އެމެރިކާ އިން ހަމަލާ ދިން ތަންތަނުގެ ތެރޭގައި އީރާނުން ހުރްމުޒް ކަނޑުއޮޅި ކޮންޓްރޯލް ކުރާ ވަސީލަތްތައް ހިމެނޭ
9 ޖުލައި 2026 | ބުރާސްފަތި 12:45އެމެރިކާއިން އީރާނުގެ އެކި ސަރަހައްދުތަކަށް ދިން ހަމަލާތަކާ ގުޅިގެން އެ ގައުމުގެ މުހިންމު ވަސީލަތްތަކަށް ގެއްލުންވެ މީހަކު މަރުވެފައިވާއިރު، މިއީ ބައިނަލްއަގުވާމީ ގާނޫނުތަކާ ޚިލާފު އަމަލެއް ކަމަށް އީރާނުން ބުނެފި.
އެމެރިކާއިން ދިން ހަމަލާތަކެއްގައި އީރާނުގެ މެރިޓައިމް ކޮންޓްރޯލް ޓަވަރަކަށް ބޮޑެތި ގެއްލުންތަކެއް ލިބިފައި. | ސްކްރީން އިމޭޖް
ބުރާސްފަތި ދުވަހުގެ ފަތިހު އެމެރިކާ އިން އީރާނަށް ދިން ހަމަލާ އަމާޒު ކުރި ތަންތަނުގެ ތެރޭގައި ހުރްމުޒް ކަނޑުއޮޅި ކޮންޓްރޯލު ކުރުމަށް އީރާނުން ބޭނުންކުރާ މުހިންމު ވަސީލަތްތައް ހިމެނޭ ކަމަށް ރިޕޯޓުތައް ބުނެފި އެވެ.
އެ ގޮތުން އީރާނުގެ ދެކުނު އައްސޭރިފަށުގެ ސަރަހައްދުތަކަށް، ހުރްމުޒް ކަނޑުއޮޅިން ފެށިގެން އޮމާން ކަނޑާ ހަމައަށް އަމާޒުކޮށް ބާރުގަދަ ހަމަލާތަކެއް ދީފައިވާ ކަމަށް އީރާނުގެ މީޑިއާތަކުން ރިޕޯޓުކޮށްފައިވެ އެވެ.
މި ހަމަލާތައް އަމާޒުވި ތަންތަނުގެ ތެރޭގައި އީރާނުގެ އެންމެ ބޮޑު ބަނދަރު އޮންނަ ބަންދަރު އައްބާސް ހިމެނެ އެވެ. މި ސަރަހައްދަކީ އީރާނުގެ ކަނޑުގެ ސިފައިންނާއި އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ މުހިންމު މަރުކަޒުތަކެއް ހުންނަ ސަރަހައްދެކެވެ. މީގެ އިތުރުން ޕާކިސްތާނުގެ ބޯޑަރު ކައިރީގައި އޮންނަ އައްސޭރިފަށުގެ ދެ ސިޓީ ކަމަށްވާ ކޮނާރަކް އަދި ޗަބަހާރަށް ވެސް ހަމަލާތައް އަމާޒުވެފައިވެ އެވެ.
އީރާނުގެ ކަނޑުދަތުރުފަތުރު ކޮންޓްރޯލުކުރާ ޓަވަރަކަށް އެމެރިކާ އިން ބޮން އަޅާ މަންޒަރު
މެހެރު ނިއުސް އެޖެންސީން އެ ސަރަހައްދުގެ ކަރަންޓު ޚިދުމަތްދޭ އިދާރާއާ ހަވާލާދީ ރިޕޯޓުކޮށްފައިވާ ގޮތުގައި، ޗަބަހާރަށް ދިން ހަމަލާތަކާ ގުޅިގެން އެ ސިޓީގެ ބައެއް ސަރަހައްދުތަކުން ކަރަންޓު ކެނޑުނު ނަމަވެސް، މިހާރު ވަނީ ގިނަ ސަރަހައްދުތަކަށް އަލުން ކަރަންޓު ދީފަ އެވެ. އަދި ޗަބަހާރުގައި ހުންނަ ކަނޑުދަތުރުފަތުރު ކޮންޓްރޯލްކުރާ ޓަވަރަކަށް ވެސް ހަމަލާ އަމާޒުވެފައިވާ ކަމަށް މީޑިއާތަކުން ބުނެ އެވެ.
