސްތިއުފާ ދެއްވުމާ ގުޅިގެން އޭނާ ތަމްސީލު ކުރައްވާ ކްލެކްޓަން ދާއިރާގެ ބައި އިލެކްޝަނެއް ބާއްވަން ޖެހިފައިވާއިރު، އެ އިންތިޚާބުގައި އަލުން ވާދަ ކުރައްވާނެ ކަމަށް އޭނާ ވަނީ އިއުލާން ކުރައްވާފައި އެވެ.

އަންގާރަ ދުވަހު ދެއްވި ތަގުރީރެއްގައި ރިފޯމް ޔޫކޭ ޕާޓީގެ ލީޑަރު ވިދާޅުވީ، އޭނާގެ ފަންޑިންގ އާއި ގުޅޭ ގޮތުން ކުރަމުންދާ ތަހުގީގު ތަކަކީ ސިޔާސީ ނުފޫޒު ގަދަ ފަރާތް ތަކުން، ނުވަތަ "އެސްޓެބްލިޝްމަންޓުން" އޭނާ އާއި ދެކޮޅަށް ކުރާ ކަމެއް ކަމަށެވެ. އަދި އޭނާ އެއްވެސް ގޯސް ކަމެއް ކުރައްވާފައި ނުވާނެ ކަމަށް ތަކުރާރުކޮށް ވިދާޅުވަމުން ފަރާޖް ވިދާޅުވީ، އޭނާގެ އަމަލުތަކާ މެދު ގޮތް ނިންމާނީ ކްލެކްޓަންގެ ރައްޔިތުން ކަމަށެވެ. މިއީ އާންމު ރައްޔިތުންނާއި ނުފޫޒު ގަދަ ސިޔާސީ ފަރާތްތަކާ ދެމެދު ކުރެވޭ ހަނގުރާމައެއްގެ ގޮތުގައި އޭނާ ސިފަ ކުރެއްވި އެވެ.

ފަރާޖްގެ މި ނިންމެވުމާ އެކު އިނގިރޭސިވިލާތުގެ މައިގަނޑު ސިޔާސީ ޕާޓީ ތަކުން ވަނީ މި ބައި އިލެކްޝަން ބޮއިކޮޓް ކުރަން ނިންމާފައި އެވެ. މިގޮތުން ވެރިކަން ކުރާ ލޭބަރ ޕާޓީ އާއި، އިދިކޮޅު ކޮންޒަވޭޓިވް ޕާޓީގެ އިތުރުން ލިބަރަލް ޑިމޮކްރެޓްސް އަދި ރިސްޓޯ ބްރިޓަން ޕާޓީ އިން ވެސް ވަނީ ކްލެކްޓަން ދާއިރާގެ ގޮނޑި އަށް ކެންޑިޑޭޓުން ނުނެރޭނެ ކަމަށް ބުނެފައި އެވެ.

މި މައްސަލަ ފެންމަތިވީ، ކުށްވެރިއެއްގެ ގޮތުގައި ސާބިތު ވެފައިވާ ޖޯޖް ކޮޓްރެލްގެ ފަރާތުން ލިބުނު މާލީ މަންފާ ތަކެއް ފަރާޖް ހާމަކުރައްވާފައި ނުވާ ކަމަށް "ދަ ސަންޑޭ ޓައިމްސް" ނޫހުން ރިޕޯޓު ކުރުމާ ގުޅިގެންނެވެ. އެ ނޫހުން ރިޕޯޓު ކޮށްފައިވާ ގޮތުގައި، އުމުރުން 32 އަހަރުގެ ކޮޓްރެލް ވަނީ 2024 ވަނަ އަހަރުގެ އާންމު އިންތިޚާބުގެ ކުރިން ފަރާޖްގެ ސޯޝަލް މީޑިއާގެ މަސައްކަތް ތަކަށް ތިން މުވައްޒަފުން ހޯދައިދީ، އެމީހުންނަށް މުސާރަ ދީފައި އެވެ.

މީގެ އިތުރުން ބަކިންހަމް ޕެލަސް ކައިރިން ކޮޓްރެލް ކުއްޔަށް ހިފާފައިވާ ފަސް ބުރީގެ ގެއެއް ބޭނުން ކުރުމުގެ ފުރުސަތު ވެސް ފަރާޖް އަށް ވަނީ ދީފައި އެވެ.

ޖޯޖް ކޮޓްރެލް އަކީ 2017 ވަނަ އަހަރު މަނީ ލޯންޑަރިންގ ގެ މައްސަލައެއްގައި އެމެރިކާގައި ޖަލަށް ލާފައިވާ މީހެކެވެ. ނަމަވެސް ފަރާޖް ވިދާޅުވީ، އެއީ އޭނާގެ އަމިއްލަ ބޭނުން ތަކަށް ލިބުނު އެހީ ތަކެއް ކަމަށާއި، މަޖިލީހުގެ މިންގަނޑުތައް މިހާރު ބޭނުން ކުރެވެނީ ސިޔާސީ ހަތިޔާރެއްގެ ގޮތުގައި ކަމަށެވެ. އޭނާ އެއްވެސް ގާނޫނަކާ ޚިލާފު ވެފައި ނުވާނެ ކަމަށާއި، ދައުލަތުގެ ފައިސާ އަށް ޚިޔާނާތްތެރިވެފައި ނުވާނެ ކަމަށް ވެސް ފަރާޖް ވިދާޅުވި އެވެ.

އިމިގްރޭޝަންއާ ދެކޮޅަށް ވަރުގަދަ ބަސް މަގަކުން ވާހަކަ ދައްކަވާ ފަރާޖްގެ މައްޗަށް މިހާރު ވަނީ ސުލޫކީ މިންގަނޑުތަކާ ގުޅޭ އިތުރު ތަހުގީގެއް ވެސް ފަށާފައި އެވެ. މި ހުރިހާ ތުހުމަތު ތަކެއް އޭނާ ދޮގު ކުރައްވާއިރު، ކުރިއަށް އޮތް ބައި އިލެކްޝަން އަކީ އޭނާގެ ސިޔާސީ މުސްތަގުބަލަށް ވަރަށް މުހިންމު އިންތިޚާބަކަށް ވެގެންދާނެ އެވެ.