ރައީސް އޮފީސް ގާނޫނާ ޚިލާފުވެގެން އަދަބު ދިނުމުން، ދެން ހިންގަން އޮތީ ކޮން ގާނޫނުގެ ވެރިކަމެއް ހެއްޔެވެ؟

ދިވެހިރާއްޖޭގެ ޑިމޮކްރެޓިކް ހަޔާތާއި މައުލޫމާތު ހޯދައި ލިބިގަތުމުގެ ހައްގުގެ ތާރީޚުގައި މީގެ ކުރިން ދުވަހަކުވެސް ފެނިފައިނުވާ ފަދަ ތާރީޚީ އަދި ހައިރާން ކުރުވަނިވި ނިންމުމެއްގެ ދަށުން، ސަރުކާރު ހިންގުމުގެ އެންމެ މަތީ އިދާރާ ކަމަށްވާ ރައީސުލްޖުމްހޫރިއްޔާގެ އޮފީސް ފުރަތަމަ ފަހަރަށް ޖޫރިމަނާކޮށްފި އެވެ. ގައުމުގެ އެންމެހައި ގާނޫނުތަކާއި ގަވާއިދުތައް ހިންގުމުގައި ނަމޫނާ ދައްކަން ޖެހޭ އޮފީސް މިއޮތީ ގާނޫނާ ޚިލާފުވެގެން އަދަބު ލިބިފަ އެވެ. މިއާ އެކު މި ސަރުކާރުގެ ލެގަސީ އެއޮތީ ގާނޫނާ ގަވައިދާ ޚިލާފުވާ ސަރުކާރެއްގެ ގޮތުގައި ކަޅާ ހުދުން ލިޔެވިފަ އެވެ.

ގާނޫނަށް ބޯލެނބުމުގެ ނަމޫނާ ދައްކަންޖެހޭ އެންމެ އިސް މަރުކަޒުން ގާނޫނާ ޚިލާފުވެ، މައުލޫމާތު ހޯދައި ލިބިގަތުމުގެ ހައްގުގެ ގާނޫނު (އާރްޓީއައި ގާނޫނު) "މިސްޔޫސް" ނުވަތަ ނަހަމަ ގޮތުގައި ބޭނުންކުރަމުންދާ ކަމަށް ނިންމާ އިންފޮމޭޝަން ކޮމިޝަނަރުގެ އޮފީހުން (އައިކޮމް) ވަނީ އެ އޮފީސް 2،000 ރުފިޔާއިން ޖޫރިމަނާކޮށްފަ އެވެ.

އިންފޮމޭޝަން ކޮމިޝަނަރުގެ ނިންމެވެމުން ފާހަގަ ވެގެން މިދަނީ، ރައީސް އޮފީސް ގާނޫނުގެ ނާޖާއިޒު ބޭނުން ކުރާ ކަމާއި، ގާނޫނާ ޚިލާފުވެފައިވާ ކަމެވެ.

މި ނިންމުމަކީ ދިވެހިރާއްޖޭގެ ދުސްތޫރީ ނިޒާމުގައި ގާނޫނީ ވެރިކަން ނަގަހައްޓަން ޖެހޭ މައި ހަބަށް އަމާޒުވި ވަރަށް ބޮޑު ގޮންޖެހުމެކެވެ. ސަބަބަކީ ގާނޫނާއި ގަވައިދަށް ބޯލެނބުމާއި، ގާނޫނުގައިވާ ގޮތަށް އެހެން ފަރާތްތަކަށް އަބަދާ އަބަދު އިރުޝާދުދިނުމުގައި މި އޮފީސް އަދާ ކުރަން ޖެހޭ ދައުރަށް މިކަމުގެ ސަބަބުން ހިޔަނި އެޅުމެވެ.  ގާނޫނޭ ގަވައިދޭ ބުނެ ދެން އެހެން މީހުންނަށް މި އޮފީހުން ދޭން އޮންނާނީ ކޮން ލަފައެއް އިރުޝާދެއް ބާވައެވެ؟ އަމުރުކުރަން އެދޭނަމަ ކިޔަމަންވާން ދަސްކުރާށޭ މުސްކުޅިން ބުނެ އުޅެނީ އޭގައި ވަރަށް ބޮޑު ހިކުމަތެއް އޮތީމަކަން ޔަގީނެވެ.

ކޮންމެއަކަސް، އެއް ދުވަހެއްގެ ނޫސްވެރިންގެ ބައްދަލުވުމެއްގައި، ނިކަން އަޑަށް ބާރު ލެއްވުމަށްފަހު ރައީސް އޮފީހުން އަބަދުވެސް ރޫލް އޮފް ލޯ ހިފަހައްޓާނެ ކަމަށް ވިދާޅުވުމަށްފަހު އެއާ ޚިލާފަށް އަމަލުކުރައްވައިގެން އަނެއްކާ ވެސް މި އޮތީ އަނެއް ރެކޯޑު ހައްދަވާފަ އެވެ. 

