ތަރައްގީ މަޑުޖެހިފައިވަނީ ބޮޑު ހިލަ ނުލިބިގެން ކަމަށް މިނިސްޓަރ މުއްތަލިބު ވިދާޅުވެއްޖެ

ރާއްޖޭގެ އެކި ކަންކޮޅުތަކުގައި ނިމުނު އެމްޑީޕީގެ ސަރުކާރުން ފެށި މަޝްރޫއުތައް ހުއްޓާލުމާއި، މި ސަރުކާރުން ރަށްރަށުގެ ތަރައްގީއަށް މަޝްރޫއުތައް ނުހިންގާ ބަހަނާއެއްގެ ގޮތުގައި އިންޕްރާސްޓްރަކްޗަރ މިނިސްޓަރު ޑރ. އަބްދުﷲ މުއްތަލިބް ހިލަ ނުލިބުން ކަމަށް ދައްކަވައިފި އެވެ.

ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި މިނިސްޓަރު މުއްތަލިބު ހާޒިރު ކޮށްފައިވާއިރު ގިނަ މެންބަރުން ތަކެއް ވަނީ ހުއްޓިފައިވާ މަޝްރޫއުތަކާ ގުޅޭ ގޮތުން މިނިސްޓަރާ ސުވާލު ކުރައްވާފަ އެވެ. 

އެގޮތުން ސުވާލު ކުރުމުގެ ވަގުތުގައި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވަނީ ހަނިމާދޫ ބަނދަރުގެ މަޝްރޫއާ ގުޅޭ ގޮތުން ސުވާލު ކުރައްވާފަ އެވެ. އެ ސުވާލަށް ޖަވާބުދެއްވަމުން މިނިސްޓަރު ވަނީ ހުއްޓިފައިވާ ހުރިހާ މަޝްރޫއުތަކެއް ތަފްސީލު އެނގިވަޑައި ނުގަންނަވާ ކަމަށް ވިދާޅުވެފަ އެވެ.

ދެން ވިދާޅުވީ ދެ ރަށުގައި ސީދާ ތަފްސީލެއް ނޭނގުނަސް، ހުއްޓިފަ ހުރި ގިނަ ރަށްރަށުގެ މަސައްކަތްތައް މިވަގުތު ހުއްޓިފަ ހުރީ ހިލަ ލިބުމުގެ ދަތިކަމާ ހެދި. މި މަހުން ފެށިގެން ހިލަ ގެނައުމުގައި ފަސޭހަތަކެއް ލިބިގެންދާނެ. ހިލަ ލިބުނުހާ އަވަހަކަށް ވަރަށް ގިނަ މަޝްރޫއުތަކެއް ކުރިއަށްގެންގޮސް ނިންމާލެވޭ ހިސާބުގަ ހުރީ. 

އިންޕްރާސްޓްރަކްޗަރ މިނިސްޓަރު ޑރ. އަބްދުﷲ މުއްތަލިބް 

މިނިސްޓަރު އެހެން ވިދާޅުވިއިރު ރަށްރަށުގައި ހުއްޓިފައި ހުރި މަޝްރޫއުތައް ކުރިއަށް ގެންދަން ބަލްކުކޮށް ބޮޑު ހިލަ ގެންނަން ނިންމަވާފައިވާ ކަމަށް ރައީސް ޑރ. މުހައްމަދު މުއިއްޒު ވަނީ މިދިޔަ އަހަރުގެ ޖެނުއަރީ މަހު ވިދާޅުވެފަ އެވެ. 

 ބޮޑު ހިލައިގެ ޝިޕްމަންޓްތައް ގަނޑުކޮށް ގެންނަވާނެ ކަމަށް ރައީސް މީގެ ކުރިން ވިދާޅުވުމަށްފަހު މަސައްކަތްތަކަށް ބޭނުންވާ ބޮޑުހިލައާއި އެހެނިހެން މެޓީރިއަލްސް ގެނައުމުގައި މެދުއިރުމަތީގެ މަސްރަހު އޮތްގޮތުން ބޮޑެތި ދަތިތަކެއް ކުރިމަތިވެ، މަޝްރޫއުތައް މަޑުޖެހިފައިވާ ކަމަށް އެމަނިކުފާނު ހާމަކުރެއްވި އެވެ.

އެހެން ނަމަވެސް ރާއްޖެއަށް ބޮޑު ހިލަ އެންމެ ގިނައިން ފޯރުކޮށްދޭ އެއްގައުމަކީ އިންޑިއާ އެވެ. މި ސަރުކާރުން އަވަށްޓެރި އިންޑިއާ އާ މެދު ކަންތައް ކުރި އިހާނެތި ގޮތާ، އެ ގައުމަށް އަމާޒުކޮށް ކީ އެއްޗިއްސަށް ފަހު ވެސް އެ ގައުމުން ކޯޓާ ދިން އިރު ދުނިޔޭގެ އެހެން އެއްވެސް ގައުމަކަށް ދީފައި ނުވާވަރުގެ ބޮޑު ކޯޓާ އެއް ދީފައިވާއިރު މިހުރިހާ ކަމަކާ އެކުވެސް މިއަދު ސަރުކާރުން ބުނަމުން ދަނީ ބޮޑު ހިލަ ނެތް ވާހަކަ ކަން ފާހަގަކޮށް ރައްޔިތުން ދަނީ މި ސަރުކާރުން ރައްޔިތުންނަށް ތަކުރާރު ކޮށް އޮޅުވާލަމުންދާ ކަމަށް ބުނަމުންނެވެ. 

އިންޑިއާ އިން ވެސް ހިލަ ހޯދޭނެ މަގުތައް އޮތް އިރު އެކަން ނުވަނީ މި ސަރުކާރުގެ ނާގާބިލުކަމުން ކަމަށް އިދިކޮޅު ފަރާތްތަކުން ވެސް ދަނީ ބުނަމުންނެވެ. އަދި މި ސަރުކާރުން ހުރިހާ ކަމެއްގެ ބަހަނާ އަކަށް ވެސް މެދު އިރުމަތީގެ ހަނގުރާމަ ދައްކަމުންދާ ކަމަށް ވެސް އެ ފަރާތްތަކުން ދަނީ ބުނަމުންނެވެ.