އީރާން އާ ދެކޮޅަށް އެމެރިކާއިން ދަތިކުރުމުގެ އައު ފިޔަވަޅުތަކެއް އަޅައިފި
11 ޖުލައި 2026 | ހޮނިހިރު 05:21އީރާނުގެ ރިވޮލިއުޝަނަރީ ގާޑްސްއަށް މާލީ އެހީތެރިކަން ފޯރުކޮށްދޭ ވިޔަފާވެރިޔާ އަލީ އަންސާރީއާއި އޭނާއާ ގުޅުންހުރި ކުންފުނިތަކަށް އަމާޒުކޮށް އެމެރިކާއިން އާ ދަތިކުރުމުގެ ފިޔަވަޅުތަކެއް އަޅައިފި. މި ފިޔަވަޅުތަކުގެ ތެރޭގައި އީރާނުގެ ބޭންކުތަކަށް ބިލިއަނުން ފައިސާ ދައުރުކޮށްދޭ މަނީ އެކްސްޗޭންޖް ހައުސްތައް ހިމެނޭއިރު، މިއީ ގަލްފުގެ ކަނޑުގެ ސަރަހައްދުގައި އީރާނުން ދެމުންދާ ހަމަލާތަކާ ގުޅިގެން އެޅި ފިޔަވަޅުތަކެއް ކަމަށް ބުނޭ.
ޔޫއެސްއެސް އަބްރަހަމް ލިންކަން މަނަވަރުގެ ފްލައިޓް ޑެކުން "އީ-2ޑީ ހޯކްއައި" މަރުކާރުގެ ސަވައިލަންސް ބޯޓެއް އުދުއްސާލަނީ. | ޔޫއެސް ނޭވީ
ހުރްމުޒް ކަނޑުއޮޅިން ދަތުރުކުރާ ބައިނަލްއަގުވާމީ އުޅަނދުފަހަރަށް އަމާޒުކޮށް އީރާނުން އަލުން ހަމަލާދޭން ފެށުމާ ގުޅިގެން، އެގައުމާ ދެކޮޅަށް އެމެރިކާއިން އާ ދަތިކުރުމުގެ ފިޔަވަޅުތަކެއް ހުކުރު ދުވަހު އަޅައިފި ކަމަށް އެމެރިކާގެ ޓްރެޜަރީ ޑިޕާޓްމަންޓުން ބުނެފި އެވެ.
ޓްރެޜަރީ ޑިޕާޓްމަންޓުން ހާމަކުރި ގޮތުގައި، މި ފިޔަވަޅުތައް އަމާޒުކޮށްފައިވާ ފަރާތްތަކުގެ ތެރޭގައި ދުބާއީގައި މަސައްކަތްކުރާ އީރާނުގެ ބޭންކަރެއް އަދި ވިޔަފާވެރިއެއް ކަމަށްވާ އަލީ އަންސާރީ ހިމެނެ އެވެ. އަންސާރީއަކީ އީރާނުގެ ރިވޮލިއުޝަނަރީ ގާޑްސްގެ ހަރަކާތްތަކަށް މާލީގޮތުން އެހީތެރިކަން ފޯރުކޮށްދޭ ކަމަށް ބުނެ މީގެ ކުރިން އިނގިރޭސިވިލާތުން ވެސް ފިޔަވަޅު އަޅާފައިވާ މީހެކެވެ. މީގެ އިތުރުން އީރާނުގެ އެހެން ބައެއް ފަރުދުންނާއި ކުންފުނިތަކަށް ވެސް މިފަހަރު ވަނީ ފިޔަވަޅު އަޅާފަ އެވެ.
އަލީ އަންސާރީއަކީ އީރާނުގެ އާ ލީޑަރު މުޖުތަބާ ޚާމަނާއީއަށް މާލީ އެހީތެރިކަން ފޯރުކޮށްދޭ "މުހިންމު ފަރާތެއް" ކަމަށް ޓްރެޜަރީން ސިފަކޮށްފައިވެ އެވެ. އަދި އޭނާ ވަނީ އީރާނުގެ ރައްޔިތުންގެ ފައިސާ ބޭނުންކޮށްގެން ގައުމުން ބޭރުގައި ގިނަ އަދަދެއްގެ ބިމާއި މުދާ ގަނެ، އަމިއްލަ ނަފާގެ އިތުރުން ސަރުކާރުގެ އިސްވެރިންނާއި އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) މުއްސަނދި ކުރުމަށް މަސައްކަތް ކޮށްފައި ކަމަށް ވެސް އެމެރިކާއިން ބުނެ އެވެ.
ޓްރެޜަރީ ޑިޕާޓްމަންޓުގެ އޮފީސް އޮފް ފޮރިން އެސެޓްސް ކޮންޓްރޯލް (އޯ.އެފް.އޭ.ސީ) އިން ވަނީ އީރާނުގެ މުހިންމު މަނީ އެކްސްޗޭންޖް ހައުސްތަކަކަށް ވެސް ފިޔަވަޅު އަޅާފަ އެވެ. އެމެރިކާއިން ތުހުމަތުކުރާ ގޮތުގައި މި ތަންތަނުން ދަނީ، ދަތިކުރުމުގެ ފިޔަވަޅު އަޅާފައިވާ އީރާނުގެ ބޭންކުތަކަށްޓަކައި އަހަރަކު އެތައް ބިލިއަން ޑޮލަރެއް ދައުރުކުރަމުންނެވެ. މި ފައިސާ ދައުރުކުރަނީ ސަރުކާރުގެ ގަވާއިދާ ޚިލާފު މާލީ މުއާމަލާތްތައް ފޮރުވުމަށްޓަކައި އުފައްދާފައިވާ "ޝެލް ކުންފުނިތައް" މެދުވެރިކޮށް ކަމަށް ވެސް އެމެރިކާއިން ބުނެ އެވެ.
އީރާނާ ދެކޮޅަށް މި އާ ފިޔަވަޅުތައް އިއުލާނުކޮށްފައިވަނީ، ހަފުތާއެއްހާ ދުވަހު ކުރިއަށްދިޔަ ކުރިމަތިލުންތަކަށްފަހު މަސްރަހު ކުޑަކޮށް ފިނިވެފައިވާ ދަނޑިވަޅެއްގަ އެވެ. ފާއިތުވި ހަފުތާގައި ގަތަރާއި ސައުދީ އަރަބިއްޔާގެ ތިން މުދާ އުފުލާ ބޯޓަކަށް އީރާނުން ހަމަލާދިނުމާ ގުޅިގެން، އެމެރިކާއިން ވަނީ އީރާނުގެ ބައެއް ސަރަހައްދުތަކަށް ހަމަލާދީފަ އެވެ. އޭގެ ރައްދުގައި އީރާނުން ވަނީ ގަލްފުގެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ވެސް ހަމަލާދީފަ އެވެ.
މަސްދަރު: ރޮއިޓާސް
