އީރާނުގެ ދެކުނުގެ ސަރަހައްދުތަކަށް ބުރާސްފަތި ދުވަހުގެ ރޭ ވަރުގަދަ ހަމަލާތަކެއްދީފި، އެމެރިކާ އިން ބުނަނީ ހަމަލާ ދިނުމުގައި ބައިވެރިނުވާ ކަމަށް
10 ޖުލައި 2026 | ހުކުރު 02:12އީރާނުގެ ދެކުނުގެ ސަރަހައްދުތަކަށް ދިން ހަމަލާތަކުގެ ޒިންމާ އެ ގައުމުން "ދުޝްމަނުން" ގެ ބޮލުގައި އަޅުވާފައިވާއިރު، އެމެރިކާއިން ވަނީ އެކަމުގައި ބައިވެރިނުވާކަމަށް ބުނެފަ. މި ހަމަލާތަކާއެކު ދެ ގައުމުގެ ދެމެދުގައި އޮތް ނާޒުކު ސުލްހައިގެ އެއްބަސްވުމަށް ގޮންޖެހުންތަކެއް ކުރިމަތިވެފައިވާއިރު، މަސްރަހު ދިރާސާކުރާ ފަރާތްތަކުން މި ފަހުގެ ހަމަލާތަކުގެ ތުހުމަތު އަމާޒުކުރަނީ އިސްރާއީލަށް.
2026 ވަނަ އަހަރުގެ ޖުލައި މަހުގެ 9 ވަނަ ދުވަހު، އީރާނުގެ ބުޝެހެރް ޕްރޮވިންސްގެ ބަނޫދުގައި ހުންނަ މަސްވެރިކަމުގެ ޖެޓީއެއްގައި ހުރި އުޅަނދުފަހަރުތަކެއްގައި ރޯވެ، ދުން އަރަމުންދަނީ. | ރޮއިޓާސް
އީރާނުގެ ދެކުނުގެ ސަރަހައްދުތަކަށް ބުރާސްފަތި ދުވަހު ގޮވުންތަކެއްގެ ހަމަލާތަކެއް އަމާޒުވެފައިވާ ކަމަށް އެ ގައުމުގެ ދައުލަތުގެ މީޑިއާއާއި އޮފިޝަލުން ރިޕޯޓްކޮށްފި އެވެ. މި ހަމަލާތައް އަމާޒުވި ތަންތަނުގެ ތެރޭގައި ބުޝެހެރުގައި ހުންނަ ނިއުކްލިއާ މަރުކަޒު ކައިރީގެ ސަރަހައްދުތައް ވެސް ހިމެނެ އެވެ.
މި ހަމަލާތައް މައިގަނޑު ގޮތެއްގައި އަމާޒުކޮށްފައިވަނީ އީރާނުގެ ދެކުނުގެ އެކި ސަރަހައްދުތަކަށެވެ. އޭގެ ތެރޭގައި ކޮނާރަކް އާއި ސިރިކް ފަދަ ސިޓީތައް ހިމެނޭ ކަމަށް ރިޕޯޓްތައް ބުނެ އެވެ.
އީރާނުން މި ހަމަލާތަކުގެ ޒިންމާ އަޅުވާފައިވަނީ އެ ގައުމުގެ "ދުޝްމަނުން" ގެ ބޮލުގަ އެވެ. ނަމަވެސް، އެއީ ސީދާ ކޮން ބައެއްކަން އީރާނުގެ ސަރުކާރުން ހާމަކޮށްފައެއް ނުވެ އެވެ.
އެމެރިކާގެ އޮފިޝަލަކު އަލްޖަޒީރާއަށް އަދި ސައުދީ އަރަބިއްޔާގެ އަލް އަރަބިއްޔާ ނޫހަށް މައުލޫމާތު ދެމުން ބުނީ، އީރާނަށް ދިން މި ފަހުގެ ހަމަލާތަކުގެ ފަހަތުގައި ވޮޝިންޓަނުގެ އަތެއް ނުވާނެ ކަމަށެވެ. އަދި އެމެރިކާއިން އަދިވެސް ބޭނުންވަނީ ތެހެރާނާއެކު ހާރިޖީ ގުޅުންތަކުގެ ތެރެއިން މައްސަލަތައް ހައްލުކުރުމަށް ކަމަށްވެސް އެ އޮފިޝަލް ހާމަ ކުރި އެވެ.
މަސްރަހު ދިރާސާކުރާ ފަރާތްތަކުން ބުނާ ގޮތުގައި، މި ހަމަލާތަކުގެ ފަހަތުގައި އެމެރިކާ ނެތް ނަމަ، ދެން މިކަމުގެ އިނގިލި ދިމާވާނީ އިސްރާއީލަށެވެ. ނަމަވެސް މިހާތަނަށް އެއްވެސް ފަރާތަކުން މިކަން ކަށަވަރުކޮށްދީފައެއް ނުވެ އެވެ.
މިދިޔަ އަންގާރަ ދުވަހުން ފެށިގެން އެމެރިކާއާއި އީރާނުން ދަނީ އެއްބަޔަކު އަނެއް ބަޔަކަށް ހަމަލާތައް ބަދަލުކުރަމުންނެވެ. މީގެ އިތުރުން ގަލްފުގެ ގައުމުތައް ކަމަށްވާ ގަތަރު، ބަހްރައިން އަދި ކުވެއިތުގައި ހުރި އަސްކަރީ މަރުކަޒުތަކަށް ވެސް އީރާނުން ވަނީ ހަމަލާދީފަ އެވެ. މިއާއެކު، މިދިޔަ ޖޫން މަހުގެ މެދުތެރޭގައި ގާއިމުކުރި ނާޒުކު ސުލްހައިގެ އެއްބަސްވުމަށް ވަނީ އިތުރު ގޮންޖެހުންތަކެއް ކުރިމަތިވެފަ އެވެ.
