ޓްރަމްޕް: ދެން އޮތް ޓާގެޓަކީ އީރާނުގެ ޕިކްއޭކްސް ފަރުބަދައިގެ ފުނުގައި ހުރި ނިއުކްލިއަރ މަރުކަޒު، އެތަނަށް ވަރުގަދަ ހަމަލާތަކެއް ދޭނަން

އީރާނާ ދެކޮޅަށް އެމެރިކާއިން ކުރަމުންދާ ހަނގުރާމަ ނިމުމާ ގާތަށް ވެސް ނުދާކަމަށް ރައީސް ޑޮނަލްޑް ޓްރަމްޕް އަންގާރަ ދުވަހު ވިދާޅުވެއްޖެ އެވެ. އަދި އެމެރިކާގެ އަސްކަރިއްޔާގެ ދެން އޮތް އަމާޒަކީ "ޕިކްއޭކްސް މައުންޓަން" (ކްލަންގ ފަރުބަދަ) އިގެ ނަމުން މަޝްހޫރުވެފައިވާ ފަރުބަދައިގެ، ބިމުގެ އަޑީގައި ހުރި ނިއުކްލިއާ މަރުކަޒެއް ކަމަށް ވިދާޅުވެ ޓްރަމްޕް ވަނީ އިންޒާރު ދެއްވާފަ އެވެ.

"ޕިކްއޭކްސް މައުންޓަން" ކަމަށް ޓްރަމްޕް ހަވާލާ ދެއްވީ އީރާނުގެ ނަޠަންޒް ކައިރީގައި ހުރި މި ފަރުބަދައިގެ ވަރަށް ފުނުގައި ހަދާފައިވާ ނިއުކްލިއާ މަރުކަޒަކަށެވެ. ހުޅަނގުގެ ޖާސޫސީ އިދާރާތަކުން ތުހުމަތުކުރާ ގޮތުގައި އީރާނުން ދަނީ އެ ތަނުގައި ރަސްމީކޮށް އިޢުލާނުނުކޮށް ޔުރޭނިއަމް މުއްސަނދިކުރާ ފެސިލިޓީއެއް ބިނާކުރަމުންނެވެ.

އެ ސަރަހައްދަށް ވަރަށް އަވަހަށް އަދި ވަރަށް ވަރުގަދަ ހަމަލާތަކެއް ދޭނެ ކަމަށް ޓްރަމްޕް ވިދާޅުވި އެވެ. އަދި އާންމުގޮތެއްގައި ހަމަލާދޭނެ އަމާޒުތައް ކުރިއާލާ އިޢުލާނު ނުކުރެއްވި ނަމަވެސް، އެކަމާ ދެކޮޅަށް އީރާނަށް ކުރެވޭނެ އެއްވެސް ކަމެއް ނޯންނާނެ ކަމަށް ޓްރަމްޕް އިތުރަށް ވިދާޅުވި އެވެ.

ލުބުނާނުގެ ރައީސް ޖޯސެފް އައުންއާ އެކު ވައިޓް ހައުސްގައި ބޭއްވި ބައްދަލުވުމެއްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، މިހާރު ލިބިފައިވާ ގެއްލުންތަކުން އަލުން އަރައިގަތުމަށް އީރާނަށް 20 އަހަރަށް ވުރެ ގިނަ ދުވަސް ނަގާނެ ކަމަށް އަންދާޒާ ކުރެވޭ ކަމަށެވެ.

މި މޭރުމުން ވާހަކަދައްކަވަމުން ޓްރަމްޕް ވިދާޅުވީ، އެމެރިކާއިން މިހާރުން މިހާރަށް އެ ސަރަހައްދު ދޫކޮށް ދިޔަ ނަމަވެސް، އީރާނަށް އަލުން އާރާާސްތުކުރުމަށް 20 ނުވަތަ 25 އަހަރު ނަގާނެ ކަމަށެވެ. އަދި އެމެރިކާގެ މަސައްކަތްތައް އަދި މުޅިން ނުނިމޭ ކަމަށާއި، މި ވަގުތު އެ ސަރަހައްދު ދޫކޮށް ނުދާނެ ކަމަށް ވެސް ޓްރަމްޕް ވިދާޅުވި އެވެ.

އެމެރިކާއާ އެކު ކުރަމުންދާ ހަނގުރާމަ އަލުން ފެށުނުތާ ދެ ހަފުތާ ފަހުން، އީރާނުން ވަނީ އަންގާރަ ދުވަހު މެދުއިރުމަތީގައި ދޭ ހަމަލާތައް ވަރުގަދަކޮށްފަ އެވެ. އެގޮތުން އުރުދުން، ކުވެއިތު އަދި ބަހްރެއިނަށް ވެސް ވަނީ ހަމަލާތައް އަމާޒުވެފަ އެވެ.