ޕެންޓަގަނުން އީރާން ހަނގުރާމާގައި އަނިޔާވި ސިފައިންގެ އަދަދު ސިއްރުކުރޭ: ނިއުޔޯކް ޓައިމްސް

އީރާނާއެކު ކުރަމުންދާ ހަނގުރާމައިގައި އަނިޔާވި އެމެރިކާ ސިފައިންގެ އަދަދުތައް ޕެންޓަގަނުން ސިއްރުކުރަމުންދާ ކަމަށް، އެމެރިކާގެ އޮފިޝަލުންނާ ހަވާލާދީ ނިއުޔޯކް ޓައިމްސް ނޫހުން ހޯމަ ދުވަހު ރިޕޯޓްކޮށްފިއެވެ.

މިދިޔަ ހުކުރު ދުވަހު އުރުދުންގައި ހުންނަ އެމެރިކާގެ އަސްކަރީ މަރުކަޒަކަށް އީރާނުން ދިން ހަމަލާއެއްގައި ދެ ސިފައިން މަރުވެ، ހަތަރު މީހަކަށް އަނިޔާވެ، އަދި އެކަކު ވަނީ ގެއްލިފަ އެވެ. ނަމަވެސް ނިއުޔޯކް ޓައިމްސްއިން ރިޕޯޓްކޮށްފައިވާ ގޮތުގައި، އެ ގައުމުގައި ތިބި އެމެރިކާގެ ފައުޖުތަކަށް އަމާޒުކޮށް މިދިޔަ ހަފުތާގެ ތެރޭގައި ދިން އިތުރު ތިން ހަމަލާއެއްގައި އެތައް ބަޔަކަށް ވަނީ އަނިޔާވެފަ އެވެ. މީގެ އިތުރުން މި ހަމަލާތަކުގައި އެމެރިކާގެ ބައެއް ހެލިކޮޕްޓަރުތަކަށް ގެއްލުން ލިބިފައިވާ ކަމަށްވެސް ރިޕޯޓްތައް ބުނެ އެވެ.

އަސްކަރީ މަރުކަޒުތަކަށް ލިބޭ ގެއްލުންތައް ރަސްމީކޮށް ބަލަހައްޓާ "ޑިފެންސް ކެޝުއަލްޓީ އެނަލިސިސް ސިސްޓަމް" (ޑީ.ސީ.އޭ.އެސް) ގައި އަނިޔާވާ މީހުންގެ މައުލޫމާތު ރަސްމީކޮށް ރެކޯޑްކުރުމަށް "ދުވަސްތަކެއް ނުވަތަ ހަފުތާތަކެއް" ނަގާފާނެ ކަމަށް އޮފިޝަލަކު ސީ.އެން.އެން އަށް މައުލޫމާތު ދީފައިވެ އެވެ. ރަސްމީ ހިސާބުތަކާ ހަވާލާދީ އެ ނޫހުން ރިޕޯޓްކޮށްފައިވާ ގޮތުގައި، އީރާނާއެކު ކުރަމުންދާ ހަނގުރާމައިގައި މިހާތަނަށް އެމެރިކާ ސިފައިންގެ 427 މީހަކަށް ވަނީ އެކިވަރުގެ އަނިޔާތައް ލިބިފަ އެވެ.

ޕެންޓަގަންގެ ތަރުޖަމާނު ޝޯން ޕާނެލް ވިދާޅުވީ، ހަނގުރާމައިގައި މީހުންނަށް ލިބޭ އަނިޔާތަކުގެ މައުލޫމާތު ވަގުތުން ވަގުތަށް މީޑިއާއަށް ހާމަކުރުމަކީ، އެ މައުލޫމާތު ސީދާ ދުޝްމަނުންނަށް ފޯރުކޮށްދިނުން ފަދަ ކަމެއް ކަމަށެވެ. އަދި އަނިޔާވާ ސިފައިންގެ އަދަދުތައް ސިއްރުކުރާ ކަމަށް ބުނެ ކުރާ ތުހުމަތުތަކަކީ އެއްވެސް އަސާސެއް ނެތް، ބަދުނާމު ކުރުމުގެ ގޮތުން ކުރާ ތުހުމަތުތަކެއް ކަމަށް ވިދާޅުވެ އޭނާ ވަނީ އެކަން ދޮގުކުރައްވާފަ އެވެ.

