އީރާނަށް ޖެހިޖެހިގެން 10 ވަނަ ރޭ އެމެރިކާއިން ހަމަލާދީފި

ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް ހަމަލާދިނުމަށް އީރާނުން ގެންގުޅޭ ގާބިލުކަން "އިތުރަށް ނައްތާލުމަށްޓަކައި" އެ ގައުމަށް އަމާޒުކޮށް އަނެއްކާވެސް އާ ހަމަލާތަކެއް ދީފައިވާ ކަމަށް އެމެރިކާގެ އަސްކަރިއްޔާއިން ބުނެފި އެވެ.

ޖެހިޖެހިގެން 10 ވަނަ ރޭ ދިން މި ހަމަލާތަކަކީ، އެމެރިކާގެ ސިފައިންތަކެއް މަރާލި މައްސަލައިގައި އީރާނަށް އަދަބު ދޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވައުދުވެވަޑައިގަތުމާ ގުޅިގެން ދީފައިވާ ހަމަލާތަކެކެވެ.

އުރުދުންގައި ދެ ސިފައިން އަދި އިރާގުގައި އެކަކު ހިމެނޭހެން، ދާދިފަހުން މަރާލި އެމެރިކާގެ ތިން ސިފައިންގެ "ޝަރަފުގައި"، އޭގެ ކުރީ ރޭ އީރާނަށް "ވަރަށް ވަރުގަދަ" ހަމަލާތަކެއް ދީފައިވާނެ ކަމަށް ރައީސް ޓްރަމްޕް ކުރިން ވިދާޅުވެފައިވެ އެވެ.

އެމެރިކާގެ އެންމެ ފަހުގެ ހަމަލާތަކަށް ރައްދު ދިނުމުގެ ގޮތުން، އެ ސަރަހައްދުގެ ކަނޑުގެ މަގުން ދަތުރުކުރި ދެ ތެޔޮ ޓޭންކަރަކަށާއި، ބަހްރޭނާއި ކުވެއިތުގައި ހުރި އެމެރިކާގެ އަސްކަރީ ވަސީލަތްތަކަށް ހަމަލާދީފައިވާ ކަމަށް އީރާނުގެ ދައުލަތުގެ ނޫސް އެޖެންސީ "އިރްނާ" އިން ވަނީ ރިޕޯޓުކޮށްފަ އެވެ. އީރާނުގެ ރައީސް މަސްއޫދު ޕެޒެޝްކިއާން ވިދާޅުވީ އީރާނުން މިހާރު އެމެރިކާއާއެކު ކުރަމުންދަނީ "ފުރިހަމަ ހަނގުރާމައެއް" ކަމަށެވެ.

ހަމަ އެއާއެކު، ހަމަލާ ބަދަލުކުރުން ހުއްޓާލުމަށް އެއްބަސްވި އެއްބަސްވުން އުވާލާފައިވީ ނަމަވެސް، މެދުވެރިން މެދުވެރިކޮށް ދެ ގައުމުގެ ދެމެދުގައި އަދިވެސް ޑިޕްލޮމެޓިކް މެސެޖުތައް ބަދަލުކުރަމުންދާ ކަމަށް ތެހެރާނުން ބުނެފައިވެ އެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އެކްސްގައި ބުނެފައިވާ ގޮތުގައި، އެންމެ ފަހުން ދިން ހަމަލާތަކުގައި އީރާނުގެ "އަސްކަރީ ކޮމާންޑް ސެންޓަރުތަކަށާއި، ކަނޑުގެ އަސްކަރީ ގާބިލުކަމަށާއި، މިސައިލާއި ޑްރޯން ފޮނުވާ ތަންތަނުގެ އިތުރުން ވައިގެ ދިފާއީ ނިޒާމުތަކަށް" ވަނީ އަމާޒުކޮށްފަ އެވެ.

ސެންޓްކޮމް އިން ބުނި ގޮތުގައި، ހުރްމުޒް ކަނޑުއޮޅިން ވިޔަފާރި އުޅަނދުފަހަރު ދަތުރުކުރުން އަދިވެސް ދަނީ ކުރިއަށެވެ.

އީރާނުގެ ދައުލަތުގެ ނޫސް އެޖެންސީ "އިރްނާ" އިން ރިޕޯޓުކޮށްފައިވާ ގޮތުގައި، މުހިންމު ކަނޑުގެ މަގަކުން ދަތުރުކުރަނިކޮށް އީރާނުން ހަމަލާދިން ދެ ތެޔޮ ޓޭންކަރުގައި ތިބި ފަޅުވެރިން ސަލާމަތްކުރުމުގެ މަސައްކަތް ރެސްކިއު ޓީމުތަކުން ދަނީ ކުރަމުންނެވެ. ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫ.ކޭ.އެމް.ޓީ.އޯ) އިން ބުނި ގޮތުގައި، ހުރްމުޒް ކަނޑުއޮޅިން ދަތުރުކުރި ޓޭންކަރަކަށް ނޭނގޭ އެއްޗަކުން ހަމަލާދިނުމާ ގުޅިގެން، ފަޅުވެރިން ވަނީ އުޅަނދު ދޫކޮށްލުމަށްފަހު ލައިފްބޯޓަކަށް އަރާފަ އެވެ.