ކޮންޓްރޯލް ޓަވަރަށް ލިބިފައިވާ ގެއްލުން
އީރާނުގެ ދައުލަތުގެ މީޑިއާއިން ރިޕޯޓުކޮށްފައިވާ ގޮތުގައި، އެ ގައުމުގެ އިރުދެކުނު ސިޓީއެއް ކަމަށްވާ އިރާންޝަހަރުގެ އެއާޕޯޓަށް ދިން ހަމަލާއެއްގައި ފަޔަރ ފައިޓަރަކު ވަނީ މަރުވެފަ އެވެ. ސިރިކް އަށް ދިން ހަމަލާގައި 3 މީހުން މަރުވެ 15 މީހުން ޒަޚަމްވި ކަމަށް އިސްނާ ނިއުސް އޭޖެންސީ އިން ރިޕޯޓުކޮށްފައިވެ އެވެ. މީގެ އިތުރުން، އީރާނުގެ އުތުރުގައި އޮންނަ އައްގަލާ އަވަށުގެ ކައިރީގައި ހުރި ރޭލު ދަތުރުކުރާ ބްރިޖަކަށް އެމެރިކާއިން ހަމަލާދީފައިވާ ކަމަށް ޕްރެސް ޓީވީން ވަނީ ރިޕޯޓުކޮށްފަ އެވެ.
އެމެރިކާ އިން ރޭލު ދަގަނޑަށް ދިން ހަމަލާއަކާ ގުޅިގެން، ތެހެރާނާއި މަޝްހަދާ ދެމެދު ދަތުރުކުރާ ރޭލުގެ ޚިދުމަތްތައް ވަގުތީ ގޮތުން މެދުކަނޑާލި | ޕްރެސް ޓީވީ
ބުދަ ދުވަހު އެމެރިކާއިން ދިން މި އާ ހަމަލާތަކުގެ ކުރިން، އީރާނުގެ ޚާރިޖީ ވުޒާރާގެ ތަރުޖަމާނު އިސްމާއީލް ބަޣާއީ ވިދާޅުވީ، އެމެރިކާގެ ހަމަލާތަކަކީ ދެ ގައުމުގެ ދެމެދުގައި ވެފައިވާ ފަހުމުނާމާއާ ޚިލާފު ކަމެއް ކަމަށެވެ. އަދި ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމުގައި އީރާނަށް އޮތް ޒިންމާއާ ބެހޭ މާއްދާއަށް އެމެރިކާއިން ގޮންޖަހާފައިވާ ކަމަށް އޭނާ ވިދާޅުވި އެވެ.
އީރާނުގެ މަޖިލީހުގެ ގައުމީ ސަލާމަތާ ބެހޭ ކޮމިޝަނުގެ ތަރުޖަމާނު ވިދާޅުވީ، އެމެރިކާގެ ހަމަލާތަކަށް ރައްދު ދިނުމުގެ ގޮތުން ކުރެވިދާނެ ކަންތައްތަކުގެ ތެރޭގައި، ނިއުކްލިއާ ހަތިޔާރު ފެތުރުން ހުއްޓުވުމާ ބެހޭ މުއާހަދާ (އެން.ޕީ.ޓީ) އިން ވަކިވުމާއި، އީރާނުގެ ނިއުކްލިއާ ސިޔާސަތު ބަދަލުކުރުން ހިމެނޭ ކަމަށެވެ. މީގެ އިތުރުން، ދުނިޔޭގެ ވިޔަފާރި އުޅަނދުފަހަރު ދަތުރުކުރާ މުހިންމު މަގަކަށްވާ ރަތްކަނޑުގެ ބާބުލް މަންދަބު ކަނޑުއޮޅި ބަންދުކުރުމަކީ ވެސް އޮތް ފުރުސަތެއް ކަމަށް އޭނާ ފާހަގަކުރެއްވި އެވެ.
އދ. ގެ ސަލާމަތީ މަޖިލީހަށް ބުދަ ދުވަހު ފޮނުވި ސިޓީއެއްގައި، އދ. އަށް ކަނޑައަޅާފައި ހުންނަ އީރާނުގެ މިޝަނުން ވަނީ އެމެރިކާއިން އދ. ގެ ނިންމުންތަކާއި އާއި ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފުވެފައިވާ ކަމަށް ތުހުމަތުކޮށްފަ އެވެ. އަދި އެމެރިކާގެ މި ހަމަލާތަކަކީ ދެ ގައުމުގެ ދެމެދުގައި ސޮއިކޮށްފައިވާ ފަހުމުނާމާއާ ޚިލާފު އަމަލުތަކެއް ކަމަށް ވެސް އެ ސިޓީގައި ބަޔާންކޮށްފައިވެ އެވެ.