އެކްސްގައި ކުރެއްވި ޕޯސްޓެއްގައި ޕާނެލް ވިދާޅުވީ، މައުލޫމާތު ސިއްރުކުރާ ކަމަށް ބުނާ ވާހަކަތަކަކީ، ހަނގުރާމައިގައި ތިން ސިފައިން މަރުވުމާ ގުޅިގެން އެމެރިކާގެ ރައްޔިތުންގެ މެދުގައި އިތުރަށް ނުތަނަވަސްކަން އުފެއްދުމަށް ހަދައިގެން އުޅޭ ވާހަކަތަކެއް ކަމަށެވެ. އަދި މުޅި މަންޒަރު ސާފުނުވާ ގޮތަށް، ވަކި ހިސާބުތަކެއް ހޮވާލައިގެން ހާމަކުރުމަކީ ގަސްތުގައި އޮޅުވާލުމަށް ކުރާ ކަމެއް ކަމަށްވެސް ތަރުޖަމާނު އިތުރަށް ވިދާޅުވި އެވެ.

މިދިޔަ ހަފުތާގައި ދެފަރާތުން އަލުން ހަމަލާތައް ބަދަލުކުރަން ފެށުމާއެކު، ފެބްރުއަރީ މަހުގެ ފަހުކޮޅު އެމެރިކާއާއި އިސްރާއީލުން ފެށި މި ހަނގުރާމައިގެ ސަބަބުން ލިބެމުންދާ ގެއްލުންތަކަށް ވަނީ އަނެއްކާވެސް ސަމާލުކަން ހުއްޓިފަ އެވެ. އިރާގުގެ އުތުރުގައި ޑްރޯންއެއް ނައްތާލަން އުޅުމުގެ ތެރޭގައި ހޮނިހިރު ދުވަހު އެމެރިކާ ސިފައިންގެ މީހަކު މަރުވުމާ ގުޅިގެން، މި ހަނގުރާމައިގައި މަރުވި އެމެރިކާ ސިފައިންގެ ރަސްމީ އަދަދު މިހާރު ވަނީ 17 އަށް އަރާފަ އެވެ.

ދެ ގައުމުގެ ދެމެދުގައި އޮތް ހަނގުރާމަ ހުއްޓާލުމުގެ އެއްބަސްވުން ނިމުމަކަށް އައިސްފައިވާކަމުގެ އިޝާރާތްތަކެއް ލިބެމުންދަނިކޮށް، އަންގާރަ ދުވަހުގެ ރޭ އެމެރިކާއިން ވަނީ ޖެހިޖެހިގެން 10 ވަނަ ރެއަށް އީރާނަށް ހަމަލާދީފަ އެވެ. ޕެންޓަގަނުން މި ހަމަލާތައް އަލުން ފަށާފައިވަނީ ހުރްމުޒް ކަނޑުއޮޅިން ދަތުރުކުރާ ތެޔޮ ޓޭންކަރުތަކަށާއި މުދާ އުފުލާ ބޯޓުތަކަށް އަމާޒުކޮށް ދެމުންދާ ހަމަލާތަކަށް ރައްދު ދިނުމުގެ ގޮތުންކަމަށް ބުނެ އެވެ. އީރާނުން ވަނީ ޖޫން 17 ގައި ސޮއިކުރި ފަހުމުނާމާއާ އެމެރިކާއިން ޚިލާފުވެފައިވާ ކަމަށް ތުހުމަތުކޮށް، އެ އެއްބަސްވުމުގެ ދަށުން އީރާނުން އުފުލަންޖެހޭ ޒިންމާތައް މެދުކަނޑާލާނެ ކަމަށް ބުނެފަ އެވެ.