ޔޫ.ކޭ.އެމް.ޓީ.އޯ އިން ރިޕޯޓުކުރި ޓޭންކަރަކީ އީރާނުން ހަމަލާދިން ކަމަށް ބުނާ އުޅަނދުތަކުގެ ތެރޭގައި ހިމެނޭ އުޅަނދެއްކަން ނުވަތަ ނޫންކަން އަދި ސާފެއް ނުވެ އެވެ.

ނިމިދިޔަ ހަފުތާ ބަންދުގައި އުރުދުންގެ މުވައްފަގު ސަލްތީ ބޭހަށް އީރާނުން ދިން ހަމަލާގައި މަރުވި އެމެރިކާގެ ދެ ސިފައިންގެ މައުލޫމާތު އެމެރިކާގެ ޑިފެންސް ޑިޕާޓްމަންޓުން އަންގާރަ ދުވަހުގެ ރޭ ވަނީ ކަށަވަރުކޮށްދީފަ އެވެ. އެއީ ޓެކްސަސްއަށް ނިސްބަތްވާ އުމުރުން 19 އަހަރުގެ ޕްރައިވެޓް އިސަބެލާ ގޮންޒާލޭޒް އާއި ހަވާއީއަށް ނިސްބަތްވާ އުމުރުން 25 އަހަރުގެ ލެފްޓިނެންޓް ޓައިލާ ޖޭމްސް ފީހަން އެވެ.

ސެންޓްކޮމް އިން ކުރިން ބުނެފައިވާ ގޮތުގައި، އެ ހަމަލާއަށްފަހު ތިންވަނަ ސިފައިންގެ މީހަކު ގެއްލިފައިވާ ކަމަށާއި، ފަހުން އެ ސަރަހައްދުން ވަނީ ކާކުކަން ނޭނގޭ އިންސާނީ ހަށިގަނޑެއްގެ ބައިތަކެއް ފެނިފަ އެވެ.

ސަރަހައްދުގެ އެހެން ހިސާބުތަކަށް ބަލާއިރު، އުރުދުންގެ އެކި ސަރަހައްދުތަކަށް ހަމަލާ އަންނަކަމުގެ އިންޒާރުގެ ސައިރަން އެޅުމާއެކު، ހޯމަ ދުވަހުގެ ރޭ އީރާނުގެ ތިން މިސައިލެއް ވައްޓާލާފައިވާ ކަމަށް އުރުދުންގެ އަސްކަރިއްޔާއިން ބުނެފައިވެ އެވެ.

އެ ދުވަހުގެ ކުރީކޮޅު، ކުވެއިތުގެ އަސްކަރިއްޔާއިން ވަނީ އީރާނުގެ ޑްރޯންތަކެއް ހުއްޓުވާފައިވާ ކަމަށް ބުނެފަ އެވެ.

ބަހްރޭނުން ބުނި ގޮތުގައި އީރާނުން ފޮނުވާލި ޑްރޯންތަކެއް އެ ގައުމުގެ އެއާ ނެވިގޭޝަން ސިސްޓަމްތަކަށް އަމާޒުކުރި ނަމަވެސް، ދަތުރުފަތުރަށް އެއްވެސް ބުރޫއެއް އަރާފައެއް ނުވެ އެވެ.

އޭގެ ކުރީ ރޭ އެމެރިކާއިން ދިން ހަމަލާތަކާ ގުޅޭގޮތުން އީރާނުގެ ތަސްނީމް ނިއުސް އެޖެންސީން ރިޕޯޓުކޮށްފައިވާ ގޮތުގައި، ތަބްރީޒް، ޗަބަހާރު، ކޮނާރަކް، ބަންދަރު މަހްޝަހްރު އަދި ބަންދަރު އިމާމް ޚުމައިނީ ހިމެނޭހެން އެ ގައުމުގެ ބައެއް ސިޓީތަކަށް ވަނީ ހަމަލާދީފަ އެވެ.

އީރާނުގެ ދައުލަތުގެ މީޑިއާއިން ރިޕޯޓުކުރި ގޮތުގައި، ކަނޑުއޮޅި ހުރަސްކުރަން އުޅުނު ދެ ތެޔޮ ޓޭންކަރެއް ވަނީ ގޮވާފަ އެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނީ އެ ޓޭންކަރުތައް ދަތުރުކުރީ ކަނޑުއޮޅީގެ "ނުރައްކާތެރި ދެކުނު މަގަކުން" ކަމަށާއި، އެ އުޅަނދުތައް "ގޮވައި ހުއްޓިފައިވާ" ކަމަށެވެ. ނަމަވެސް އެމެރިކާގެ ސެންޓްކޮމް އިން ވަނީ އެ ވާހަކަތައް ދޮގުކޮށްފަ އެވެ.