އީރާނާ މަޝްވަރާކުރަން އެމެރިކާ އިން އެއްބަސްވެއްޖެ
10 ޖުލައި 2026 | ހުކުރު 15:35އީރާނާއި އެމެރިކާއާ ދެމެދު ބަދަލުކުރި ހަމަލާތަކާ ގުޅިގެން އުފެދުނު ނުތަނަވަސްކަން ކުޑަކުރުމަށް ގަތަރު މެދުވެރިވެގެން މަޝްވަރާތައް ފަށައިފި. މި ހަމަލާތަކުގެ ސަބަބުން ހުރްމުޒް ކަނޑުއޮޅީގެ ދަތުރުފަތުރަށް ބުރޫއަރާފައިވާއިރު، ބައިނަލްއަގުވާމީ ބާޒާރުގައި ތެލުގެ އަގު ވަނީ ފަސް އިންސައްތަ މައްޗަށް ގޮސްފައި.
އިސްރާއީލާއި އެމެރިކާ ގުޅިގެން އީރާނަށް ދިން ހަމަލާތަކާ ދެކޮޅަށް، އެމެރިކާގެ ވައިޓް ހައުސް ކުރިމަތީގައި ބޭއްވި މުޒާހަރާއެއްގައި އޭނާގެ މައިންބަފައިންނާއެކު ބައިވެރިވި ކުޑަކުއްޖަކު އީރާނުގެ ދިދައެއް ހިފައިގެން ހުންނަ މަންޒަރު. | ގެޓީ އިމޭޖަސް
އީރާނުން މަޝްވަރާތައް ކުރިއަށް ގެންދަން އެދިފައިވާ ކަމަށާއި، އެކަމަށް އެމެރިކާއިން އެއްބަސްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހުކުރު ދުވަހު ވިދާޅުވެއްޖެ އެވެ. ނަމަވެސް، ދެގައުމުގެ ދެމެދުގައި އޮތް ހަމަލާ ބަދަލުކުރުން ހުއްޓާލުމުގެ އެއްބަސްވުން މިހާރު ނިމުމަކަށް އައިސްފައިވާ ކަމަށް ޓްރަމްޕް ވިދާޅުވި އެވެ.
ރައީސް ޓްރަމްޕް މިހެން ވިދާޅުވެފައި މިވަނީ، މި ހަފުތާގެ ތެރޭގައި ގަތަރާއި ސައުދީ އަރަބިއްޔާގެ ތިން މުދާ އުފުލާ ބޯޓަކަށް ހަމަލާދިނުމާ ގުޅިގެން، އެމެރިކާއިން އީރާނުގެ ބައެއް ސަރަހައްދުތަކަށް ހަމަލާދީފައި ވަނިކޮށެވެ. މީގެ ރައްދުގައި އީރާނުން ވަނީ ބުރާސްފަތި ދުވަހު ގަލްފުގެ އަވަށްޓެރި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާތަކެއް ދީފަ އެވެ.
"އިސްލާމީ ޖުމްހޫރިއްޔާ އީރާނުން ވަނީ މަޝްވަރާތައް ކުރިއަށް ގެންދިއުމަށް އަޅުގަނޑުމެންގެ ކިބައިން އެދިފައި. އެކަމަށް އަޅުގަނޑުމެން އެއްބަސްވެއްޖައިން. ނަމަވެސް، ހަމަލާ ބަދަލުކުރުން ހުއްޓާލުމުގެ އެއްބަސްވުން މިހާރު ނިމުމަކަށް އައިސްފައިވާކަން އެއްވެސް ޝައްކެއް ނެތް މިންވަރަށް އެމެރިކާއިން ވަނީ އެފަރާތަށް އަންގާފައި،" ޓްރަމްޕް ސޯޝަލް މީޑިއާގައި ލިޔުއްވާފައިވެ އެވެ.
އީރާނާއި އެމެރިކާއާ ދެމެދު ބަދަލުކުރި ހަމަލާތަކަށްފަހު މަސްލަހަތު ފިނިކުރުމަށާއި، ހުރްމުޒް ކަނޑުއޮޅިން ދަތުރުފަތުރު ކުރުމާ ގުޅޭގޮތުން މަޝްވަރާ ކުރުމަށް ގަތަރުގެ މަންދޫބުން ހުކުރު ދުވަހު އީރާނުގެ އޮފިޝަލުންނާ ބައްދަލުކުރައްވާފައިވާ ކަމަށް، މިކަމުގެ މައުލޫމާތު ހުރި މަސްދަރަކުން ރޮއިޓާސް ނިއުސް އެޖެންސީއަށް ކަށަވަރުކޮށްދީފައިވެ އެވެ.
ދުނިޔޭގެ ތެޔޮ ސަޕްލައިއަށާއި މުދާ އުފުލުމަށް މި ހަމަލާތަކުގެ ސަބަބުން ކުރިމަތިވެދާނެ ހުރަސްތަކާ މެދު ކަންބޮޑުވުން އުފެދިފައިވާތީ، މުހިންމު ކަނޑުގެ ސަރަހައްދެއް ކަމަށްވާ ހުރްމުޒް ކަނޑުއޮޅިން ދަތުރުކުރާ ތެޔޮ ބޯޓުތަކުގެ އަދަދު ހުކުރު ދުވަހު ވަނީ މަދުވެފަ އެވެ. މީގެ އިތުރުން، މި ހަމަލާތަކުގެ ސަބަބުން ދެގައުމުގެ ދެމެދުގައި އޮތް ވަގުތީ ސުލްހައިގެ ނާޒުކުކަން ވެސް ވަނީ ހާމަވެފަ އެވެ.
އީރާނުގައި ކުރިއަށްދާ މަޝްވަރާތަކުގެ ބޭނުމަކީ އެމެރިކާއާއި އީރާނާ ދެމެދު ވެފައިވާ ފަހުމުނާމާ ތަންފީޒުކުރުމާ ގުޅޭގޮތުން ވާހަކަދެއްކުމާއި، ވޮޝިންގޓަނާއި ތެހެރާނާ ދެމެދު ނުތަނަވަސްކަން އިތުރުވާން މެދުވެރިވި ސަބަބުތަކަށް ހައްލެއް ހޯދުން ކަމަށް އެ މަސްދަރުން ބުނެ އެވެ. މީގެ ތެރޭގައި ކަނޑުއޮޅީގެ ދަތުރުފަތުރާ ގުޅޭގޮތުން އުފެދިފައިވާ ދެބަސްވުންތައް ވެސް ހިމެނެ އެވެ.
މި ހަމަލާތަކާ ގުޅިގެން ތެލުގެ އަގު ހުކުރު ދުވަހު ކުޑަކޮށް ދަށަށް ދިޔަ ނަމަވެސް، މުޅި ހަފުތާއަށް ބަލާއިރު ތެލުގެ އަގު ވަނީ 5 އިންސައްތަ މައްޗަށް ގޮސްފަ އެވެ.
މަސްދަރު: ރޮއިޓާސް
