16 އަހަރަށް ފަހު ސްޕެއިން އިން ވޯލްޑް ކަޕް ކާމިޔާބުކޮށްފި
މިއީ ސްޕެއިން އިން 16 އަހަރަށް ފަހު ވޯލްޑް ކަޕް ކާމިޔާބު ކުރި ފުރަތަމަ ފަހަރު. މީގެ ކުރިން ސްޕެއިން އިން ވަނީ 2010 ވަނަ އަހަރު ވެސް ވޯލްޑް ކަޕް ކާމިޔާބު ކޮށްފައި
މެޗުގައި ލަނޑު ޖެހުމަށް ފަހު ފެރާން ޓޮރޭސް އުފާ ފާޅު ކުރަނީ | ރޮއިޓާސް
ފީފާ ވޯލްޑް ކަޕްގެ ފައިނަލްގައި އާޖެންޓީނާ ބަލިކޮށް، ސްޕެއިން އިން މުބާރާތުގެ ޗެމްޕިއަންކަން ހޯދައިފި އެވެ.
އާދީއްތަ ދުވަހުގެ ރޭ ދަންވަރު ކުޅުނު މެޗު ސްޕެއިން އިން ކާމިޔާބު ކުރީ 1-0 އިންނެވެ.
މެޗުގެ ފުރަތަމަ ހާފު އެއްވެސް ޓީމަކަށް ލަނޑެއް ނުޖެހި އެއްވަރު ވެގެން ނިމުނުއިރު، ސްޕެއިން އިން ވަނީ ލަނޑު ޖަހަން ފުރުސަތު ހޯދައިފަ އެވެ.
މެޗުގެ ދެ ވަނަ ހާފުގައި ވެސް ސްޕެއިން އިން ވަނީ ލަނޑު ޖަހަން ގިނަ ހަމަލާތަކެއް އުފައްދައިފަ އެވެ. ނަމަވެސް އާޖެންޓީނާގެ ގޯލު ކީޕަރު އެމިލިއާނޯ މާޓިނޭޒް ވަނީ އެ ހަމަލާތައް ހުއްޓުވައިފަ އެވެ.
މެޗުގެ ފަހު ވަގުތު އާޖެންޓީނާ އަަށް އެންމެ ބޮޑު ގެއްލުމެއް ދެއްކީ، ދެ ވަނަ ރީނދޫ ކާޑާ އެކު އެންޒޯ ފެނާންޑޭޒް އަށް ރަތް ކާޑު ދެއްކުމުންނެވެ. މެޗުގެ ބާކީ ބައި އާޖެންޓީނާ އިން ފުރިހަމަ ކުރަން ޖެހުނީ އެއް ކުޅުންތެރިޔަކު މަދުކޮށެވެ.
މެޗުގެ ފުރިހަމަ ވަގުތު ހަމަވީއިރު އެއްވެސް ޓީމަކަށް ލަނޑެއް ޖެހިފައި ނެތުމުން، އިތުރު ވަގުތުގެ ދެ ހާފު ވަނީ ކުޅެފައި އެވެ. އިތުރު ވަގުތުގެ ފުރަތަމަ ހާފުގައި ސްޕެއިންގެ ނިކޯ ވިލިއަމްސް ލަނޑެއް ޖެހި ނަމަވެސް، އެ ލަނޑު ޖެހުމުގެ ކުރިން ފައުލް ކޮށްފައި ވާތީ ލަނޑު ބަލައިގެންފައެއް ނުވެ އެވެ.
އިތުރު ވަގުތުގެ ދެ ވަނަ ހާފުގެ ކުރީ ކޮޅު ސްޕެއިން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ސްޕެއިން އަށް ޖަހައިދިނީ ފެރާން ޓޮރޭސް އެވެ.
މިއީ ސްޕެއިން އިން 16 އަހަރަށް ފަހު ވޯލްޑް ކަޕް ކާމިޔާބު ކުރި ފުރަތަމަ ފަހަރެވެ. މީގެ ކުރިން ސްޕެއިން އިން ވަނީ 2010 ވަނަ އަހަރު ވެސް ވޯލްޑް ކަޕް ކާމިޔާބު ކޮށްފައި އެވެ.
