މަޝްވަރާ ތަކަށް އަރާގްޗީ އޮމާން އަށް ވަޑައިގެންފި

އެމެރިކާ އާއި އީރާންއާ ދެމެދު ކުރިއަށްދާ ހަމަނުޖެހުންތަކާ ގުޅޭ ގޮތުން މަޝްވަރާ ކުރެއްވުމަށް، އީރާންގެ ފޮރިން މިނިސްޓަރު އައްބާސް އަރާގްޗީ އޮމާން އަށް ވަޑައިގެންފި އެވެ. 

މިކަން ރިޕޯޓު ކޮށްފައި ވަނީ އީރާންގެ ތަސްނީމް ނިއުސް އެޖެންސީ އިންނެވެ. މި ދަތުރަކީ މެދު އިރުމަތީގެ ސަރަހައްދުގައި ހިނގަމުންދާ ސިޔާސީ ހަރަކާތްތަކާ ގުޅިގެން ކުރިއަށް ގެންދާ މުހިންމު ޑިޕްލޮމެޓިކް މަސައްކަތް ތަކުގެ ބައެއް ކަމަށް ބެލެވެ އެވެ.

އީރާންގެ ފޮރިން މިނިސްޓަރުގެ ދަތުރުގައި އޮމާންގެ އިސްވެރިންނާ ބައްދަލު ކުރައްވައި، ދެ ގައުމުގެ ދެ މެދުގައި އޮންނަ ގުޅުންތައް ބަދަހިކުރުމާއި ސަރަހައްދީ މައްސަލަތަކާ ގުޅޭ ގޮތުން މަޝްވަރާ ކުރައްވާނެ ކަމަށް ލަފާ ކުރެވެ އެވެ.

އޮމާން އާއި އީރާންއާ ދެމެދު ގާތް ގުޅުމެއް އަބަދުވެސް އޮންނަކަން ފާހަގަ ކުރެވެ އެވެ، ދެ ގައުމުގެ ދެ މެދުގައި ވިޔަފާރީގެ ގުޅުން ތަކާއި، ސިޔާސީ ގުޅުންތައް ވަރަށް ބޮޑަށް އޮންނައިރު، އޮމާން އަކީ މެދު އިރުމަތީގެ ސަރަހައްދުގައި އީރާންއާ ދެކޮޅު ގައުމުތަކާ ދެމެދު މެދުވެރިއެއްގެ ދައުރު އަދާކުރާ ގައުމެކެވެ.

ފޮރިން މިނިސްޓަރު އަރާގްޗީގެ މި ދަތުރަކީ މެދު އިރުމަތީގެ ސަރަހައްދުގައި ހިނގަމުންދާ ބައިނަލްއަގްވާމީ މައްސަލަތަކާ ގުޅިގެން އީރާން އިން ކުރަމުންދާ ޑިޕްލޮމެޓިކް މަސައްކަތް ތަކުގެ ބައެއް ކަމަށް ވެސް ބެލެވެ އެވެ. ސަރަހައްދުގައި ހަމަޖެހުން ގާއިމު ކުރުމާއި، ސުލްހަ ދެމެހެއްޓުމަށް އޮމާން އިން ކުރަމުންދާ މަސައްކަތް ތަކަށް އީރާން އިން އަބަދު ވެސް ތައުރީފު ކުރެ އެވެ. 

އީރާންގެ ފޮރިން މިނިސްޓަރު އަރާގްޗީގެ މި ދަތުރުފުޅުގެ ތަފްސީލެއް މިހާތަނަށް ހާމަ ކޮށްފައި ނުވެ އެވެ.