އަންޗެލޮޓީ ބޭނުން ވަނީ ބްރެޒިލް އާއެކު ކުރިއަށް ދާން

އިޓަލީގެ ޤައުމީ ފުޓުބޯޅަ ޓީމުގެ ކޯޗުކަމާ ހަވާލުވުމަށް ލިބުނު ފުރުސަތު ދޫކޮށްލައި، ބްރެޒިލް އާއެކު ކުރިއަށް ދާން ކާާލޯ އަންޗެލޮޓީ ނިންމައިފި އެވެ.

އިޓަލީ އަށް ނިސްބަތްވާ އުމުރުން 67 އަހަރުގެ އަންޗެލޮޓީ، ބްރެޒިލްގެ ކޯޗުކަމާ ހަވާލުވީ 2025 ވަނަ އަހަރު އެވެ. އޭނާގެ އިރުޝާދުގެ ދަށުން ބްރެޒިލް އިން ކުޅުނު ފުރަތަމަ މުބާާރާތަކީ މިއަހަރުގެ ފީފާ ވޯލްޑް ކަޕް އެވެ. މުބާރާތުގެ ގަދަ 16 ގައި ނޯވޭ އަތުން ބަލިވެ ބްރެޒިލް ކެޓިއިރު، އަންޗެލޮޓީ ވަނީ ބްރެޒިލްގެ ކޯޗުކަމުން ވަކި ނުވާނެ ކަމަށް ބުނެފައި އެވެ.

ވޯލްޑް ކަޕަށް ފަހު އިޓަލީ އިން ވަނީ އެ ޤައުމުގެ ކޯޗުކަން އަންޗެލޮޓީ އަށް ހުށަހަޅައިފަ އެވެ. ބްރެޒިލްގެ ފުޓުބޯޅަ ފެޑެރޭޝަން އިން ވެސް ވަނީ، އަންޗެލޮޓީ އަށް ހުށަހެޅުމެއް ހުށަހަޅާފައި އޮތް ކަމަށް ބުނެފައި އެވެ. ނަމަވެސް، އަމިއްލަ ޤައުމުން ލިބުނު ހުށަހެޅުން ދޫކޮށްލައި، އަންޗެލޮޓީ ނިންމާފައި ވަނީ ބްރެޒިލްގައި މަޑު ކުރުމަށެވެ.

އެގޮތުން އަންޗެލޮޓީ ބޭނުން ވަނީ ބްރެޒިލް އާއެކު މަސައްކަތްކޮށް، 2028 ވަނަ އަހަރުގެ ކޮޕާ އެމެރިކާ މުބާރާތާއި، 2030 ވަނަ އަހަރުގެ ފީފާ ވޯލްޑް ކަޕްގައި އެ ޓީމަށް ރަނގަޅު ނަތީޖާއެއް ހޯދައި ދިނުމަށެވެ. ބްރެޒިލް އާއެކު މިހާރު އަންޗެލޮޓީ ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ ވެސް 2030 ވަނަ އަހަރު އެވެ. ބްރެޒިލް ފުޓުބޯޅަ ކޮންފެޑަރޭޝަން އިން ވެސް ބޭނުން ވަނީ، އެ ޓީމުގެ ކޯޗަކަށް އަންޗެލޮޓީ ބަހައްޓާށެވެ. 

ރެޖިއާނާާ އިން ކޯޗިން ކެރިއަރު ފެށި އަންޗެލޮޓީ އަކީ މިވަގުތު ދުނިޔޭގައި ތިބި ކޯޗުންގެ ތެރެއިން އެންމެ މޮޅު އެއް ކޯޗެވެ. އޭނާ ވަނީ މިހާތަނަށް ޔުވެންޓަސް، އޭސީ މިލާާން، ޗެލްސީ، ޕެރިސް ސެއިންޓް ޖާމަން (ޕީއެސްޖީ)، ރެއާލް މެޑްރިޑް، ބަޔާން މިއުނިކް، ނަޕޯލީ އަދި އެވަޓަން އަށް ވެސް އިރުޝާދު ދީފައި އެވެ. ރެއާލް އަށް އަންޗެލޮޓީ ދެ ފަހަރެއްގެ މަތިން އިރުޝާދު ދިނެވެ. ރެއާލްގެ ކޯޗުކަން ދޫކޮށްލުމަށް ފަހު އޭނާ ބްރެޒިލްއާ ހަވާލުވީއިރު، ބްރެޒިލް އަކީ އަންޗެލޮޓީ އިރުޝާދު ދޭ ފުރަތަމަ ޤައުމީ ޓީމެވެ.