ހައިޓީ ބަލިކޮށް ފުރަތަމަ މޮޅާ އެކު، ބްރެޒިލް އެއް ވަނަ އަށް

ފީފާ ވޯލްޑް ކަޕްގެ ގުރޫޕު ސީގައި ހައިޓީއާ ދެކޮޅަށް ކުޅުނު މެޗުން މޮޅުވެ، ބްރެޒިލް އިން ގުރޫޕުގެ އެއް ވަނަ މަގާމަށް ޖެހިލައިފި އެވެ.

ހޮނިހިރު ދުވަހުގެ ފަތިހު ފިލަޑެލްފިއާ ސްޓޭޑިއަމްގައި ހައިޓީއާ ދެކޮޅަށް ކުޅުނު މެޗު ބްރެޒިލް އިން ކާމިޔާބު ކުރީ 3-0 އިންނެވެ. މެޗުގައި ބްރެޒިލް އިން އެ ޓީމުގެ ތިން ލަނޑު ވެސް ޖެހީ ފުރަތަމަ ހާފުގައި އެވެ. 

މެޗު ފަށައިގެން 23 ވަނަ މިނެޓުގައި ބްރެޒިލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ބްރެޒިލް އަށް ޖަހައިދިނީ މަޓެއުސް ކޫންޏާ އެވެ. އޭގެ ތޭރަ މިނެޓު ފަހުން ކޫންޏާ ވަނީ އިތުރު ލަނޑެއް ޖަހައި ބްރެޒިލްގެ ލީޑު ފުޅާ ކޮށްފައި އެވެ. އެ ލަނޑު ޖަހަން ކޫންޏާާ އަށް ފުރުސަތު ތަނަވަސްކޮށްދިނީ ވިނީޝިއުސް ޖޫނިއާ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބްރެޒިލްގެ ތިން ވަނަ ލަނޑު ޖެހީ ވިނީޝިއުސް އެވެ. އެ ލަނޑު ޖަހަން ވިނީޝިއުސް އަށް ފުރުސަތު ތަނަވަސްކޮށްދިނީ ލޫކަސް ޕަކޭޓާ އެވެ. މެޗުގެ ދެ ވަނަ ހާފަށް ނިކުމެ ބްރެޒިލް އިން އިތުރު ލަނޑު ޖަހަން ވެސް ފުރުސަތު ތަކެއް ހޯދި އެވެ.

މުބާރާތުގައި ބްރެޒިލްގެ ފުރަތަމަ މެޗުގައި މޮރޮކޯއާ އެއްވަރުވެފައިވާާއިރު، މިއީ ބްރެޒިލް ހޯދި ފުރަތަމަ މޮޅެވެ. މޮޅާ އެކު ބެރްޒިލް އެއް ވަނައިގައި އޮތީ ހަތަރު ޕޮއިންޓާ އެކު އެވެ. ދެ ވަނައިގައި މޮރޮކޯ އަށް ވެސް ލިބެނީ ހަތަރު ޕޮއިންޓެވެ. ނަމަވެސް، ލަނޑުގެ ތަފާތުން ބްރެޒިލް އޮތީ ކުރީގައި އެވެ. ގުރޫޕު ސްޓޭޖުގައި ބްރެޒިލްގެ ފަހު މެޗުގައި ނިކުންނާނީ ސްކޮޓްލެންޑާ ދެކޮޅަށެވެ.