ބޮޑު ވަޒީރު ސްޓާމާގެ އާއިލީ ބުޅާ، ސަރުކާރުގެ ރަސްމީ ކާރު ކޮޅު ތަކުގައި އުފުލި މައްސަލަ ބޮޑު ވެއްޖެ

އިނގިރޭސިވިލާތުގެ ބޮޑު ވަޒީރު ކިއާ ސްޓާމާގެ އާއިލީ ބުޅާ، ސަރުކާރުގެ ރަސްމީ ކާރު ކޮޅު ތަކުގައި އެއް ތަނުން އަނެއް ތަނަށް އުފުލާ މައްސަލަ ބޮޑުވެ، އިދިކޮޅު ކޮންޒަވޭޓިން ޕާޓީ އިން ފާޑު ކިޔުން އަމާޒު ކޯށްފި އެވެ. 

ކެބިނެޓު އޮފީހުން ކަށަވަރު ކޮށްދީފައިވާ ގޮތުގައި  ބޮޑު ވަޒީރުގެ ރަސްމީ ގެކޮޅު ކަމަށްވާ ޑައުނިން ސްޓްރީޓް އާއި، ބޮޑު ވަޒީރުގެ ރެކްރިއޭޝަނަލް ރެސިޑެންސް "ޗެކާސް" އާ ދެމެދު ބޮޑު ވަޒީރުގެ އާއިލީ ބުޅާ އުފުލުމަށް ސަރުކާރުގެ ކާރުތައް ވަނީ ބޭނުން ކޮށްފައި އެވެ.

 މި މައްސަލައިގައި އިދިކޮޅު ކޮންޒަވޭޓިވް ޕާޓީގެ ޗެއާމަން ކެވިން ހޮލިންރޭކް ވިދާޅުވީ، ބޮޑު ވަޒީރު ސްޓާމާ މިހާރު ވަނީ އޭނާގެ ނިންމުންތަކާ މެދު ސުވާލު ނޫފައްދާނެ "ފަސިންޖަރަކު" ހޯއްދަވާފައި ކަަމަށެވެ. އަދި އެ ބުޅާ ސަރުކާރުގެ ކާރު ކޮޅު ތަކުގައި އުފުލާފައިވާ ކަމަށް އޭނާ ވިދާޅުވި އެވެ. 

ހޮލިންރޭކް ވިދާޅުވީ، ޤައުމުގެ އާންމު ރައްޔިތުން ބޮޑެތި އަދަދު ތަކުން ޓެކްސް ދައްކައި، ބިލު ތަކުގެ ތަކުލީފު އުފުލަމުންދާއިރު، ރައްޔިތުންގެ ފައިސާ އިން ބޮޑު ވަޒީރުގެ ބުޅާ އުފުލުމަށް "ކެޓް ޑެލިވަރީ ސާވިސް" ހިންގުމަކީ ބަލައި ގަނެވޭނެ ކަމެއް ނޫން ކަމަށެވެ. 

މީގެ ކުރިން ލޭބާ ޕާޓީ އިން ވަނީ މުއްސަނދި މަހުޖަނުންނަށް ނިސްބަތްކޮށް "ފެޓް ކެޓްސް"ގެ ނަމުން މުޚާތަބު ކޮށްފައިކަން ފާހަގަ ކުރައްވައި ހޮލިންރޭކް ވިދާޅުވީ، މިހާރު ފެންނަނީ އެ ބޭފުޅުންގެ އަމިއްލަ ބުޅާ ސަރުކާާރުގެ ކާރުގެ ފަހަތު ސީޓުގައި ބައިންދައިގެން، ރައްޔިތުންގެ ޚަރަދުގައި އުފުލާ މަންޒަރު ކަމަށެެވެ. 

ނަމަވެސް ސަރުކާރުގެ ޕޭމާސްޓާ ޖެނަރަލް ނިކް ތޯމަސް ސައިމަންޑްސް ވަނީ މިކަމުގައި ސަރުކާރު ދިފާއު ކުރައްވައިފަ އެވެ. އޭނާ ވިދާޅުވީ، ޑައުނިން ސްޓްރީޓްގައި ދިރިއުޅޭ ފަރާތް ތަކުން އެކި ތަންތަނަށް ދަތުރު ކުރާއިރު، އޮންނަ އުސޫލުގެ ތެރެއިން ބުޅާ އުފުލުމަކީ މީގެ ކުރީ ސަރުކާރު ތަކުން ވެސް އަމަލު ކޮށްފައިވާ އޮތް ކަމަށެވެ. 

އެކަމާ ގުޅޭ ގޮތުން ބޮޑު ވަޒީރުގެ އޮފީހުން ބުނެފައި ވަނީ، ބުޅާ އުފުލުމަށް ވަކިން ޚާއްސަ ދަތުރު ތަކެއް ކޮށްފައި ނުވާ ކަމަށެވެ. އެގޮތުން ބުޅާ އުފުލަނީ އެހެން މީހުން ކާރު ތަކުގައި ދަތުރު ކުރާ ވަގުތު ތަކުގައި އެކަނި ކަމަށް ބުނެފައިވެ އެވެ. 

އިނގިރޭސިވިލާތުގައި 2024 ވަނަ އަހަރު އޮތް އާންމު އިންތިޚާބު ކާމިޔާބު ކުރެއްވިތާ ދެ މަސް ފަހުން، ސްޓާމާގެ އާއިލާ އިން ވަނީ "ޕްރިންސް" ނަމަކަށް ކިޔާ ބުޅަލެއް ގެންގުޅެއް ފައްޓަވައިފަ އެވެ. އެ ބުޅާގެ ކުރިން، އެ އާއިލާގައި "ޖޯޖޯ" ނަމަކަށް ނިޔާ ބުޅަލެއް ވެސް ގެންގުޅެފައިވެ އެވެ. 

ބޮޑު ވަޒީރު ސްޓާމާގެ އާއިލާ އިން އެންމެ ފުރަތަމަ ބޭނުންވީ ކުއްތާއެއް ގެންގުޅުމަށެވެ. ނަމަވެސް، އާއިލާގެ އެތެރޭގައި ކުރެވުނު މަޝްވަރާ ތަަކަށް ފަހު، ޑައުނިން ސްޓްރީޓްގައި މިހާރު ވެސް އުޅޭ މަޝްހޫރު "ލެރީ" ބުޅާ އާއެކު އުޅެވޭނެ ފަދަ ބުޅަލެއް ގެންގުޅުމަށް ނިންމެވީ އެވެ. 

މި މައްސަލަ ފެންމަތިވެފައި މި ވަނީ ސަރުކާާރުގެ ޚަރަދުތަކާ މެދު ސުވާލު ތަކެއް އުފެދިފައިވާ ދަނޑިވަޅެއްގައި އެވެ.