ރާއްޖެޓީވީގެ ފަރާތުން ރައީސް އޮފީހުން މައުލޫމާތު ހޯދުމަށް އެދި ހުށަހެޅި އާރްޓީއައި ތަކަށް ގާނޫނީ މުއްދަތުގައި ޖަވާބު ނުދިނުމުން، އެކަމުގެ ޝަކުވާ އިންފޮމޭޝަން ކޮމިޝަނަރުގެ އޮފީހަށް ހުށަހެޅި އެވެ. މި މައްސަލައިގެ އަޑުއެހުންތަކުގައި އިންފޮމޭޝަން ކޮމިޝަނަރު އާހިދު ރަޝީދު ވަނީ ވަރަށް ބޮޑަށް ނުރުހުން ފާޅުކުރައްވައި، ރައީސް އޮފީހުން ތަކުރާރުކޮށް ކޮމިޝަނަރުގެ ގާނޫނީ ޒިންމާތަކަށް ހުރަސް އަޅަމުން ދާކަން ފާހަގަކުރައްވާފަ އެވެ. މައުލޫމާތު ދިނުމަށް އައިކޮމްއިން އެކި ފަހަރު މަތިން އެންގި އެންގުންތަކަށް ރައީސް އޮފީހުން އިޖާބަދީފައި ނުވާއިރު، މައްސަލަތައް ރަނގަޅުކުރުމަށް ދިން މުއްދަތުގައި ވެސް ގާނޫނާ އެއްގޮތަށް އަމަލުކޮށްފައެއް ނުވެ އެވެ.

އެހެންކަމުން، އާރްޓީއައި ގާނޫނުގެ 67 ވަނަ މާއްދާއިން ލިބިދޭ ބާރުގެ ދަށުން ރައީސް އޮފީސް ޖޫރިމަނާކުރަން ޖެހުނީ ގާނޫނު ނެގެހެއްޓުމަށްޓަކައި ކަމަށް ކޮމިޝަނަރު ވިދާޅުވި އެވެ. މީގެ އިތުރުން، ޖަވާބު ނުދީ ހުރި ހުރިހާ މައްސަލަތަކަށް ކުރިއަށް އޮތް 7 ދުވަސް ތެރޭގައި ޖަވާބު ދިނުމަށް އަމުރުކޮށް، އެ މުއްދަތުގައި މައުލޫމާތު ނުދީފިނަމަ ރައީސް އޮފީހާ ދެކޮޅަށް ކޯޓުގައި ދައުވާކުރާނެ ކަމުގެ ހަރުކަށި އިންޒާރުވެސް އައިކޮމް އިން ވަނީ ދީފަ އެވެ.

އިންފޮމޭޝަން ކޮމިޝަނަރު އާހިދު ރަޝީދު ފާހަގަކުރެއްވި ގޮތުގައި، ސަރުކާރުގެ އެކި ޕްރެސް ކޮންފަރެންސްތަކާއި ބައްދަލުވުންތަކުގައި އާރްޓީއައި ހުށަހަޅާ ނޫސްވެރިންނާއި އާންމު ފަރާތްތައް ކުށްވެރިކޮށް ވާހަކަދަ ދައްކަމުންދެ އެވެ. ސަރުކާރުގެ އިސް ބޭފުޅުން، ޚާއްސަކޮށް ބަންޑާރަނައިބު އަހުމަދު އުޝާމް އަދި ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) މީގެ ކުރިން ވިދާޅުވަމުން ގެންދެވީ، ގިނަ ބަޔަކު އާރްޓީއައި ގާނޫނުގެ ބޭނުން ހިފަނީ ނަހަމަ ގޮތުގައި ކަމަށާއި އޭގެ ސަބަބުން ދައުލަތުގެ އިދާރާތަކުގެ ވަގުތު ބޭކާރުވާ ކަމަށެވެ. ނަމަވެސް، ކޮމިޝަނަރު އާހިދު ސީދާ ވިދާޅުވީ ހަގީގަތުގައި މި ގާނޫނު "މިސްޔޫސް" ކުރަމުންދަނީ ނޫސްވެރިންނެއް ނޫން ކަމަށާއި، އެކަން ކުރަނީ ގާނޫނަށް ބޯނުލަނބައި މައުލޫމާތު ހިފަހައްޓަމުންދާ ރައީސުލްޖުމްހޫރިއްޔާގެ އޮފީހުން ކަމަށެވެ.

ސަރުކާރުގެ އެންމެ މަތީ ބާރުން ބޭނުންވާހާ ގޮތަކަށް ގާނޫނުތައް މާނަކޮށް، ރައްޔިތުންގެ މައުލޫމާތު ހޯދުމުގެ އަސާސީ ހައްގަށް ހުރަސްއެޅުމަކީ ޑިމޮކްރެސީގެ އަސްލުތަކާ މުޅިން ޚިލާފު ކަމެކެވެ. ރައީސް މުއިއްޒު ވެރިކަމަށް ވަޑައިގަތުމުގެ ކުރިންނާއި ފަހުންވެސް ވިދާޅުވަމުން ގެންދެވީ ހާމަކަން ބޮޑު، ދެފުށް ފެންނަ ސަރުކާރެއް ހިންގަވާނެ ކަމަށެވެ. ގާނޫނުގެ ވެރިކަމެއް ކުރައްވާނެ ކަމަށެވެ. ނަމަވެސް، މި އަދަބާ އެކު ސަރުކާރުގެ ބަހާއި އަމަލާ ދިމާނުވާކަން ސާބިތުވެ ނިމިއްޖެ އެވެ. މިއާއެކު އެންމެ އާދައިގެ މީހަގެ ހިތައް ވެސް މިއަދު އަރާނެ ސުވާލަކީ ރައީސް އޮފީސް ގާނޫނާ ޚިލާފުވެގެން އަދަބު ދިނުމުން، ދެން ހިންގަން އޮތީ ކޮން ގާނޫނުގެ ވެރިކަމެއް ހެއްޔެވެ؟