ނޭޓޯގެ ސެކްރެޓަރީ ޖެނަރަލް ރުޓޭގެ ވާހަކަ ތަކަށް އީރާން އިން ވަރުގަދަ ރައްދެއް ދީފި

އެމެރިކާ އާއި އިޒްރޭލް އިން އީރާންއާ ދެކޮޅާށް ކުރަމުންދާ ހަނގުރާމައިގައި ވިލާތުގެ ޤައުމު ތަކުން ބައިވެރިވަމުންދާ ކަމަށް ތުހުމަތުކޮށް، ނޭޓޯގެ ސެކްރެޓަރީ ޖެނަރަލް މާކް ރުޓޭ ދެއްކެވި ވާހަކަ ތަކަށް އީރާން އިން ވަރުގަދަ ރައްދެއް ދީފި އެވެ. 

އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވަނީ، ނޭޓޯގެ އިސްވެރިޔާ ބަޔާން ތަކަކީ ހަނގުރާމައިގައި ބައިވެރިވުން އިއުތިރާފުވުން ކަމަށް ސިފަ ކުރައްވައިފަ އެވެ. 

އެކްސްގައި ކުރެއްވި ޕޯސްޓެއްގައި ބަޣާއީ ވިދާޅުވީ، އީރާންއާ ދެކޮޅަށް އެމެރިކާާ އާއި އިޒްރޭލް އިން ހިންގާ އުދުވާނުގައި ވިލާތުގެ ޤައުމު ތަކުން ގަސްތުގައި ބައިވެރިވާ ކަމަށް ރުޓޭ ތަކުރާރުކޮށް އިއުތިރާފުވެ ވަޑައިގަތުމަކީ، މި އަނިޔާވެރި އަދި ޣައިރު ޤާނޫނީ އަމަލު ތަކުގައި އެ ޤައުމު ތަކަކީ ވަކި ފަރާތަކަށް ނުޖެހޭ ބައެއް ނޫންކަން އަނެއްކާ ވެސް ކަށަވަރުވެގެން ދިޔަ ކަމެއް ކަމަށެވެ. 

އެއާ އެކު ބަޣާއީ ވިދާޅުވީ، މިއީ ބައިނަލްއަޤުވާމީ ޤާނޫނުތަކާ ޚިލާފަށް ހިންގާ އުދުވާނެއް ކަމަށެވެ. އީރާން އިން އަބަދު ވެސް އަންނަނީ އެމެރިކާ އާއި އިޒްރޭލް އިން ހިންގަނީ ޣައިރު ޤާނޫނީ އުދުވާނެއް ކަމަށް ބުނަމުންނެވެ. 

ބަޣާއީ އިތުރަށް ވިދާޅުވީ، އީރާާންއާ ދެކޮޅަށް ހަމަލާ ދިނުމަށްޓަކައި އެ ޤައުމު ތަކުގެ ސަރަހައްދު ތަކާއި، އަސްކަރީ މަރުކަޒު ތަކާއި، އުމްރާނީ ވަސީލަތްތައް ބޭނުން ކުރުމުގެ ފުރުސަތު ދިން ފަރާތް ތަކަށް، އެކަމުގެ ސަބަބުން ކުރިމަތި ވާނެ ނުރައްކާތެރި ނަތީޖާ ތަކުގެ ޒިންމާ އިން ރެކި ނުގަނެވޭނެ ކަމަށެވެ. އެއްވެސް ޖެހިލުމެއް ނެތި ހިންގާ މިފަދަ އުދުވާން ތަކަށް އެހީތެރިވުމަކީ ބޮޑު އިހުމާލެއް ކަމަށް ވެސް އޭނާ ވިދާޅުވި އެވެ. 

އީރާން އިން މިފަދަ ރައްދެއް ދީފައި ވަނީ، ބުދަ ދުވަހު ރުޓޭ ދެއްކެވި ވާހަކައާ ގުޅިގެންނެވެ. ރުޓޭ ވަނީ އީރާން އަށް އަމާޒުކޮށް އެމެރިކާާ އިން ދެމުންދާ އެންމެ ފަހުގެ ހަމަލާ ތަަކަށް ތާއީދު ކުރައްވައި، އެއީ ކޮންމެހެން ދޭން ޖެހޭ ހަމަލާ ތަކެއް ކަމަށް ވިދާޅުވެފައި އެވެ. މީގެ އިތުރުން، މިއަހަރުގެ މާޗު މަހުގެ ތެރޭގައި ހިނގި ކުރިމަތިލުން ތަކުގައި ނޭޓޯގެ ޤައުމު ތަކުން އެމެރިކާ އަށް ލޮޖިސްޓިކް އެހީތެރިކަން ފޯރުކޮށްދީފައިވާ ކަމަށް ވެސް އޭނާ ވިދާޅުވި އެވެ. 

Raajje.mv

ނޭޓޯ: އީރާނަށް އެމެރިކާއިން ދިން ހަމަލާތަކަކީ "ކޮންމެހެން މުހިންމު" ހަމަލާތަކެއް

ނޭޓޯގެ ސެކްރެޓަރީ ޖެނެރަލް ރުޓޭ ހާމަ ކުރެއްވި ގޮތުގައި، ހަނގުރާމައިގެ ފުރަތަމަ ހަ ހަފުތާގެ ތެރޭގައި އެމެރިކާާގެ 4000 އާއި، 5000 އާ ދެމެދުގެ އަދަދަކަށް އަސްކަރީ މަތިންދާ ބޯޓު ވިލާތުގެ އެކި މަރުކަޒު ތަކުން އުދުއްސާލާާފައިވެ އެވެ. މި ހަގީގަތްތަކާ އެކު އީރާން އިން ދެކެނީ ވިލާތުގެ ޤައުމު ތަކަކީ މި ހަނގުރާމައިގެ ސީދާ ބައިވެރިން ކަމަށެވެ.