ރައީސް މުއިއްޒު ރައްޔިތުން އުފާކޮށްދެއްވަނީ ބަސްތަކަކުން!

ކޮންމެ ސަރުކާރަކުން ވެސް ވެރިކަމަށް އަންނަނީ ރައްޔިތުންނަށް ފޮނި އުންމީދުތަކާއި ބޮޑެތި ވައުދުތަކެއް ވަމުންނެވެ. މިގޮތުން ރައީސް ޑރ. މުޙައްމަދު މުޢިއްޒު ވެރިކަމަށް ވަޑައިގަތުމަށްޓަކައި ދެއްކެވި ވާހަކަފުޅުތަކާއި، މިހާރު ދައްކަވަމުން ގެންދަވާ ވާހަކަފުޅުތަކަކީ ރައްޔިތުންގެ ކަންފަތަށް ވަރަށް އަރާމު، އުންމީދުން ފުރިގެންވާ ބަސްތަކެކެވެ. ނަމަވެސް، އަމަލީ މައިދާނުގައި މިކަންކަން ފެންނަން އޮތް މިންވަރާ މެދު ސުވާލު އުފެދެ އެވެ. 

ރައީސް މުއިއްޒު ވިދާޅުވާ ގޮތުގައި މާލެ ތޮއްޖެހުމުގެ މައްސަލައަކީ ރާއްޖޭގެ ތަރައްގީ މީގެ ކުރިން ބައްޓަން ކުރެވިފައި އޮތް ގޮތުގެ ނަތީޖާ އެވެ. މިކަން ހައްލުކުރުމަށްޓަކައި އުތުރާއި ދެކުނުގައި އިންޓަގްރޭޓެޑް ޑިވެލޮޕްމަންޓް ޒޯންތަކެއް ހަދައި، 7 އަރބަން ސެންޓަރެއް ގާއިމު ކުރަމުންދާ ކަމަށް އެމަނިކުފާނު ވަނީ ވިދާޅުވެފަ އެވެ. އަދި މިސަރަހައްދުތަކުގައި މަތީ ފެންވަރުގެ ހޮސްޕިޓަލްތަކާއި، ތައުލީމީ ފުރުސަތުތަކާއި، ވަޒީފާގެ ފުރުސަތުތައް ގާއިމުކުރުމުން މާލެއަށް މީހުން އައުން ހުއްޓި، އަމިއްލަ ވަޒަނުގައި އުޅެވޭނެ ކަމަށް ރައީސް މުއިއްޒު ވިދާޅުވެ އެވެ. ނަމަވެސް، މިހާތަނަށް އައިއިރު އެއްވެސް ރަށެއްގައި މިފަދަ އިންޓަގްރޭޓެޑް މަޝްރޫއެއް އަމަލީ ގޮތުން ފެށިގެން ކުރިއަށްދާ ތަނެއް ނުފެނެއްނުންތޯ އެވެ. 

ރައީސް މުއިއްޒުގެ ވާހަކަފުޅުތަކުގައި ތަރައްގީގެ ފޮނި މަންޒަރުތައް ކުރަހައިދެއްވާއިރު، ބިންމަތީގެ ހަގީގަތް ތަފާތެވެ. އުތުރާއި ދެކުނުގެ ގިނަ ރަށްރަށުގައި ފެށިފައި ހުރި އެއަރޕޯޓް މަޝްރޫއުތަކާއި، ހައުސިންގ މަޝްރޫއުތައް ވަނީ ހުއްޓިފަ އެވެ. މީގެ އިތުރުން، އަތޮޅުތެރޭގެ ހޮސްޕިޓަލްތަކުގެ ފެންވަރު ދަށްވެ، ބޭސްފަރުވާގެ ޚިދުމަތް ހޯދުމުގައި ރައްޔިތުން އުފުލަންޖެހޭ ތަކުލީފުތައް ދަނީ އިތުރުވަމުންނެވެ. ރައީސް މުއިއްޒު މަޝްރޫއުތަކުގެ ވާހަކަ ދައްކަވާއިރު، އެ މަސައްކަތްތައް ހިނގަމުންދާ ވަކި ރަށްތަކެއްގެ ނަން ވިދާޅުނުވާތީ، މިއީ ހަމައެކަނި ސިޔާސީ ވާހަކަތަކެއްގެ ގޮތުގައި ހާމަވެއެއްނުންތޯ އެވެ. 

މީގެ އިތުރުން އަތޮޅުތެރޭގެ ރަށްތައް ތަރައްޤީ ކުރައްވާ ކަމަށް ރައީސް މުއިއްޒު ވިދާޅުވާއިރު، އެމަނިކުފާނު އެންމެ އިސްކަމެއް ދެއްވައިގެން ތަރައްޤީ ކުރައްވަނީ ފުށިދިއްގަރުފަޅު ނުވަތަ އެމަނިކުފާނުގެ ތަސައްވުރުގެ ނަމުންނަމަ، ރަސްމާލެ އެވެ. ރައީސް މުއިއްޒު ވިދާޅުވާ ގޮތުގައި ރަސްމާލެއިން 65،000 ގޯތި ދެވިގެންދާނެ އެވެ. އެހެންކަމުން ރަސްމާލެ ތަރައްޤީ ކުރަމުންދަނީ މާލެ ސަރަހައްދަށް މީހުން ޖަމާކުރުން ނޫން ކޮން މަޤްސަދެއްގައިތޯ މިއީ އުފެދޭ ސުވާލެއް ނޫން ތޯ އެވެ.

