މިސަރުކާރުން ޕާކިން ބިލްޑިންގތައް އަޅާ ވާހަކައަކީ ފްލޯކު ވާހަކައެއް، އަދިވެސް ރައްޔިތުން ގުނބޯ ހެއްދުމަށް ދަނީ މަސައްކަތް ކުރަމުން : ބޮންޑާ
މާލޭގެ ތޮއްޖެހުން ބޮޑުވެފައިވާ މިންވަރަށް ބަލާއިރު، ޕާކިން ބިލްޑިންގތައް އެޅުމަކީ އަމަލީގޮތުން ކުރެވޭނެ ކަމެއް ނޫން ކަމަށް ބޮންޑާ ވިދާޅުވި. ސަރުކާރުން މިފަދަ ދޮގު ވައުދުތައް ވަމުންދަނީ ރައްޔިތުންނަށް އޮޅުވާލުމަށް ކަމަށާއި، މާލޭގެ ހާލަތު ދެނެގަތުމަށް އިތުރު ދިރާސާތަކެއް ކުރަން ނުޖެހޭނެ ކަމަށް ވެސް އޭނާ ވިދާޅުވި
ރާއްޖެޓީވީގެ ފަލަސުރުހީ ޕްރޮގްރާމްގައި މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވާހަކަ ދައްކަވަނީ | ރާއްޖެއެމްވީ
ޕާކިން ބިލްޑިންގތައް އަޅާ ވާހަކައަކީ ފްލޯކު ވާހަކަތަކެއް ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން ބޮންޑާ ވިދާޅުވީ މުޅި ދުނިޔޭގައި ވެސް އެންމެ ބޮޑަށް ތޮއްޖެހިފައި އޮތް ސިޓީ އަކީ މާލެ ސިޓީ ކަމަށާއި މިތަނުގައި ޕާކިން ބިލްޑިންގ އަޅާނެ ތަނެއް ނެތް ކަމަށެވެ.
މާލެގައި އިތުރު ޕާކިން ބިލްޑިންގތައް އެޅި ވަރަކަށް މާލެ ދާނީ އިތުރަށް ތޮއްޖެހެމުން ކަމަށް އޭނާ ވިދާޅުވި އެވެ. އަދި ޕާކިން ބިލްޑިންގތައް އަޅަން ތަން އޮތީ ގަބުރުސްތާނުގައި ކަމަށާއި އެތަންތަނުގައި ލިފްޓް ބިލްޑިންގ އަޅާ، ކާރު އަދި ސައިކަލު ފަދަ އުޅަނދުތައް އެތަންތަނަށް އަރުވައިގެން ޕާކް ކުރާ ވާހަކަ އަކީ ފްލޯކު، ދޮގު ވާހަކަތަކެއް ކަމަށް ބޮންޑާ ވިދާޅުވި އެވެ.
ސުވާލަކީ ޕާކިން ބިލްޑިންގ ކޮންތާކު ތޯއޭ މާލެ، މާލެ މިއުޅެނީ މިހާރު ވެސް ތޮއްޖެހިގެން، ރަށްވެހިން ގިނަވެގެން މިއުޅެނީ ކިހިނެއް ތޮއްޖެހިފައި މިއޮތީ ކިހިނެއް އިންތިހާއަށް، މުޅި ދުނިޔޭގައި މުޅި ދުނިޔޭގަ ވެސް އެންމެ ތޮއްޖެހިފައި އޮތް ގައުމުކަން މުޅި ދުނިޔެ އެއްބަސްވޭއިބްރާހީމް ރަޝީދު (ބޮންޑާ)
މީގެ އިތުރުން ބޮންޑާ ވިދާޅުވީ ރައީސް މުއިއްޒުގެ ސަރުކާރުން ގެންދަނީ ރައްޔިތުން ގުނބޯ ހައްދަން މަސައްކަތް ކުރަމުން ކަމަށާއި، އެ މަސައްކަތް ވަރަށް ފުޅާކޮށް ކުރިއަށް ގެންދާ ކަމަށެވެ. އަދި މާލޭގެ ކެރީން ކެޕޭސިޓީ ދިރާސާ ކުރުމަށް ގައުމީ ޔުނިވަރސިޓީއަށް ހަވާލުކުރިކަން ފާހަގަކުރައްވާ ބޮންޑާ ވިދާޅުވީ މިއީ ދިރާސާއެއް ކުރަން ޖެހޭ ކަމެއް ނޫން ކަމަށާއި، ރައްޔިތުންނަށް ވާނުވާ އެނގޭ ކަމަށެވެ.
މިހާރު އަޅުގަނޑަށް އަޑު އިވެނީ ގައުމީ އުނިވަރސިޓީއަށް ދީފީމޭ މިހާރު ދިރާސާކުރަން ކެރީން ކެޕޭސިޓީ މިކިޔާ ކެރީން ކެޕޭސިޓީ ދިރާސާ ކުރަންށޭ، ޑިޖިޓަލައިޒޭޝަނޭ ކިޔާނެ، އެ ކެރީން ކެޕޭސިޓީ އިންގިރޭސި ބަހުން މި އެއްޗެހިތައް ކިޔާނީ ގިނަ މީހުންނަކަށް ނޭންގޭނެ އެއް ނުން، ހިތަށް އަރާނީ މީ ވަރަށް ބޮޑު އެއްޗެކޭ މީ އެމީހުން އެބަ ދިރާސާއެއް ކުރޭ ކެރީން ކެޕޭސިޓީ ކިޔާ ދިރާސާއެއް، ޑިޖިޓަލައިޒޭޝަންގެ އެއްޗެކޭއިބްރާހީމް ރަޝީދު (ބޮންޑާ)
ޕާކިން ބިލްޑިންގ އެޅުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. ނަމަވެސް ޕާކިންގ ބިލްޑިން އާ ބެހޭ ގޮތުން ރައީސް މުއިއްޒު ދައްކަވަނީ އެކި ދުވަހު އެކި ވާހަކަފުޅެވެ. އެގޮތުން މިހާރު ވިދާޅުވެފައިވަނީ މިއަހަރު މާލޭގައި ޕާކު ކުރަން ދެ އިމާރާތުގެ މަސައްކަތް ފަށާނެ ކަމަށެވެ.
