އީރާންގެ 90 އަށް ވުރެ ގިނަ އަސްކަރީ އަމާޒު ތަކަށް ހަމަލާ ދީފައިވާ ކަމަށް އެމެރިކާ އިން ބުނެފި

އީރާންގެ އަސްކަރީ އަމާޒު ތަކަށް އަމާޒުކޮށް، ވަރުގަދަ ހަމަލާ ތަކެއް ދީފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނެފި އެވެ. 

ބުރާސްފަތި ދުވަހު ސެންޓްކޮމް އިން މިކަން ހާމަ ކޮށްފައިވާއިރު، އީރާންގެ އަސްކަރިއްޔާއާ ގުޅުންހުރި 90 އަށް ވުރެ ގިނަ އަމާޒު ތަކަށް ހަމަލާ ދީފައިވާ ކަމަށް ވަނީ ބުނެފައި އެވެ. 

މި ހަމަލާތަކާ ގުޅޭ ގޮތުން ސެންޓްކޮމް އިން ނެރުނު ބަޔާނެއްގައި ބުނެފައި ވަނީ، އެމެރިކާގެ ސިފައިން އީރާންގެ އައްސޭރިފަށުގައި ހުރި އަސްކަރީ މަރުކަޒުތަކާއި، މުހިންމު ވަސީލަތް ތަކަށް އަމާޒުކޮށް ކާމިޔާބު އޮޕަރޭޝަނެއް ކުރިއަށް ގެންގޮސްފައިވާ ކަމަށެވެ. މީގެ ތެރޭގައި ވައިގެ ދިފާއީ ނިޒާމު ތަކާއި، އައްސޭރިފަށް ބެލެހެއްޓުމަށް ބޭނުން ކުރާ ވަސީލަތް ތަކުގެ އިތުރުން، މިސައިލް އާއި ޑްރޯން ރައްކާކުރާ ގުދަންތައް ހިމެނޭ ކަމަށް އެމެރިކާ އިން ބުނެ އެވެ.

މީގެ އިތުރުން، އީރާންގެ ކަނޑުގެ ސިފައިންގެ ގާބިލުކަން ކުޑަ ކުރުމަށާއި، އަސްކަރީ ލޮޖިސްޓިކްސް އިންފްރާސްޓްރަކްޗާ އަށް އަމާޒުކޮށް ވެސް ވަނީ ހަމަލާ ތަކެއް ދީފައި އެވެ. ސެންޓްކޮމް އިން ބުނި ގޮތުގައި މި ހަމަލާ ތަކަކީ އީރާންގެ އަސްކަރީ ގާބިލުކަން ބަލިކަށި ކޮށްލުމަށް ދެވުނު މުހިންމު ހަމަލާ ތަކެކެވެ.

މީގެ ކުރިން އަންގާރަ ދުވަހު ވެސް އެމެރިކާ އިން ވަނީ އީރާން އަށް އަމާޒުކޮށް ހަމަލާ ތަކެއް ދީފައި އެވެ. މިފަހަރުގެ ހަމަލާ ތަކުގައި އީރާންގެ 90 އަށް ވުރެ ގިނަ އަމާޒު ތަކަށް ހަމަލާ ދީފައިވާ ކަމަށް އެމެެރިކާ އިން ބުނެފައިވާއިރު، މިކަމުގެ ރައްދުގައި އީރާން އިން އަންނަނީ އެމެރިކާގެ އަސްކަރީ އަމާޒު ތަކަށް ހަމަލާ ދެމުންނެވެ. 

އެމެރިކާ އިން އީރާންގެ އަސްކަރީ އަމާޒު ތަކަށް ދެމުން ގެންދާ މި ހަމަލާ ތަކަކީ، އެ ސަރަހައްދުގެ މަސްލަހަތު ހިމާޔަތް ކުރުމަށާއި، އީރާން އިން ކުރިމަތި ކުރާ ނުރައްކާ ތަކަށް ރައްދު ދިނުމުގެ ގޮތުން ދެވޭ ހަމަލާ ތަކެއް ކަމަށް އެމެރިކާ އިން ވަނީ ބުނެފައިވެ އެވެ.