ރައީސް އޮފީހުން ކުރިއަށް ގެންދާ އެކިއެކި ޕޮޑްކާސްޓްތަކުގައި ރައީސް ޑރ.މުހައްމަދު މުއިއްޒު އަދިވެސް ގެންދަވަނީ ރައްޔިތުންނަށް އެތައް އުންމީދުތަކެއް ގެނެސްދެއްވަމުން | ރާއްޖެއެމްވީ ގްރެފިކްސް

މި ހާލަތާ ގުޅުވައިގެން މުސްކުޅި ވާހަކައެއް ހަނދާނަށް އާދެ އެވެ. އެއީ ރީތިކޮށް ލަވަކިޔާ ފަގީރު މީހަކު ރަސްގެފާނުގެ އަރިހަށް ގޮސް ލަވަކިޔުމުން، ރަސްގެފާނު އުފާފުޅުން ގޮސް ރަނާއި ރިހި އަދި ގަނޑުވަރެއް ދޭނެ ކަމަށް ވިދާޅުވި ވާހަކަ އެވެ. އެ ފަގީރު މީހާ އުފަލުން ގޮސް އޭނާ ގެ ހުރި ކުޑަ ޖިފުޓި ވިއްކާލައި، ރަސްގެފާނު ދެއްވާނެ އެއްޗެއްގެ އިންތިޒާރުގައި ހުއްޓާ އެއްވެސް އެއްޗެއް ނުލިބުނެވެ. އެންމެ ފަހުން ރަސްގެފާނު ވިދާޅުވީ، "ކަލޭގެ ލަވައިން މަގޭ ކަންފަތް އުފާކޮށްދިނީމަ، މަގޭ ބަސްތަކުން ކަލޭގެ ކަންފަތް އުފާކޮށްދިނީއޭ" އެވެ. މިއަދު ދިވެހި ރައްޔިތުންނަށް ވެސް ވެފައިވަނީ މިފަދަ ގޮތެކެވެ. 

ކެމްޕޭން ދުވަސްވަރު ޑޮލަރުގެ އަގު 13 ރުފިޔާއަށް ތިރިކުރުމާއި، ޔޫރަޕް ފެންވަރުގެ ބޭސް ލިބުމާއި، ތުރުކީން ހިލޭ ކާޑުގެ ބާވަތްތައް ލިބޭނެ ކަމަށް ވިދާޅުވި ބަސްތަކަކީ ރައްޔިތުންގެ ކަންފަތަށް އިވުނު ވަރަށް އުފާވެރި އަޑުތަކެކެވެ. އަދި ކަނޑުއަޑީގެ ބިއްލޫރި ޓަނަލް ފަދަ ބޮޑެތި ހުވަފެންތައް ދެއްކެވި އެވެ. ނަމަވެސް، ވެރިކަމަށް އަހަރުތަކެއް ވެގެންދާއިރު، އެ ވިދާޅުވި އެއްވެސް ކަމެއް ހަގީގަތަކަށް ނުވެ، ރައްޔިތުން ތިބެން ޖެހިފައިވަނީ ހަމައެކަނި އުފާވެރި ބަސްތަކެއްގެ އުންމީދުގަ އެވެ.

މިކަންކަމަށް ބަލާއިރު، ރައީސް މުއިއްޒުގެ ސަރުކާރުން ރައްޔިތުންނަށް ދައްކަމުން ގެންދަނީ ވަރަށް ފުރިހަމަ ތަަސްވީރެކެވެ. ނަމަވެސް، އެ ތަސްވީރުގައި ކުލަޖެހި، އަމަލީ ސިފައެއް އަންނަތަނެއް ނުފެނެ އެވެ. ރައްޔިތުންނަށް ބޭނުންވަނީ ހަމައެކަނި ކަންފަތަށް އަރާމު ބަސްތަކެއް ނޫނެވެ. ރައްޔިތުން ބޭނުންވަނީ އަމަލީ ގޮތުން ފެންނަން ހުރި ތަރައްގީ އާއި، ދިރިއުޅުމުގެ ހާލަތު ރަނގަޅުވުމެވެ. އެހެން ނޫންނަމަ، މިއީ ހަމައެކަނި ރަސްގެފާނުގެ ވާހަކައިގައި ބުނާ ފަދަ "ކަންފަތަށް ލިބޭ އުފަލަކަށް" ވެގެން ހިނގައިދާނެ އެވެ.