ގަތަރުގެ ވަފުދު އީރާނަށް، އެމެރިކާ އީރާން ނުތަނަވަސްކަން ކުޑަކުރަން މަސައްކަތް ކުރަނީ
10 ޖުލައި 2026 | ހުކުރު 14:16އެމެރިކާއާއި އީރާނާ ދެމެދު އުފެދިފައިވާ ނުތަނަވަސްކަން ކުޑަކޮށް، ހުރްމުޒް ކަނޑުއޮޅީގެ ސަލާމަތާއި ދަތުރުފަތުރުގެ މިނިވަންކަން ކަށަވަރުކުރުމަށް ގަތަރުން ދަނީ ބާރުއަޅަމުން. މިގޮތުން ދެ ގައުމުގެ ދެމެދުގައިވާ ފަހުމުނާމާތަކަށް އިހުތިރާމްކޮށް، މަޝްވަރާގެ މަގު އިޚްތިޔާރުކުރުމަށް ގަތަރުގެ ބޮޑުވަޒީރު ވަނީ ގޮވާލައްވާފައި.
ޤަޠަރުގެ ވެރިރަށް ދޯހާގައި ހުންނަ އެ ޤައުމުގެ ނޭޝަނަލް މިއުޒިއަމް ކައިރީގައި ޤަޠަރުގެ ދިދަތަކެއް ހަރުކޮށްފައިވަނިކޮށް ފެންނަ މަންޒަރެއް. | ގެޓީ އިމޭޖަސް
އީރާނާއި އެމެރިކާއާ ދެމެދު އުފެދިފައިވާ ނުތަނަވަސްކަން ކުޑަކޮށް، ފުޅާ ދާއިރާއެއްގައި މަޝްވަރާތައް ކުރިއަށް ގެންދެވޭނެ މާހައުލެއް ގާއިމުކުރުމަށް ގަތަރުގެ ވަފުދެއް މިހާރު އީރާނަށް ގޮސް އެ ގައުމުގެ އިސް އޮފިޝަލުންނާ ބައްދަލުކުރަމުންދާ ކަމަށް މިކަމުގެ މައުލޫމާތު ހުރި މަސްދަރަކުން ހުކުރު ދުވަހު ރޮއިޓާސްއަށް މައުލޫމާތު ދީފި އެވެ. މި މަޝްވަރާތައް ކުރިއަށްދަނީ އެމެރިކާއާ ވެސް ގުޅިގެން ކަމަށް އެ މަސްދަރުން މައުލޫމާތު ދީފައިވެ އެވެ.
މި މަޝްވަރާތަކުގެ މައިގަނޑު ބޭނުމަކީ އެމެރިކާއާއި އީރާނާ ދެމެދު ވެފައިވާ ފަހުމުނާމާ ތަންފީޒުކުރުމާ ގުޅޭގޮތުން ވާހަކަދެއްކުމާއި، ވޮޝިންޓަނާއި ތެހެރާނާ ދެމެދު ފަހަކަށް އައިސް ނުތަނަވަސްކަން އިތުރުވާން މެދުވެރިވި ސަބަބުތަކަށް ހައްލެއް ހޯދުމެވެ. މީގެ ތެރޭގައި ހުރްމުޒް ކަނޑުއޮޅިން ދަތުރުފަތުރު ކުރުމުގައި އުފެދިފައިވާ ދެބަސްވުންތައް ހިމެނޭ ކަމަށް އެ މަސްދަރުން ބުނެފައިވެ އެވެ.
މަސްރަހު އިތުރަށް ގޯސްވިޔަ ނުދިނުމަށްޓަކައި، އެމެރިކާއާއި އީރާނުން ވެސް އެ ދެ ގައުމުގެ ދެމެދުގައިވާ ފަހުމުނާމާއަށް އިހުތިރާމްކުރުމަށާއި، މަޝްވަރާތައް މެދުނުކެނޑި ކުރިއަށް ގެންދިއުމަށް ގަތަރުން ވަނީ ބާރުއަޅާފަ އެވެ.
ގަތަރުގެ ބޮޑުވަޒީރު އަދި ޚާރިޖީ ވަޒީރު، ޝައިޚް މުޙައްމަދު ބިން ޢަބްދުއްރަޙްމާން ބިން ޖާސިމް އައްޘާނީ، މިސްރުގެ ޚާރިޖީ ވަޒީރު ބަދުރު ޢަބްދުލްޢާޠީއާ ފޯނުން ގުޅުއްވައި ދެއްކެވި ވާހަކަފުޅުގައި މިކަމަށް ގޮވާލެއްވި ކަމަށް އެކްސްގައި ކުރެއްވި ޕޯސްޓެއްގައި ވިދާޅުވެފައިވެ އެވެ.
މީގެ އިތުރުން، ހުރްމުޒް ކަނޑުއޮޅިން ދަތުރުފަތުރު ކުރުމުގެ މިނިވަންކަން ރައްކާތެރިކުރުމުގެ މުހިންމުކަމުގެ މައްޗަށް ބޮޑުވަޒީރު އަލިއަޅުއްވާލެއްވި އެވެ. އަދި ސަރަހައްދީ ސަލާމަތާއި ރައްކާތެރިކަމަށްޓަކައި، އެ ސަރަހައްދުން އަމާންކަމާއެކު ދަތުރުފަތުރު ކުރެވޭނެ މަގު ފަހިވެފައި އޮތުމަކީ ކޮންމެހެން ބޭނުންތެރި ކަމެއް ކަމުގެ އިންޒާރު ވެސް އެމަނިކުފާނު ދެއްވި އެވެ.
